《一個訂婚書生嘅出軌故事》: 婚前輔導
「我熄燈啦。」我無力的說。
「嗯。」
勞碌兩天，身心皆見疲憊。
鍾美嘉對我的不讀不回吸走了我的能量，使我對於身邊的事物失去興趣。
此刻的我感覺缺乏被愛與親密感，若誰能施捨多一點給我也好。
我沉默地抱著背向我睡覺的江柏琪，感受她背部的溫度。
說起來真諷刺，讓我心累的是外人，而我取暖和填補心靈空虛的對象卻是自己的未婚妻，好像搞錯了什麼。
在外頭搞了一堆麻煩事後便裝作什麼事情也沒有發生過，還有臉目躲進未婚妻的懷抱內，實在人渣極至的行為。
無法向外釋放的情感讓我的情緒窒息又壓抑。
「你今日好攰咁。」江柏琪感受到我的負能量。
「嗯，琴晚夜瞓阿嘛。」這是其中一個理由，不過並不是主要的理由。
「記唔記得今日睇婚展嘅時候，我地經過咗一個好老套嘅攤位？」江柏琪問。
「好多個攤位都好老套。」我說。
「位置係場地嘅一個角落。」
「婚前輔導？」
「無錯，就係講佢。」
「做咩突然提起？你想同我去婚前輔導？」
「經過果陣我喺度諗，既然兩個人都要結婚，唔係應該已經好瞭解對方先會做呢個影響終身嘅決定咩？點解會需要搵第三方介入去處理兩個人嘅感情？」
「係阿。」
「原來好多人都唔係喺好了解對方嘅情況下結婚。」
「點先算了解一個人？」我問。
「完全相信，對一個人毫無疑問？」
「你覺得自己唔了解我？」相信我了解她多於她了解我，因為我這個人的思想過於復雜了。
「我本來有自信。但當睇完宣傳單張裡面講嘅嘢，又覺得其實唔夠了解。我好驚自己有嘢做得唔好，令到你辛苦，但原來我一直都唔知。就好似細細個覺察唔到自己態度唔好，所以得罪人。」
「例如？」
「過去感情經歷對你嘅影響、婚姻對你嚟講係啲乜、你對關係嘅期望、當同我有衝突嘅時候你會有乜嘢反應、你對我嘅不滿、我地關係可能遇到最大嘅問題⋯」
「呢啲問題，我自己都無仔細咁諗過。」答案也不是三言兩語能夠說出來。
「例如你今日好攰，其實會唔會想留喺屋企休息，唔想行婚展？」
「攰係攰，不過最後今日，應承咗你都要行㗎。」
「點解你想同我結婚呢？係咪因為一齊咗好耐，覺得年齡到咗，係時候就要結呢？」
「我愛你，打算同你過一世，所以想俾返個名份你，係一個愛嘅象徵意義，就係咁簡單。」誰人問我，都是同一個答案。
為何我主動求婚，江柏琪還要執著於意義呢？她內心仍有不滿足的地方嗎？
我反問：「咁你呢？」
「我同屋企關係唔好。對我嚟講，結婚係第二人生，代表住新家庭嘅誕生。我唔係果種帶到俾你熱戀感覺嘅女仔，但我會係一個忠誠、用最大努力對你最好嘅老婆。」
「我知道。」她一向都是個很稱職的另一半，我續道：「我地溝通好好，唔需要靠其他人做婚前輔導，我好了解你。」
「我⋯其實有啲緊張。」江柏琪說：「結婚對我地關係同生活嘅改變，我仲未有實感。」
「呢個係對未知嘅恐懼。對我嚟講，結婚只係簽張紙，係一個儀式，對我地原有嘅關係唔會有咩改變。所以我無好驚嘅感覺。」
「我地無試過發生真係有好大嘅衝突。」江柏琪說。
「咁唔係好事咩？」我問。
江柏琪說：「有咩事或者唔開心，你唔好自己一個人死頂，話俾我知，我一定會幫你手。」
「呢句說話應該係我同你講。」
「就係咁啦，你一定係死頂。所以我一定要幫你。」
「我無死頂阿，只係未去到需要求助嘅地步。喂，可唔可以俾我做返個有型男人嘅角色。」
「唔得，我要做個最強賢內助。」
「我知道你細個被父母教導到一定要好成熟、有能力處理問題先值得被愛；但我想你知道，其實唔係，你已經夠好。我想你擁有個人生活，做多啲自己鐘意做嘅事。你唔需要為我付出整個人生，放棄你自己，我都一樣愛你。」
不算是不滿，但以上是我們關係潛在、而一直沒有說出來的問題。
江柏琪的生活重心全都放在我和工作上。她不常見朋友，下班後基本上沒有其他節目，會立即回家。她也沒有什麼特別興趣、或與我共同的興趣。
這方面與我不同，我的生活除了以上兩者，還有朋友、運動（籃球）和興趣（音樂、玩車）。
因為我們沒有共同的興趣或社交圈子，很多時候，我們拍拖的行程都是出外吃飯和做家務事。我偶爾覺得這種關係不太健康。
「我一直覺得OK阿，無察覺呢個Issue。」江柏琪說。
加上如果有一天，你知道我昨天的所作所為，失去了作為生活重心的我，你的世界會崩潰吧。
「你問我鐘意做啲咩，我都唔係好知，煮吓嘢俾你食掛。」
「你試吓發掘多啲，又或者我陪你去試多啲新嘢。」
「我要啲時間諗吓。」江柏琪說：「都夜啦，我批准你瞓覺。」
「謝主隆恩。」幸好她沒有繼續追問。
我閉上眼思考。
過去感情經歷對我的影響、婚姻對我來說意味著什麼、我對關係的期望、當遇到衝突時我的反應、我對江柏琪的不滿、我和她關係中遇到最大的問題⋯
我只是很表面地回答了江柏琪的問題。
事實上，我不太願意誠實面對自己內心的想法，尤其是在認識鍾美嘉後，以上的答案好像和原來的我有一點偏差。