《求婚嗰日，我發現我女朋友鍾意食屎》: 二十一
點知，八仙果師父突然臉色一轉，變到笑到四萬咁口咁講：「今晚嘅除蟲服務、敏敏買嘅八仙果手鏈同埋其他養生療程總共收你$13688，你會想俾現金定碌卡？我哋如果用消費卷仲可以打個八折㗎！」
聽到呢度，我即刻無哂本來沉重嘅心情，個心只係為拎出嚟嘅信用卡而肉赤。
或者，我應該要多謝八仙果師父咁市繪。
當我翻到師父為我同敏敏準備嘅房嘅時候，敏敏原來已經準備好要瞓。
我好體貼咁同佢講聲「晚安」叫佢瞓先，然後自己就入咗洗手間沖個涼。
喺花灑嘅洗禮下，我感受到內心好多嘅鬱結都忍唔住要爆出嚟，所以我索性唔再死忍，任由自己喺水聲嘅掩護之下喊出嚟。
其實從我第一次目睹敏敏會食屎嘅嗰一刻開始，我內心就已經充滿愧疚感。
因為，我覺得自己明明講到有幾愛佢，但係偏偏連佢有一個咁嚴重嘅怪病都唔知。
然後，再到而家知道咗敏敏嘅情況比想像中更嚴重，我更加係又擔心又難過。
但係偏偏，我唔可以將我嘅憂慮同敏敏分享。
因為，呢刻佢比我更值得擁有軟弱嘅時刻。
而我亦都願意，「唯有硬撐著使你心安」。
為咗阻止自己再胡思亂想，我決定都係快快手沖完涼。
我從浴室出嚟，發現敏敏原來已經瞓著咗。
咁都係嘅，從今朝一早去搵八仙果師父，到夜晚殺蟲，再頻頻撲撲嚟到八仙果師父屋企，都應該攰㗎啦。
我輕手輕腳咁瞓咗去敏敏身邊，望住佢呢個瞓得好稔嘅樣，忍唔係就笑咗出嚟。
即使發生咗咁多事，敏敏依然係咁純真同簡單。
喺呢一刻，咩食屎、蠱毒、生仔，所有問題都好似唔見哂。
喺呢個完全寧靜嘅世界入面，就只係得我同敏敏。
我伸出一隻手，細細力咁掃住敏敏嘅頭髮。
望住敏敏，我覺得自己頭先所有嘅疑慮又好似拋諸腦後。
而家，我只係希望可以永遠令佢好似而家咁有覺好瞓，然後平平安安咁同我一齊。
所以，我知道關於蠱毒嘅秘密，我一定要好好守住，令敏敏可以有信心去解除蠱毒。
呢一個，先係可以保住我同敏敏幸福嘅方法。
只要保住呢一刻幸福，我哋先可以有美好嘅將來，有健健康康、肥肥白白嘅小朋友。
我慢慢潛入張被度，用手抱住咗打側瞓嘅敏敏。
正式入睡之前，我腦海入面閃過另一首Dear Jane嘅歌。
「我是個怕輸的人 仍然扮勇敢 前去雖嚇人 往後退更不忿」。
雖然我唔係一個特別堅強嘅人，但係為咗敏敏，而家眼前呢份體溫、呢個時刻、呢種窩心嘅感覺，就交俾我嚟守護啦。
講到呢度，我突然諗到一樣嘢。
呢樣嘢，令我忍唔住即刻起翻身，然後一口氣衝咗去八仙果師父間房。
當我衝到去師父間房，我心急到門都無敲就即刻打開咗道門。
點知，一開門，就見到著住白袍嘅高醫生，仲有換咗一身短裙護士裝嘅八仙果師父攬埋咗一齊。
佢哋兩個一臉尷尬咁呆咗望住我，我亦都呆咗咁望住佢哋。
我相信，我似乎揀錯咗時刻嚟搵八仙果師父。
「我明嘅，你哋係……準備轉運儀式吖嘛。」不過既然唔嚟都嚟咗，我一邊嘗試打破呢刻嘅尷尬，一邊補上一句：「不過，轉運之前，我仲有一件事想拜託師父你幫忙。」
＝ ＝ ＝
第二日，我同敏敏一起身，馬上商議點樣從佢爸爸媽媽身上得到關於「蠱毒」嘅線索。
