《求婚嗰日，我發現我女朋友鍾意食屎》: 九

根據網頁形容，「蠱」源於雲南，算係用毒方法嘅一種。
「蠱」，就係類似控制毒蟲進入人嘅身體，達致害人嘅目的。
人一旦中蠱，輕則出現身體嘅毛病，例如肚痛頭痛；重則可能會被人迷惑心志，失去自控，做出一啲反常行為。
睇到呢度，我隻手指無再碌落去。
「迷惑心志，失去自控，做出一啲反常行為」？
我忍唔住望向敏敏，而呢一刻嘅佢同樣碌大隻眼望實咗我。

「你係咪諗緊我諗緊嘅嘢？」我有啲緊張，又有啲驚慌咁問。
「你係咪覺得......我會失控咁食屎，可能其實係同中蠱有關？」敏敏自己講嘅時候都皺哂眉頭，應該係連佢自己都未接受到「中蠱」呢個可能性。
「嗯，如果係真，咁我朋友講嘅嘢就無錯，而一切都解得通。」我諗起光頭王當日所講嘅說話，直到而家終於搵到一個合理嘅解釋。





「咁我哋應該點啊？」敏敏對於自己食屎嘅問題突然有咗新嘅發現，似乎係擔心多過開心。
「既然而家有新線索，我哋應該查下關於『中蠱』嘅嘢，話唔定可能幫你解除食屎呢樣嘢，咁你以後咪可以做翻個正常人囉！」睇反應，我仲高興過敏敏。
咁當然啦，至少我以後唔再需要煩惱用咩嚟煮屎最好食吖嘛！

「但係呢......」敏敏欲言又止。
睇到敏敏呢個樣，我輕輕將佢攬咗入自己懷抱入面，溫柔咁問：「做咩事啊？」
「其實，我自從五歲開始就有呢個怪病，連心理醫生都話係不治之症，所以我一直都學習緊同呢個病相處。雖然佢令我好唔方便，但係至少，我慢慢都習慣咗同佢共存嘅最好狀態，亦都令我可以正常咁生活。

但係而家，突然出現咗『中蠱』呢個可能性。我見到，個網頁都形容到呢樣係一件好得人驚嘅事，甚至有人會因為『中蠱』而七孔流血咁死。我有啲怕，如果我真係『中蠱』，咁我之後到底會點呢？會唔會，發現咗背後原因之後嘅結果會仲恐怖過我而家食屎呢件事呢？例如個樣會變得差咗？或者到時可能會盲咗或者全身變黑？」敏敏挨住我，細細聲講出咗佢嘅擔心。




 
的而且確，網上對「中蠱」呢件事嘅形容係有多少恐怖。
先唔講啲相個個都影到五官扭曲，其實淨係單睇文字描述都有幾分心寒。
所以，敏敏呢種擔心都係合情合理嘅。
只不過，既然而家有機會可以解決呢個怪病，如果貿然放棄，我覺得未免太可惜喇。
 
所以，我將敏敏攬近咗少少自己，然後講：「當我大學Year 3突然同你講話我唔想再讀Business，我想輟學轉去學做廚，你仲記唔記得嗰時你同我講咗啲咩？」
「我話，只要嗰樣嘢係你想做，我就會支持你。」敏敏個頭背靠住我嘅膊頭，雙眼斜望住天花板，似乎喺度回憶緊幾年前嘅我哋。
「嗯，然後我又問你，如果我學廚之後搵唔到食，日日都只可以做茶餐廳，咁你又會點？」我用手輕輕摸住敏敏啡色過肩嘅頭髮，同樣陶醉喺美好嘅回憶入面。
「我話，如果係咁，我就努力賺錢開間茶餐廳，然後請你翻嚟俾個大廚你做，咁我就可以做你老闆食住你。總之，要辛苦就一齊辛苦，要開心就一齊開心。」敏敏講到呢度，就同當年一樣，笑住用手搣一搣我鼻尖。




「哈哈，終於俾我捉到你講漏一句！」我笑著抱緊了敏敏。
「咩啊，我未講咋嘛！」敏敏嘟起個嘴投訴。
 
「咁呀，數三聲一齊講吖。」
「未驚過！」
「三、二、一……生活再苦，但係我哋都要一齊甜！」
 
當我同敏敏同聲講出呢句嘢之後，我哋兩個相視一笑，而我亦趁機望實敏敏對眼講：「當年，你陪我挨過咗學廚嗰段最辛苦嘅時間，今日，我陪你走翻過呢個面對怪病嘅日子。我哋可以逐步逐步嚟，只要一有危險，我哋可以隨時停低唔再試。但係，我真係覺得既然有機會，點解唔搏一搏呢？」
「知你鍾意搏啦陳超博。不過，我都明白你嘅意思嘅。」敏敏終於點一點頭，「試下都無妨嘅，但係我哋係邊度搵個人嚟問關於『中蠱』呢樣咁偏門嘅嘢呢？」
「偏門嘢，當然係要搵一個偏門嘅專家啦。」我笑一笑，將部手機拎咗出嚟。
 
我再一次將手機遞去敏敏面前，畫面依然係頭先個網頁。
我用手指將呢個網頁一碌到底，上面寫住咗一句嘢。
 
「黑氣纏身、諸事不順、前途吉凶、破邪降魔、伏妖驅鬼，七仙羽師父幫到你。」