《求婚嗰日，我發現我女朋友鍾意食屎》: 二十三

當初，我就係因為隻蛋變黑，所以先發現敏敏身上嘅奇怪。
而經過八仙果師父證實，熟蛋變黑，確實係測試人身上係咪中蠱嘅秘法。
而家，我同敏敏就準備出呢招嚟試下世伯伯母。
 
或者呢招真係太過少見，敏敏父母都不疑有詐，任由我同敏敏用隻雞蛋幫佢哋碌下手臂。
碌咗十分鐘左右，我同敏敏即刻小心翼翼咁各自拎住一隻蛋入廚房。
「打開隻蛋，我哋就知道邊個中蠱。」我好緊張咁望住隻蛋。
「點算啊，搞到我而家都好緊張啊！」敏敏不停咁搓手，呢個係佢緊張嘅時候嘅反應。
「真相，點都係要面對㗎啦，一齊打開佢啦。」我同敏敏一齊抬高咗少少手，然後一下一下咁將蛋殼拆開。
 




敏敏動作比我快，佢拆完蛋殼之後，發現隻蛋白雪雪，完全無半點黑色。
而我手上隻蛋，只不過係拆到一半，已經見到有如墨水嘅黑色出現。
「估唔到，原來係……世伯。」我同敏敏一齊不可置信咁望住呢隻最後全隻都係黑色嘅蛋。
 
我同敏敏拎起呢隻黑蛋，粒聲唔出咁走出客廳，行到敏敏父母睇緊嘅電視機前面。
「你哋做咩事啊？今日奇奇怪怪咁嘅？」世伯好有耐性咁笑住問咗一句，完全無怪責我哋阻到佢睇電視。
「爹哋，我哋已經知道咗喇。」因為事前我哋決定咗由敏敏負責問明一切，所以而家都係由佢開口發言先。
「知道啲咩啊？」世伯反問一句，個樣繼續非常平和。
「無耐之前，阿博發現咗我有食屎嘅怪病，然後，我哋再發現，原來我食屎唔係因為病，而係因為我中咗『蠱』。根據我哋認識嘅師父所講，『中蠱』嘅人，如果被蛋碌過，蛋就會變成黑色。而爹哋，呢隻就係頭先碌過你嘅蛋，換言之，你同我一樣身上都有『蠱』，你都一樣會食屎。」敏敏將隻黑蛋放咗喺佢爸爸面前。
 




「估唔到，咁努力守咗呢個秘密咁多年，始終都係守唔住。」望住呢隻黑蛋，世伯表情無咩點變，依然係非常慈祥，只係臉上多咗一份無奈，「雖然我無聽過咩『中蠱』，只不過，無錯，阿女，我同你一樣都係會食屎嘅。」
「終於可以唔再守呢個秘密，都係一件好事嚟嘅。」伯母將手放咗上世伯手背上面，輕輕拍咗幾下。
「咁講，即係媽咪你一直都知？」敏敏望向佢媽媽，而佢媽媽就點頭代表敏敏並無講錯。
 
「爹哋啊，點解你一直以嚟都唔同我講啫？」敏敏坐咗去佢爸爸身邊問。
「唉，俾個女知道自己會食屎，唔通真係韾香咩？」世伯搖住頭講。
「就算我知咗，我都唔會嫌棄你㗎！你哋做咩要瞞我咁耐喎？」敏敏就好似一個發父母脾氣嘅小女孩一樣，扠住腰望實佢爸爸。
 
「呢個問題，我諗我可以答到。」呢個時候，我決定出聲破壞一下佢哋一家嘅對話，因為我準備要向佢哋問出重點：「世伯伯母，你哋之所以瞞住敏敏，一來當然係面子問題啦。但係二來，以我所知，身中『血蠱』嘅人，亦都因為中蠱而身不由己咁食屎嘅你，必然係同施蠱者有過深仇大恨，先會俾對方以咁狠毒嘅方式嚟毒害你。所以，我估世伯你之所以一直都唔同敏敏交代你嘅食屎怪病，可能係因為背後有一個難以啟齒嘅秘密。」
 




「阿博，你果然聰明。雖然我仲未明白你哋口中所講嘅『血蠱』係咩，不過，我確實大概都知道點解自己會患上呢個食屎嘅怪病。」世伯慢慢咁點頭，直認不諱。
我同敏敏碌實對眼望住佢，因為跟住落嚟佢講嘅嘢，可能將會幫到我哋搵出養蠱人嘅身份。
 
「喺我患上呢個食屎怪病之前，我曾經做過一個壞咗嘅人。」世伯嘆咗一口氣，似乎喺度回想翻一啲唔想記得嘅前塵往事。
 
「我，曾經出軌。」