因為個火山孝子，我識左對孖妹: Ch.52

因為Sandy在旁的原故，我們順利通過那森嚴的保安…

我們走到升降機前，我開口說:

「一陣如果淇淇唔信我，你幫我講兩…」

我沒把話說完，電話鈴聲從Sandy的手袋傳出來，她拿起接聽…

「喂，阿軒…… 係喎，差啲唔記得左添，我而家過嚟。」





她掛掉電話後對我說:

「我唔記我約左人，我走先，你自己上去啦。」

「吓，你走左，一陣淇淇唔肯開門見我咁點算。」

「呢啲野梗係你自己搞掂，我都幫左你咁多，自己加油啦。」

Sandy把淇淇的住址拋下給我，就回頭離開…





我依著Sandy所說的住址走到門前，手抖的按下門鈴…

不出一會，一把男聲從門旁的對講機出傳…

「請問你係邊位，有咩事?」

「我係淇淇朋友，嚟搵淇淇。」

「淇淇…哦…咁你係佢邊位朋友?」





怎麼這道門比剛才的保安還要森嚴…還有這個男人是誰?淇淇的父親嗎?

我報上自己的名字的話，這個人去詢問淇淇的話，她一定會拒絕見我…

「我叫阿軒…係Sandy叫我上嚟問淇淇拎返啲野。」

我唯有冒認肥軒，再借Sandy過橋…是Sandy叫我自己想辦法，我也只能借她名義一用…

片刻後，那道門終於打開，開門的是一位高大的年輕男人…他是誰?

「入嚟啦…」他對我說。

我踏入門內，屋內的豪華裝潢映入我眼簾，牆上掛著一堆裝置藝術，落地玻璃映著一覽無遺的風景…而且空間比蒂蒂住的那裡還要大，這就是城中豪宅嗎…

「佢係房到，你入去搵佢啦。」那男人又對我說。





我四周環顧，除了眼前的這個男人就沒有其他人。淇淇不是與父母住嗎?而這個男人又是誰…難道是…

我抱著疑問的走到淇淇房間…我打開房門，淇淇臥在床上…

「淇淇…」我呼喊一聲。

她用驚訝的神情望著我…

「點解會係你…」

「係我扮肥軒，我知你唔想見我。」

「咁你仲嚟做咩?走啦。」





「我係嚟解釋琴晚嘅事。」

「點解要同我解釋?你同蒂蒂嘅事關我咩事。」

「點會唔關，自從生日會後，我係咁搵你都搵唔到，你消失左呢幾個月，先知原來我一直愛嘅係你…」

「你已經有蒂蒂，你再講呢啲野只會令我覺得你更加賤格，唔該好好咁對我個妹。」

我跟淇淇說，自從我重遇蒂蒂就已經對她沒有感覺，我只是出於朋友的關心，我又解釋昨晚的事…

「我咁做都係為左搵返你，可能你覺得係藉口，但係我全部講嘅都係真，我只係想同你…」

「夠啦，就算你講嘅係真，你而家搵我仲有咩意義…」淇淇阻止我繼續說。

「你咁講咩意思?你鍾意左第二個?係咪出面嗰個男人?」我突然發狂的抓著淇淇的手。





「好痛啊放手啊…你癲夠未?你走啊，我冇野再同你講。」淇淇不斷掙開我的手。

「你唔同我講清楚我係唔會走。」

我們之間擾攘越來越嘈吵，驚動到剛才那個男人，他進來把我和淇淇分開。我欲再上前，他又阻止我，我用力把他推開，把他推倒在地上…

「邱子峰!停手啊!」淇淇大聲的把我喝住。

「你變左，你以前都唔係咁…你走，我以後都唔想見到你。」淇淇狠狠地趕我離開。

我變了嗎?我為何會變得如此?我望著房間的鏡子，我認不出鏡中的人是誰…剛剛令淇淇受傷的人是我嗎?

我從來沒想過我會傷害淇淇，如今不論是外在的傷痕還是內心的傷痛都是由我造成的…





我恍神的離開了淇淇的家，離開時我隱約聽到淇淇的哭泣聲…