《求婚嗰日，我發現我女朋友鍾意食屎》: 三十五

講到呢度，敏敏突然捉起咗我隻手：「你啲手指瘀哂啊！連手指甲入面都係啊！你做慣五星級酒店，要你嚟『譚仔』搬搬抬抬真係辛苦哂你啊。」
其實我呢刻手指嘅瘀傷，同「譚仔」並無關係，但係敏敏當然唔知道背後嘅原因啦。
但係敏敏無講錯，每日開工做足九個鐘「譚仔」，對於平時只需要喺酒店廚房指揮大局嘅我嚟講，的確係幾吃力。
但係當我望住敏敏好認真咁捉實我每隻手指，憐惜咁皺哂眉頭，我就覺得，可以有一個咁愛自己、願意為自己感到心痛嘅人其實真係好難得。
所以，只要可以幫到敏敏解蠱，令佢以後有翻一個平凡而幸福嘅人生，我係絕對唔介意呢刻嗰少少辛苦。
 
轉眼之間，我喺「譚仔」已經做咗三個星期。
雖然我同各個姐姐已經打好哂關係，亦對佢哋抽水嘅動作習以為常，但係可惜嘅係，調查並無咩特別進展。
一嚟，佢哋要講嘅好多都已經喺第一個星期講哂；二嚟，即使我曾經想大膽去套娟姐料，但係佢當時答都唔答就走咗去。
但係，眼見一個月時間已經過得七七八八，如果再無結果我都要翻去酒店做嘢。




 
既然咁辛苦先入到嚟「譚仔」做嘢，無理由無功而還嘅，所以，我決定要冒險行事。
 
「翠姐！收工喇喎！」我熄咗店面啲燈，喺員工室嗌咗翠姐一聲。
「好，我Check埋廚房就得！你攞定嘢先！」翠姐應咗我一句。
今日，舖頭由我同翠姐負責收尾。
無娟姐喺度，咁即係代表係一個好機會俾我做嘢。
 
「嘩，博仔，仲未執完啊？」翠姐執好舖頭手尾之後，就入咗嚟員工室。
「專登等埋你啫！」我笑笑口咁講。




「又賣口乖！」翠姐笑住打咗我一下，師奶嬌嗲嘅力道果然不同凡響，呢一下打到我有半邊手臂都痺咗，差啲以為自己打咗「復必泰」。
「係呢翠姐，你今日係咪負責Keep鑰匙？」我突然一問。
「係啊，做咩事？」
「無啊，我上次聽你講呢個萍姐咁叻整湯底，我就喺度諗，會唔會佢個Locker入面都收埋咗啲湯底秘笈俾你哋呢？其實我都好鍾意煮嘢食㗎，如果有機會見識下新湯底都好！」
「你嘅意思係……？」
「不如趁住無人，打開個Locker望下吖！」我終於講出我嘅意圖。
 
「咁……好似唔係幾好喎！」翠姐面有難色。
「我一直喺度諗，萍姐無理由咁耐都唔翻嚟開Locker㗎！佢對你哋咁好，可能就係留咗啲嘢俾你哋呢！你放心喎，我哋淨係打開望下吖，咩都唔攞咪得囉！你諗下，如果我哋真係搵到萍姐留俾大家嘅嘢，一嚟又對舖頭好，二嚟又還咗萍姐心願，一舉兩得，幾好吖！」
同翠姐相處咗三個星期，我知道佢係一個幾重人情味嘅人。




所以，我一早已經諗好向佢打人情牌，當佢考慮到為舖頭同向彩萍好，佢願意聽我講嘅機會就大大增加。
 
「嗯……」果然，娟姐拎咗條鑰匙出嚟，似乎認真考慮緊我嘅建議，「好啦，睇一睇啫，睇完咪閂翻佢囉！」
我成功咗！
望住翠姐慢慢將鑰匙插入鑰匙洞口，我嘅心跳都開始慢慢增加。
到底向彩萍嘅Locker入面會唔會有線索呢？
 
「咔噠」，係開鎖嘅聲音。
Locker嘅門，慢慢打開。
 
正當我準備要行埋去望下入面有啲咩嘅時候，我見到一舊黑影極速從Locker入面飛咗出嚟，直接飛向咗企喺Locker前面嘅翠姐。
跟住，翠姐發出咗一聲好淒厲嘅叫聲，成個人直接倒地。
我一望清楚，發現翠姐嘅手臂上面，竟然有一條赤紅色嘅蜈蚣咬住咗佢唔放。
 
「救……救我……」翠姐向我伸出手，似係想發出求救聲，但係無奈血不斷從佢手臂流出，令佢只可以發出無意義而絕望嘅叫聲。




我隨手從側邊拎咗一件員工衫對住條蜈蚣係咁拍，但係估唔到，條蜈蚣竟然死都唔放口。
三秒之後，翠姐已經嘴唇發黑，不斷喺地下典來典去。
而嗰條蜈蚣咬完翠姐之後，「唰」一聲就爬咗出房走咗。
 
我雙腳無力咁坐咗喺地下，望住攤咗喺地下典緊嘅翠姐。
望住佢好痛苦咁掙扎嘅樣，呢一刻我竟然完全無能為力。
而我唯一可以做嘅，就只有即刻叫救護車。
 
除此之外，我望入去向彩萍嘅Locker，入面竟然係空無一物。
呢個時候，我開始明白到，我將要應付嘅敵人，確實比我想像中唔簡單。


= = =
作者IG：Ｗindblowssilently
如果想加速追故，連登講故台及Penana正領先連載中!