《求婚嗰日，我發現我女朋友鍾意食屎》: 三十七

「老實講啦，你哋嘅恩恩怨怨呢，我就無咩興趣。本來萍姐交代過要我唔好講佢下落，我就係唔應該講嘅，只不過，今次舖頭出咗事，雖然係意外，但係某程度上都同你呢件事有關。因果循環，一日唔解個因，一日都破唔到最後嘅惡果。作為萍姐多年朋友，我雖然唔知佢而家過成點，但係，我都唔想佢到而家都仲係放唔低，自己一個耿耿於懷。」娟姐將燒淨半枝嘅煙㩒熄咗，將個身傾前望住我，「你都知，養蠱人係唔好惹嘅，我亦都唔想因為話咗佢地址俾你聽而令自己惹到咩麻煩。所以，我需要你肯定咁答我一句，你係咪有信心可以解決到呢件事？」
我毫無懼色咁望翻住娟姐嘅雙眼，堅定咁答佢：「我無信心，不過我一定會將呢件事解決，因為，呢件事一日唔解決，我女朋友一日都唔會可以擁有翻一個平凡嘅人生。所以，為咗我女朋友，我一定、絕對、肯肯定會解決呢件事。」
娟姐聽到我嘅答案，微笑住咁點一點頭。
就係咁樣，我終於得到向彩萍喺香港嘅地址。
 
「南山邨南樂樓……係呢度喇。」敏敏按照我寫低嘅地址，帶住我哋行到目的地。
今日，我、敏敏仲有八仙果師父三人齊集，目的就係上向彩萍屋企探個虛實。
我哋跟住娟姐所俾嘅地址嚟到一間屋嘅門口，眼見鐵閘同大門都封哂塵，似乎已經好耐無人出入。
「無論入面有冇人住，我哋都要萬分小心，始終養蠱人屋企嘅危險無處不在。我今日已經帶咗唔少私家法器，以備不時之需。而為咗保住你哋自身安全，而家每人都買定一罐我嘅八仙果傍身先啦。」八仙果師父一邊講，一邊好及時咁開始賣廣告，最後又成功賣出咗兩罐俾我同敏敏。
果然，風水命理學家最叻嘅都係催谷自己嘅財運。




 
「好，你哋退後兩步，開門嘅嘢交俾我。」八仙果師父喺門口紮行個馬，我同敏敏都即刻彈到老遠，以免俾佢嘅法力所傷。
只見八仙果師父首先從佢個環保袋入面攞出佢嘅塵拂，喺門後同鐵閘旋風式咁拂咗幾下，似乎已經開始緊佢嘅法事。
我同敏敏眼都唔敢眨，好期待師父到底會用塵拂拂爆道門，定係用氣功裂開道鐵閘。
就喺呢個時候，師父再一次將隻手伸入環保袋度。
憑佢認真嘅表情，我感受到，佢準備要攞出一樣非常重要嘅道具。
 
下一秒，一件閃閃發光嘅銀器出現咗喺師父手中，從外型睇落係一件小型嘅道具，先有一個圓形，圓形前面就有一個長方形，而長方形上面就有啲鋸齒。
睇個樣，呢件法器又好似真係幾特別。
「嘩，師父，呢件法器又係咩名堂呢，之前未見過你用喎！」我有啲好奇咁問。




「萬用匙你都未見過？咁無常識㗎。」八仙果師父翻一翻我白眼，就攞咗把鑰匙去開門。
我見敏敏都笑緊我，我唯有跌落地下執翻渣沙咁自言自語講：「又係你話有法器嘅，點知咁Common嘅啫？」
 
「咦？」
當八仙果師父將萬用匙插入鐵閘嘅時候，佢發現唔使扭，鐵閘已經可以打開。
而木門，亦都係一樣，只要輕輕一推就已經可以打開。
咁即係話，原來鐵閘同門一路都係無上鎖嘅。
只不過諗深一層，其實咁亦都非常合理，如果唔係向彩萍又點會叫我外父入佢屋企呢？
 
呢個時候，向彩萍道門同鐵閘都已經打開咗，而我同敏敏跟住師父走入屋內。




只見間屋所有窗簾都拉起哂，令到間屋一啲光線都無，即使而家係晨早流流，但係室內都係異常地陰暗。
或者係因為間屋實在太耐無打開過，成間屋都充斥住一陣又梅又臭嘅嗡味。
「我去開盞燈先。」為咗令到大家方便睇嘢，我喺門口旁邊搵到個燈制，順手就打開咗燈。
 
「啊！！！！！！！！！！」
燈一打開，敏敏就喺其中一間房入面發出咗一聲尖叫。
我同八仙果師父一齊衝咗入房，然後見到敏敏掩住塊面咁指住幅牆。
我跟住敏敏手指嘅方向一望，馬上就明白點解敏敏會嗌成咁。
雖然我未至於好似敏敏咁驚，但係望到呢個畫面，內心都有一陣寒意。
因為我眼前呢幅牆上面，有一個直徑接近兩米大嘅圓形，而圓形入面，就有一個「蠱」字。
而最令人心寒嘅地方，係呢個「蠱」字竟然係由數之不盡嘅蟬所堆砌而成。
 
每一隻赤紅色嘅蟬，都好安靜咁痴住個牆沉睡緊。
但係每當有風吹過嚟，所有蟬翼微微擺動嘅時候，呢個「蠱」字竟然好似有生命咁慢慢喺牆上面郁動。
只能夠講，成個畫面都有說不出嘅詭異感。