《求婚嗰日，我發現我女朋友鍾意食屎》: 十四

當敏敏嗌完呢一聲之後，我突然發現咗啲嘢。
呢刻，雖然成間房嘅地板都佈滿蟲，但仔細一睇，全部蟲其實都方向一致地向住左邊床腳嘅方向前進，反而比較接近我呢邊嘅右邊床腳暫時未見有蟲出現。
「點算啊！啲蟲就快殺到上嚟啦！」瞓喺左邊嘅敏敏退到去我身邊，臉上已經驚到出哂汗。
「放心，我應承咗唔會抌低你㗎！」我一諗到要保護敏敏，心中嗰份男子氣慨一湧而上，於是我一手𢲡起個枕頭，然後就坐咗去敏敏前面，開始對啲衝緊上嚟嘅蟲發動攻勢。
                       
跟住落嚟，就係一場戰況慘烈嘅攻防戰。
數之不盡嘅蟲蟲首先沿住床腳爬上嚟，我每見一條就用枕頭一下轟落去。
但係蟲蟲嘅攻勢亦都唔差，有啲蟲蟲開始趁住張被掂到地上，竟然從張被度爬上嚟。
我狠心將張被一捲落地，又有無數蟲蟲就包實而壓死。
 




喺呢張攻防戰入面，我完全感受到古代啲士兵攻打城牆呢件事係有幾咁慘烈。
而家啲蟲蟲就好似從前嘅士兵一樣，一波攻勢被我化解，另一波攻勢又再攻上嚟。
慢慢，連敏敏都開始要拎住佢嘅枕頭幫手拍蟲，而我哋兩個個枕頭都由全白色變到勁污糟。
 
呢場戰役打咗接近十五分鐘，情況開始有啲不妙。
雖然我感受到敵方已經死傷無數，但係最恐怖嘅係，無數嘅蟲依然從睡房外源源不絕咁湧緊入嚟，簡直好似唔會有殺完嘅一日。
而我同敏敏經歷咗呢十五分鐘之後，已經打蟲打到身水身汗，氣都喘埋。
換言之，如果打持久戰，啲蟲蟲一定會贏。
但係無奈嘅係，如果要去廚房拎殺蟲水，首先就要越過床下呢堆蟲。
我諗，除非我識得凌空打筋斗直接飛出客廳，否則都無可能越過到堆蟲。




 
就係咁又過咗十分鐘，戰況一直膠著不變。
但係，我同敏敏都發現，啲蟲嘅數量好似愈打愈多，但係我哋嘅體能就愈嚟愈少。
「啲蟲開始從左右兩面咁殺上嚟喇！」敏敏尖叫一聲，拍死咗幾隻從右邊上到嚟嘅蟲。
事實上，喺床上嘅我亦都見到，床下堆蟲嘅圈開始向住我哋愈收愈窄。
即係話，再過無耐，啲蟲就會殺到上張床。
 
為咗保護敏敏，我，下定咗一個決心。
「敏敏，我去廚房攞殺蟲水。」我雙眼炯炯有神，堅定咁講。
「但係咁你咪要……」敏敏好擔心咁望住我。




「放心，我會安全翻嚟嘅，等我。」我就好似一個準備踏上戰場嘅士兵一樣，一手將敏敏攬咗埋身，細細聲喺佢耳邊講：「如果我有咩事，你都要記得呢句，我永遠都咁愛你。」
講完之後，我喺床上面企咗起身，然後視死如歸咁借力向地下一跳。
「阿博！」呢一聲係我跳出張床之前聽到嘅敏敏最後一句嘅叫聲。
 
下一秒，我好驚訝咁發現，我竟然坐咗喺張床上面。
點會咁㗎？明明上一秒我已經跳咗出張床。
當我想望向敏敏問下到底發生咩事嘅時候，我突然發現有一個人唔知幾時搭住咗我同敏敏膊頭，而且坐咗喺我哋中間。