《求婚嗰日，我發現我女朋友鍾意食屎》: 五十九

於是，向彩萍用最簡單嘅方法去解釋紅笛嘅功能，亦講咗自己識得控制蟲嘅技術。
為咗令氣氛輕鬆啲，向彩萍最後仲講笑咁加咗一句，如果嗰個大客再敢嚟搵丘志傑麻煩，佢可以幫手用蟲毒死佢，一了百了。
聽完向彩萍講之後，丘志傑跟住佢一齊笑咗出嚟。
望住丘志傑嘅笑容，向彩萍內心充滿住感動。
雖然向彩萍都未敢對「蠱」呢個字講出口，但係呢個男人聽咗自己有啲咁奇怪嘅能力之後，一樣可以同自己談笑風生，似乎，佢真係可以接受到自己。
所以喺呢一晚嘅最後，向彩萍為丘志傑送上咗一個好深情嘅吻別。
 
而當丘志傑走咗之後，向彩萍做咗兩件事。
第一，佢寫咗一封俾家鄉媽媽嘅信，內容大概係佢已經搵到一個適合嘅男人，叫媽媽唔需要為佢擔心。
第二，向彩萍喺第二朝早專登去錶行為丘志傑買咗隻錶。




因為喺琴晚嘅衝突入面，丘志傑受傷之後墜地，向彩萍見到佢隻錶撞到爆咗，所以向彩萍先有呢個打算，希望可以送一隻錶俾佢做禮物。
一隻錶，差唔多就已經用咗向彩萍儲足三個月嘅私己錢。
只不過，向彩萍覺得值得。
 
當晚，向彩萍如常咁等待丘志傑嘅出現。
因為每逢星期三，都係佢哋約定會見面嘅日子。
向彩萍將手錶收好咗喺衫袋入面，期待等丘志傑一到就將禮物送俾佢。
向彩萍內心好興奮，因為今次係佢人生第一次送哂俾鍾意嘅男仔。
呢一種小鹿亂撞嘅感覺，對向彩萍嚟講，就係愛情嘅真正感覺。
 




長夜漫漫，向彩萍袋入面嘅手錶亦一直轉動緊。
但係偏偏，向彩萍要等嘅人一直到收舖嘅時候都未到。
「或者，佢今日有事忙嚟唔到？」
向彩萍安慰自己，但係亦都別無他法，因為佢同丘志傑一向連電話都無交換過，所以根本就無方法可以搵到對方。
就係咁，向彩萍足足等咗丘志傑一個星期。
 
呢個星期，向彩萍一個客都無接過。
即使英姐迫佢接客，佢都會私底下用「赤木笛」召喚毒蟲將啲客嚇走。
所以雖然英姐唔知發生咩事，但係都感受到向彩萍呢個人唔簡單，於是都唔敢再咁多嗲，由得佢唔接客就算。
向彩萍就係咁一直坐喺佢同丘志傑每次都坐嘅枱度，默默咁等待佢嘅到來。




過咗呢個星期之後，向彩萍終於發現，原來呢隻手錶係買俾自己用嘅。
用途，係用嚟提醒自己丘志傑正式離開咗自己幾耐。
 
點解丘志傑會突然不辭而別？
向彩萍思前想後，答案都只係得一個。
丘志傑，並唔係自己想像中可以接受到自己一切嘅人。
佢，只係一個普通人，一個同媽媽所講一樣，接受唔到自己黑暗面嘅人。
丘志傑一直以嚟都只係逢場作戲，根本無認真對待過自己。
向彩萍需要承認，自己今次真係一如媽媽所講，無帶眼識人。
佢辜負咗媽媽，更加對自己芳心錯許感到失望同後悔。
悔恨悔恨，因悔成恨。
向彩萍將一切諗通嘅一刻，亦都正式將呢三個以嚟將丘志傑嘅一切愛意同傾慕，轉化為最純粹嘅恨意。
 
向彩萍決定要為自己白白付出嘅愛展開復仇。
因為佢知道丘志傑嘅公司名，所以佢首先喬裝出發去佢公司附近，然後派出飛蟲作出跟蹤，好快就已經查出丘志傑同佢女朋友嘅位置。




第二步，向彩萍查出咗丘志傑將要上去探女朋友嘅時間同日子，於是，向彩萍決定同丘志傑當面對質。
既然丘志傑令佢失去幸福，佢都要丘志傑同佢有同樣嘅下場。
 
於是，當丘志傑去到女朋友屋企之前，向彩萍已經提前用蜈蚣毒暈咗佢女朋友嘅父母，更加將佢女朋友綁起咗。
丘志傑女朋友見到向彩萍當然係非常意外，而向彩萍亦無同佢解釋太多，只係好簡單交低咗一句：「一陣你就會明白哂所有嘢。」
過咗無耐，丘志傑翻到嚟，佢望到一切嘅表情完全係驚慌失措。
而當丘志傑望到女朋友被人綁住咗嘅時候，向彩萍見到佢臉上出現咗係前所未有嘅關心同緊張表情。
單單係呢個表情，向彩萍已經知道自己永遠無可能得到丘志傑。
 
只不過，向彩萍內心嘅感覺係自己依然好唔捨得呢一個對自己唔住嘅人。
所以，本身明明係想嚟攤牌嘅佢，忍唔住用咗最卑微嘅態度，用近乎乞求嘅聲音同微笑去同丘志傑講自己並唔介意名份。
偏偏，丘志傑完全唔理佢呢一套，然後仲直接講出自己都係逢場作戲，而且更加無可能會鍾意佢呢啲隨時都會郁手殺人嘅惡毒女人。
 
就係呢句說話，徹底捏碎咗向彩萍嘅心。
想當日，面對嗰個任意向自己抽水嘅死肥佬，向彩萍都吞聲忍氣，唔敢用「蠱」去保護自己，為嘅就係可以繼續賺錢。




但係當丘志傑有事嘅時候，向彩萍諗都唔諗就為佢用「蠱」解圍，但係最後，竟然落得「惡毒女人」呢個名。
 
即使你願意無私咁付出愛，都唔代表對方願意全盤接受。
而丘志傑唔單止無接受，更加將向彩萍奉獻嘅愛直接拋落地下踩碎。
 
傷心欲絕嘅向彩萍，喺呢一刻竟然大笑咗嚟。
佢嘅笑，係笑自己太傻，傻在信夜場有真愛，信世上有人可以接受到他人嘅黑暗面。
太天真，實在太天真。
 
向彩萍慢慢攞出咗「赤木笛」，吹響咗一首曲。
一首無聲，卻盛載住佢滿滿哀怨嘅曲。