《求婚嗰日，我發現我女朋友鍾意食屎》: 四

聽到敏敏楚楚可憐咁問我，我不期然覺得有啲心痛。
我好自然咁捉起咗佢對手，好認真咁望住佢講：「傻妹，係人都有啲奇怪嘅地方㗎啦，例如我阿爸鍾意搣腳皮之後自己聞，又例如我阿媽鍾意專登唔剪手指尾指甲，仲有我，我次次去公廁痾尿趁無人都會專登射去隔離尿兜。如果咁計，其實你都只不過係有一款另類少少嘅奇怪啫！
 
我哋今年拍拖第七年啦，由大學開始我哋就一齊成長，捱過畢業、出嚟做嘢、互相支持咗咁耐，你覺得我會因為你一樣嘅奇怪而唔娶你咩？我話你知，我陳超博，一定會娶你丘思敏，而且仲會陪你醫好呢個怪病！」
 
我喺床上面一個翻身，碌咗去盒朱古力隔離，然後打開盒，拎出咗有戒指嘅嗰一粒朱古力。
然後我遮住咗佢，望住敏敏再同佢講：「粒朱古力，交俾我食，食完之後，我就攞隻戒指，同你求多一次婚。」
我一講完，就擘大個口，準備咬落粒朱古力度。
 
「咪住！」敏敏突然大叫一聲，令我維持住呢個擘大口嘅動作。




「阿博，好多謝你咁愛錫我，我感受到你講嘅嘢都係真心嘅。只不過，婚姻係人生大事，我唔想你今日為咗安慰我而迫住自己咁快做決定。不如咁吖，我哋試下等多一個月，一個月之後，如果你嘅心意無變，你先再話我知。而我都想用一個時間，諗下我應該點。」敏敏一邊講，一邊長睫毛不停咁眨呀眨，好似反映緊呢刻嘅佢同樣地心事重重。
 
顧己及人，向來都係敏敏嘅性格。
我哋之所以可以拍到咁耐拖，其中一個原因係佢真係好識得去體諒同遷就人。
敏敏雖然份人好低調，但係自從大學我認識佢開始，我都發現佢人緣好好。
唔單止認識佢嘅人都會好鍾意同佢相處，我甚至無聽過佢係學校或者職場入面遇到咩人際問題。
呢一樣亦都可以印證，敏敏本來就係一個人際相處嘅好手。
只係我諗唔到，嚟到呢件人生大事上面，佢一樣可以咁體諒我，甚至為我多諗一步。
 
捫心自問，我真係好愛敏敏，我相信佢就我呢一生之中最需要搵嘅人。




但係，其實敏敏所講嘅考慮亦都無錯。
到底我將來如果日日都見到佢食屎，我會唔會崩潰呢？
我會唔會有一日後悔，今日咁倉促做咗呢個決定呢？
我唔否定，呢一刻我答佢「想同佢結婚」，其實並唔係一個深思熟慮嘅答案。
所以既然呢一刻佢提出用一個月時間俾大家冷靜諗下，我都係贊成嘅。
我覺得，我要諗嘅唔係娶唔娶佢，而係之後應該用一個咩嘅態度去面對佢嘅呢樣怪病。
 
「好啦，一於咁話啦，不過，你要記住一樣嘢，」我深呼吸一口氣，然後凝望住敏敏雙眼講：「直到呢一刻，我都係咁愛你。」
敏敏聽到，雙眼一紅，似乎又準備再喊過，但係嘴角同時又展露咗一個幸福嘅笑容。
睇住呢個眼淺嘅傻妹又喊又笑，我情不自禁咁輕輕將個頭湊近佢，然後錫咗佢一啖。




或者係因為大家嘅情緒經歷咗一輪大起大落，所以呢一刻當大家可以親近嘅時候，都不自覺地變得肉緊起嚟。
亦都因為咁，一個浪漫嘅短吻，隨住情緒變化慢慢就變成咗一個深情嘅法式濕吻。
 
正當我好享受呢個「巴黎鐵塔反轉再反轉」嘅時刻，我聞到一浸味。
係屎味。
呢浸味，令我諗起一啲嘢，然後我停低哂所有口部動作，有啲緊張咁住敏敏。
敏敏望到我呢個樣，「啊」一聲咁尖叫咗出嚟，有啲唔好意思咁講：「對唔住啊，頭先因為心情太複雜，所以我喺廁所只係洗咗面，唔記得𠺘口啊……」
 
一聽到呢句，我即刻幻想到頭先自己條脷就好似一個除塵止拖板咁抹哂敏敏口腔入面所有嘅屎。
一諗到呢度，一陣嘔心嘅感覺湧上喉嚨。
我可以做嘅，就只有即刻衝去廁所。
當我走入廁所之後，為免敏敏會擔心我討厭咗佢，我盡全力忍住嘔出嚟嘅衝動，向外面嘅敏敏大叫多一句：「我愛你啊敏敏……」
然後，我先開始盡情狂嘔。