《求婚嗰日，我發現我女朋友鍾意食屎》: 三十一

時光飛逝，如幻似煙。
轉眼之間，一個月時間已到，亦都即係到達咗我哋要去旺角「譚仔」應徵嘅日子喇。
喺呢一個月入面，敏敏已經將「譚仔話」練習得爐火純青。
佢已經去到一個程度係可以出街隨心使用「譚仔話」同人傾計，甚至混入一堆譚仔姐姐之中都唔會俾人發現。
若然以公開試嘅成績作為比喻，八仙果師父認證敏敏已經有「譚仔話」五星星級嘅水平。
至於我，唉，無論係無天份又好，後天不足都好，總之「譚仔話」學極都係得半桶水，口音似「得成顧傭」仲多過譚仔姐姐，所以我就只可以負責陪敏敏去應徵，無謂獻醜。
 
「譚仔」嘅應徵雖然要做四份卷，但係都係非常隨意咁安排咗敏敏去其中一張餐枱進行面試。
咁都好，起碼我可以坐喺隔離枱，隨時聽下發生咩事。
 




一位睇落四十幾歲嘅「譚仔姐姐」呢個時候坐咗去敏敏對面，喺佢面前放低咗幾張紙，然後講：「『稍』姐你巧，『禾』叫娟姐，係呢間鋪頭嘅『蒸』理，今日喺同你面試嘅。由於『巧』多人都想嚟『禾』哋度做，所以唔好介意『禾』哋入職考試比較『然』格。『衣』陣你要做四份卷，做哂之後再會同你簡單傾幾句計嘅。如果無問題，『禾』哋而家就開始卷一啦。」
講到呢度，我實在要讚下八仙果師父。
佢收嘅風果然相當準確，唔單止四份卷嘅考核內容清楚，而且亦都將敏敏打造成為一個超強嘅「譚仔話」專家。
我望住敏敏下筆有如神助，完全無半點猶豫，仲不時舉手嗌「加紙」，似乎信心十足，今次入職「譚仔」應該問題不大。
 
大概半個鐘之後，敏敏完成哂所有試卷。
「丘小姐，唔該哂你完成呢個面試，你嘅表現非常出色，估唔到你年紀輕輕都可以講得出一口流利嘅『譚仔話』。」經理娟姐收咗卷之後，突然用一口流利嘅廣東話同敏敏對話。
睇嚟，傳聞中「譚仔姐姐」唔係個個講嘢都有鄉音呢個傳說係真㗎。
 
敏敏聽到經理娟姐咁講，好開心咁笑住多謝佢嘅讚賞。




睇嚟，一切都十拿九穩喇。
 
「丘小姐，你見咗工咁耐，應該都講到口都乾啦。唔介意嘅話，飲埋啖湯先走吖。」娟姐一邊講，一邊招手叫咗另一位「譚仔姐姐」放低咗三碗細細地嘅湯。
呢三碗湯都係紅中帶白，似乎係「譚仔」嘅麻辣湯底。
我不期然喺度諗，作為一個「譚仔」員工唔通娟姐想乘機考埋敏敏食辣嘅能耐？
雖然呢一部分八仙果師父並未提及過，不過好彩敏敏本身就係一個勁食得辣嘅人，通常打邊爐佢都係點一個麻辣鍋再將啲肥牛點落辣椒豉油度食。
照咁計，「譚仔」嘅辣度，應該難佢唔到。
 
敏敏聽咗娟姐咁講之後，微微一笑，似乎猜測到娟姐心意，立即就先後將眼前三碗湯一乾而盡。
而當最後一隻碗放低嘅時候，敏敏依然面不改容，連汗都無流多滴。




「飲完呢三碗湯之後，唔知你有咩感覺呢？」娟姐收起本來嘅笑容，變翻做一個考官嘅認真樣。
「第一碗湯最無味，我估係五小辣？第二碗湯辣中帶酸，應該係你哋嘅酸辣湯。第三碗湯辣味最強，應該起碼係中辣程度。」敏敏笑住講出各種湯底不同，連我都忍唔住喺心底度欣賞敏敏睇穿咗娟姐想考驗佢嘅心思。
當然，敏敏之所以有呢份信心，全靠佢呢一個月嚟不斷食盡全港九嘅「譚仔」去練習聽「譚仔話」，所以先幫到佢對湯底咁了解。
 
娟姐聽咗敏敏嘅回答之後，笑住咁連續點咗幾下頭。
「丘小姐，估唔到你除咗『譚仔話』精湛之外，連對我哋嘅湯底都咁熟悉。」娟姐講到呢度，突然將停咗所有動作，慢慢擘大眼盯實咗敏敏，「只不過，好可惜咁話你知，我哋唔可以請你。因為，你唔係雲南人。你、唔、係、我、同、鄉、喎！」
 
呢句說話，完全係出乎我同敏敏嘅意料之外。