「從細到大，我爸爸媽媽都無提及過佢哋都會食屎呢件事。但係諗翻轉頭，其實佢兩個對於我有食屎呢個怪病嘅反應，其實都真係比一般家長冷靜。我仲記得嗰時，佢哋只係帶咗我睇一次心理醫生就算。照咁睇嚟，可能就係因為佢哋其中一個本身已經有食屎嘅怪病，而另一個亦都知道，所以對我會食屎呢樣嘢就見怪不怪喇。」敏敏一邊回憶一邊講。
「照你咁講，即使佢哋真係有食屎嘅怪病，但係佢哋似乎都傾向要瞞住你多啲。既然係咁，睇嚟如果我哋直接問佢哋，未必可以問出啲咩結果。」我摸住下巴，開始同敏敏諗下有咩可以旁敲側擊得到真相嘅方法。
得出嘅結果係，我哋決定要分頭行動。
為咗盡早查出真相，敏敏負責聯絡佢父母，直接約今晚上去佢哋屋企食飯。
由於佢爸爸媽媽都已經退休，所以呢一部分並唔難做，敏敏一約就成功咗。
而我，就負責煮好今晚餐飯。
當然，呢餐飯係要用嚟試驗敏敏父母嘅，所以絕對唔係平時煮開嘅飯咁簡單。
晚上六點，我同敏敏準時去到佢父母屋企。
雖然平時我哋成日都會上去食飯，但係唔多係由我親手主理嘅，所以今晚有個咁特別嘅安排，敏敏父母都非常開心。
只係佢哋並唔知道，呢餐飯背後，其實就係一場對佢哋嘅試探，睇下到底佢哋邊個先係身上有蠱毒嘅人。
大約一個鐘之後，一圍枱，六碟餸，順利上枱。
「嘩，阿博你果然係大廚，碟碟都色香味俱存，阿敏有你真係幸福囉！」伯母笑住咁讚我。
「唔好講咁多啦，阿博今晚辛苦哂你啦。」世伯相當客氣咁為我倒咗杯清酒，然後講咗一聲：「大家起筷！」
「世伯伯母，話哂我咁少有嚟煮嘢食，梗係由你哋試菜先啦。」我笑咗一笑，邀請佢哋先行試食。
世伯媽媽笑住點頭，然後就各自夾咗啲餸菜入碗，順便食埋落肚。
而佢哋一啲都唔知道，其實佢哋已經喺無聲無息之間落入咗我精心佈下嘅陷阱入面。
「嗯，呢個咕嚕肉炸得夠脆，仲要隻甜品幾特別，同街上食開嘅好唔同。」世伯讚不絕口，一啖就吞咗舊肉。
「我呢舊苦瓜都好正，苦中帶甘，阿博你係點煮出嚟㗎？」伯母不知不覺間，亦都食咗幾舊苦瓜。
睇住佢兩個都各自食咗幾舊餸，我就知道，時機嚟喇。
「係啊，世伯伯母你哋真識食，因為今日呢幾碟其實都係我嘅獨創新嘗試，將中式小菜融合西式煮法，即係Fusion菜啊！」我笑住解釋。
「咁即係點fusion法呢？」世伯食緊第三舊咕嚕肉。
「好簡單，呢道每一道菜，我都加咗朱古力。」
無錯。
就係朱古力。
一個可以足以令中蠱嘅人忍唔住暴露食屎本性嘅秘密武器。
「咕嚕肉，我加咗朱古力吊味；苦瓜，我用可可豆嚟增強苦味嘅甘味，係咪好特別呢！」我一邊講，一邊觀察住敏敏父母嘅反應。
老實講，自從我公開咗每道菜都有朱古力之後，敏敏父母好明顯咁停咗手無再夾餸食嘢。
而且我仲望到，喺千份之一秒之間，佢哋極速交換咗一個眼神。
佢哋兩個之間，一定有一個心中有鬼！
正當我打算繼續觀察嘅時候，突然，敏敏父母同時企咗起身！
「我想去一去洗手間！」
估佢哋唔到，佢兩個唔單止同時起身，仲竟然可以同時講埋同一句對白，然後同時衝去兩個唔同嘅廁所！
唔通，呢個就係多年夫婦感情打造出嚟嘅默契？
而家佢哋咁樣互相掩護，到底邊個先係真正「中蠱」嘅人呢？