《求婚嗰日，我發現我女朋友鍾意食屎》: 六

離開光頭王間診所之後，我心入面繼續諗住佢最後所講嘅總結。
「以一個五歲嘅小朋友嚟睇，佢當年被診斷為『異食症』都好正常。但係你問我睇翻佢而家嘅種種行為跡象，其實佢真係唔多似『異食症』。咁當然，我都識你女朋友，我亦都唔覺得佢有必要呃你話自己有『異食症』。所以，我覺得可能係連佢自己都未清楚自己到底係因為咩原因會食屎。」
 
如果唔係因為「異食症」，咁到底敏敏因為咩事會食屎呢？
定係其實佢天生真係好鍾意食屎所以先會食屎？
到底係佢鍾意食屎所以食屎定係因為食過屎所以鍾意食屎？
唉，算啦，到最後我都係放棄咗思考呢堆同屎有關嘅哲學問題。
畢竟連醫生同敏敏自己都唔知道原因，我又邊可能估得到吖。
作為一個男朋友，我都係繼續小心去維繫我同敏敏嘅感情啦。
 




隨住時間過去，一個月嘅「思考期」終於到咗屆滿嘅一日。
老實講，以呢一個月嘅相處嚟講，其實大家都好明白對方嘅心意，亦都即係要將呢段關係繼續維持落去。
只不過，喺我哋處理關係問題之前，喺日子屆滿嘅呢一日，有一件更重要嘅事需要我同敏敏去做咗先。
呢件事就係，見家長。
 
無錯，我同敏敏都拍咗拖成七年，其實見家長嘅次數亦都不計其數。
而我阿爸阿媽其實都係性格極之外向開通嘅人，所以從來亦都無咩婆媳問題，佢哋同敏敏亦都相處得非常開心。
只不過，話哂今次係我知道咗敏敏有食屎呢個怪病之後嘅第一次見家長，所以我同敏敏心入面都難免有少少緊張。
而且最緊要嘅係，今日仲要係我媽媽生日添。
 




「應該無事㗎可？」敏敏有啲擔心咁企咗喺我屋企門口外面，遲遲未敢㩒落個門鐘度。
「無事嘅，其實之前都見過咁多次啦。我阿爸阿媽好少食朱古力，我琴日又突登將屋企僅有嘅朱古力奶飲鬼哂，照計今日應該無事嘅。」我安慰敏敏，但其實自己內心都喺度不斷祈禱希望今日大步𨈇過。
「好啦，咁……我㩒鐘啦。」敏敏下定決心，一下就㩒咗落門鐘度。
 
門一打開，一如既往係我媽媽熱情嘅歡迎。
而我同敏敏亦都即刻進入狀態，攞出四萬咁口Mode，一齊恭喜媽媽生日快樂，然後再入屋同我爸爸打招呼。
呢個時候屋企啱啱好準備開飯，於是我同敏敏分頭行動，佢去廚房幫手，我就去屋企四圍再視察下有冇朱古力呢啲咁危險嘅大殺傷力武器出現。
證實All clear之後，出面已經開咗飯，所以我都稍為放心，出去同大家食飯。
 
席上，大家談笑風生，一切如常，我同敏敏都開始唔再擔心，放鬆翻心情好似平時咁同我爸爸媽媽傾計。




食完飯之後，當媽媽同敏敏開始執碗，我阿爸突然攝過嚟我身邊，細細聲同我講咗句：「嗱，阿仔，而家你就拖延住你阿媽先，我入廚房攞蛋糕俾個Surprise佢。」
「無問題。」我俾個OK手勢，然後開始走過去同阿媽傾下啲無聊嘢，而阿爸就乘機閃咗入廚房。
 
大概十幾秒左右，全屋嘅燈光一下子熄哂，然後阿爸就從廚房捧咗一個點咗蠟燭嘅生日蛋糕出嚟。
「Happy birthday老婆！今年呢個蛋糕你唔好睇佢細細個啊，佢係用咗最貴最純嘅五重比利時朱古力整嘅蛋糕嚟㗎，我知你鍾意試新味，每年都要唔同嘢，所以經過咁多年之後，今年終於輪到朱古力味喇！」我阿爸好興奮咁講，而我阿媽望到阿爸呢個咁有心嘅驚喜，個樣都表現出一臉期待。
 
但係，我一聽就已經心知不妙。
WTF？！朱古力蛋糕？
仲要五重朱古力？