《求婚嗰日，我發現我女朋友鍾意食屎》: 二十五

正當嗰個西客打算擲出佢手上嘅啤酒樽，佢突然尖叫咗一聲，失手將個樽跌咗落地下度。而我望清楚佢隻手，竟然有一條好似佢手臂咁長嘅蜈蚣喺佢隻手上面爬緊。當時我梗係好驚啦，順便亦都望下身邊嘅彩萍有冇事。就喺呢個時候，我發現彩萍原來用隻手遮住緊個口，當我再望真啲，我發現佢個口入面含住咗一枝紅色似係短笛嘅物體。佢一路吹，雖然無聲，但係我跟住佢嘅目光望過去，竟然發現佢望緊嘅天花板，有幾隻毛茸茸嘅蜘蛛從天花板度慢慢吊緊落嚟。
 
嘩，我而家講起都仲記得，嗰幾隻差唔多有手板咁大隻嘅蜘蛛，一下就落咗喺個西客塊面度。呢個西客一直瘋狂尖叫，係咁Fing頭Fing手，最後應該係嚇到暈低咗。最後，呢一晚所有事情當然係無疾而終啦。
 
而事後，我忍唔住問翻彩萍，到底嗰枝紅色笛仔係咩嚟。佢嗰時用一個天真無邪嘅樣笑住答我，嗰枝係來自佢家鄉嘅工具，專門用嚟控制昆蟲嘅。佢仲話，如果頭先嘅西客夠膽傷害我，佢一定會召喚啲更毒嘅毒蟲嚟整死佢。
 
望住彩萍笑住咁講出呢番說話，我感受到，對於佢嚟講，殺人並唔係一回事。同佢相處嘅呢幾個月嚟，每次唔係飲大兩杯、就係情迷意亂，但去到嗰一刻，我先發現眼前呢個女人唔係我想像中咁簡單。其實，我根本就唔認識佢太多。呢一下嘅清醒同時亦都令我諗翻起，我自己身邊其實一直都有一個我好認識嘅女人，就係阿芳。我知道阿芳係一個點嘅人，我亦都可以放心咁同佢相處。經歷咗呢一剎那嘅醒悟之後，我下定決心，唔可以再用搵女人呢個方法嚟逃避自己嘅壓力，我要好好珍惜阿芳，因為佢先係對我最重要嘅人。
 
於是，自從嗰日之後，我就再無搵過彩萍。為咗彌補自己嘅內疚感，我亦都好努力咁去愛阿芳。正當我同彩萍斷絕聯絡一段時間，以為一切已經告一段落嘅時候，有一日，我去阿芳屋企探佢，一去到門口，我竟然發現有一條接近30cm嘅蜈蚣喺佢門口度盤旋緊。而我同時發現，阿芳屋企，道門呢刻竟然係虛掩嘅。
 




於是，我唔理地下條蜈蚣，一口氣就衝咗入去佢屋企。我一入門口就見到，阿芳爸爸媽媽都暈咗喺地下，而阿芳就清醒，只不過俾人綁咗喺張櫈上面。相信你都估到，搞出呢件事嘅人，就係彩萍。
 
當時彩萍望到六神無主嘅我，繼續保持佢一貫平淡嘅微笑咁同我講，佢已經唔介意做一個無名份嘅女人，點解我咁都要拋棄佢。我知道今次唔攤牌都唔得，所以唯有直接講，我對佢只係逢場作戲，唔係真心，而且我根本唔知佢係一個咁恐怖、郁啲手就會殺人嘅人。
 
彩萍聽到我咁講，竟然大笑咗出嚟，然後從佢個衫袋度抽出咗嗰枝紅色短笛一吹，我明明咩聲都聽唔到，但係一時間竟然有五十幾條蜈蚣從門外面爬哂入嚟圍住咗阿芳。阿芳雖然俾人塞住咗個嘴，但係我都睇得出佢用緊全力咁尖叫。
 
彩萍講，既然我話佢隨時都可以殺人，佢而家就殺咗阿芳，等我可以以後無後顧之憂咁同佢一齊。嗰一刻，我望住阿芳孤立無援咁喺張櫈上面叫緊，我個心好內疚。明明一直以嚟佢對我好好，從來無嫌棄過我出身，仲願意陪我挨窮，而俾壓力我嘅只不過係佢阿爸。但係，偏偏我出軌最後報應嘅竟然係喺佢身上。我知道，係我對唔住阿芳。
 
所以，嗰一刻我咩都無諗，一下子就衝過哂啲蜈蚣，一手攬住咗俾人綁住嘅阿芳，然後斬釘截鐵咁同彩萍講，今日係我對唔住阿芳，係我做錯，我係一個壞咗嘅人，我犯咗天下男人都會犯嘅錯。我抵死，只不過就算死，我都唔會揀佢。我一直以嚟都無愛過佢，我愛嘅人，就只有阿芳一個。
 




彩萍聽到我呢一番說話，臉色變到非常慘白。佢慢慢放低咗枝短笛，啲蜈蚣亦都慢慢退走。彩萍望住我，冷笑咗幾聲，然後又流咗幾滴眼淚，我大概聽到佢細細聲咁重複住『唔係真㗎、你係愛我㗎』呢句嘢。我同阿芳粒聲都唔敢出，以免再刺激到佢。
 
彩萍笑下喊下，突然表情一變，粒聲唔出咁走到去屋企門口，企定咗喺度。我未明佢想做咩嘅時候，佢就忽然一口咬落自己右手嘅虎口位度，佢隻手當然即刻流哂血啦。但係佢好似唔怕痛一樣，用呢隻充滿血嘅手喺塊地板上面寫咗啲字。我已經唔太記得佢寫咗咩，但係睇落似中文字又唔似中文字咁，最好嘅形容，可能就係鬼畫符。
 
佢寫完之後，個樣變到兇神惡煞咁望實我，一邊望，一邊仲要用佢嗰隻流哂血嘅手幫自己抹眼淚，搞到成塊面充滿血跡，成個畫面非常詭異。
 
臨走之前，彩萍最後就留低咗一句說話。佢話：『你一定係愛我，只係接受唔到我識得控制蟲呢件事。既然你係因為接受唔到我而放棄我，我就要你親身試下俾人接受唔到、俾人冷待、俾人放棄嘅滋味。』」


= = =




作者IG：Ｗindblowssilently
如果想加速追故，連登講故台及Penana正領先連載中!