《求婚嗰日，我發現我女朋友鍾意食屎》: 八十一
天真嘅童年總有結束嘅一日。
當石養么已經長大成為一個黑黑實實、體格魁梧，更加有力量保護向彩萍嘅大好青年，偏偏呢個時候，向彩萍就要離開村莊。
向彩萍去嘅地方，係一個聽聞比村莊發達唔知幾多倍嘅地方，叫做香港。
石養么當然知道向彩萍去香港係為咗幫媽媽賺醫藥費，所以亦無理由可以留住佢，但面對自己鍾情已久嘅女仔要離開，內心都係充滿住唔捨得嘅。
若果你問，石養么到底對向彩萍係愛定係責任啊？
佢會答你，why not both？
因為由佢細個開始，向彩萍就已經同佢嘅生命密不可分，愛同責任，兩者兼是。
為咗可以見多向彩萍一兩面，石養么自動請纓成為佢嘅司機。
喺車程上，兩個人並無特別講啲咩。
石養么曾經諗過，只要向彩萍喺車程上面輕輕講一句，「你可唔可以同我一齊去香港啊」，石養么都肯定會義無反顧咁跟佢去。
因為，只要向彩萍需要佢，佢一定會出現。
但係可惜嘅係，喺呢程車上面，向彩萍只係一直默默咁望住窗外不斷倒退嘅風景，並無講出石養么理想中嘅對白。
石養么明白，或者，佢暫時都只係可以擔當一個司機嘅角色。
司機，只會送客，卻唔會一直陪伴客人走落去。
到達雲南機場，當向彩萍嘅所有行李都放哂落車之後，石養么知道佢唔想面對嘅時刻都始終要嚟喇。
「到了香港，沒有了我，你也要照顧好自己。」石養么一邊講，一邊皺哂眉頭，非常用力咁忍住咗自己就快要流出嚟嘅眼淚。
「成了成了，不說了，我要上機了。」向彩萍有啲唔耐煩咁點一點頭。
石養么熟悉向彩萍，亦都知道佢向來唔鍾意人咁婆婆媽媽。
所以，石養么明白，如果真係要講，就要講最重要嘅一句說話。
石養么遲疑咗一陣之後，終於下定決心，鼓起勇氣好快咁講：「那……等你回來，我就娶你。」
「你說什麼？」向彩萍嘅反應，似乎係聽唔清楚石養么講咗啲咩。
到底向彩萍係聽唔清楚，定係對佢嘅說話感到反感，石養么已經分唔清楚。
所以，而家嘅佢只可以又尷尬又怕羞咁答向彩萍一句：「我說……我等你。」
聽咗呢句說話之後，向彩萍表情無咩大變化，好冷靜咁答咗一句：「嗯，那麼，再見了。」
未等到石養么答話，向彩萍就已經一走了之。
望住向彩萍嘅背影，石養么終於都忍唔住喊咗出嚟。
佢好擔心，人生之後再無機會會見到呢一個已經鍾意咗咁多年嘅女仔。
只不過，佢並無將自己嘅擔心講到出嚟。
「我保護她就是天經地義的事情」，呢份信念，石養么從細到大都無變過。
所以對佢嚟講，只要向彩萍可以做到佢想做嘅嘢，自己嘅少許擔心，並唔算得係咩。
於是，石養么開始咗喺家鄉無止境嘅等待同相思。
佢每個月都會跟住向彩萍嘅妹妹一齊寄一封信俾向彩萍，而向彩萍偶爾會回覆哂兩封，又時候就會一封過簡單回覆。
雖然信上面都係一啲對石養么嘅簡單問候，但只要石養么見到向彩萍喺信上面寫嘅消息都係平安快樂，而且又有能力可以寄錢翻家鄉，佢就會可以開心足足一個星期。
而為咗唔好同向彩萍相距太遠，石養么刻意出城打工，再用打工嘅錢買咗部電視機翻鄉下，專門用嚟睇港產片同電視劇。
雖然啲港產片同電視劇唔多新潮，但係石養么一時間就會睇，一來等自己可以知多啲香港嘅嘢，二來又可以學下廣東話。
總之，自從向彩萍走咗之後，石養么嘅生活不外乎就係寫信、睇劇、打工同照顧自己仲有向彩萍嘅屋企人。
所以，其實佢嘅生活入面，依然係以向彩萍為中心。
日復日，年復年，石養么已經由一個黃毛小子變成一個成熟穩重嘅男人。
好多村入面比佢年輕嘅後生仔都已經結咗婚，反而係佢三十幾歲都依然一直未有伴侶。
即使同鄉已經有好多人暗地裡笑佢傻仔白等一場，而父母亦都曾經俾咗壓力佢要佢早日成婚，但佢一直堅持，既然向彩萍喺香港雲英未嫁，佢就會繼續等向彩萍翻嚟鄉下。
雖然石養么同向彩萍已經相隔多年無見，但係從書信、電話、或者相片上，石養么相信向彩萍依然係當年嗰一個堅強硬朗而且識得照顧人嘅向彩萍。
而呢一個，就係佢一直都記掛住、深愛住嘅向彩萍。
對石養么嚟講，既然可以遇到一個值得深愛嘅人，即使要用上一世去等，又有咩所謂呢？
至少，能夠搵到一個自己打從心底愛嘅人，已經比嗰啲連咩係愛都未明白就胡裡胡塗過咗一世嘅夫婦幸福。
當然，石養么嘅父母並無咁高深嘅愛情觀，對於佢哋嚟講，或者會情願當日指腹為婚揀嘅，係向彩萍妹妹而唔係向彩萍。
當然，命運嘅嘢，又點會咁易猜測得到呢？
確實，命運難料。
正當石養么已經等到無再刻意計算日子嘅時候，偏偏就出現咗一個令向彩萍回鄉嘅契機。
就係，向彩萍嘅媽媽重病過身。
為咗要預備向彩萍媽媽嘅身後事，石養么打咗俾向彩萍。
而向彩萍聽到呢個消息之後，亦都果斷咁話會盡快翻嚟。
於是，石養么從十幾年前開始日盼夜盼嘅時刻，終於喺命運巧妙嘅安排之下出現。
從向彩萍過往寄翻嚟嘅信入面，石養么知道佢到達香港之後就去咗一間美容公司，而且收入相當唔錯，之後佢做咗大約七八年，就轉咗去開「譚仔」做老闆娘。
所以喺石養么心目中，今時今日嘅向彩萍應該係意氣風發，比起當年更加神采飛揚。
而到向彩萍正式翻到鄉下嗰一日，石養么一收到佢翻咗嚟嘅消息，第一時間就跑去佢屋企搵佢。
「阿萍，阿萍！」佢一路跑，一路嗌，因為佢如果唔叫出嚟，可能心入面嘅興奮會谷到佢個心臟爆炸。
當佢滿頭大汗嚟到向彩萍屋企嘅時候，佢終於見到自己朝思暮想嘅向彩萍。
石養么咩都無諗，第一時間就大笑住咁將向彩萍一下攬住咗。
苦等十幾年，當石養么可以實實在在咁攬住向彩萍，呢一種「重新擁有」嘅感覺，確實真係好難得。
亦都係因為呢一刻嘅擁抱，石養么已經覺得過往十幾年嘅漫長等待都係值得嘅。