因為個火山孝子，我識左對孖妹: Ch.49

面對蒂蒂熱情的攻勢，我無法回應她的心意…

日子越久，蒂芾就越積極，雖然我依舊不太給予回應，日子久了我也怕內心有一刻會動搖。畢竟每日在我身邊的是蒂蒂而不是淇淇…

我不想讓蒂蒂知道我喜歡的對象是淇淇，所以沒跟蒂蒂提起過淇淇。為免我與淇淇的距離漸行漸遠，我只好硬著頭皮找機會問出淇淇的下落…

這天，蒂蒂又衝上來我家，她無意間發現我之前準備的聖誕禮物…

「咦，你都鍾意Charmmy Kitty架?」蒂蒂拎著吊飾問。





「本來上年聖誕整嚟諗住送俾你，最後都冇送到。」

「都話你對我好，連我鍾意Charmmy Kitty都知道。」蒂蒂望著吊飾甜笑。

我說是淇淇告訴我的，我終於逮到機會提及淇淇，便順著問:

「係喎，淇淇有冇搵過你?佢幾個月都冇搵過我。」

「同爹地媽咪一齊去食飯嗰陣見過一兩次囉。」





我又問她淇淇搬走的原因，卻聽到意料之外的答案…

「家姐好似話要去澳洲讀書，所以想走之前陪多啲爹地媽咪。」

淇淇要離開香港!?她是一早就計畫還是因為我而離開?我深怕她離開以後再也找不到她…

「淇淇而家住邊?帶我搵佢…」我抓緊著蒂蒂雙臂急切地問。

「你冷靜啲先，捉到我好痛。」蒂蒂說。





我意識到自己抓得太用力，便放開手向蒂蒂道歉…

「一提到家姐要走，你就咁緊張…唔通你…」蒂蒂支支吾吾的問。

剛才我激動的反應曝露了我的心意，看來也暪不了…

「係，我鍾意嘅係淇淇，我冇同你講係因為驚你同淇淇比較，又或者覺得我當你係淇淇先關心你。」

蒂蒂忽然沉默，我又繼續說:

「我由始至終都冇當過你係淇淇嘅代替品，因為你係你自己，所以我冇接受你嘅表白，一直都冇同你講，對唔住。」

我以為蒂蒂的反應跟上次一樣，情緒大變，得到的回應卻是…

「唔洗對唔住，反而要多謝你一直顧住我感受。」





「家姐真係咁好咩?個個都鍾意佢。」蒂蒂又忍不住問。

「如果論性格，你一定好過佢。」我回答。

「咁點解你鍾意佢唔鍾意我?」

「雖然佢成日同我嘈，但係同佢一齊嘅時候好舒服自在，佢嘅溫柔會係有需要嘅時候出現，佢嘅笑容好溫暖…」

我邊說邊回想起與淇淇的時光…

「睇嚟你真係好鍾意家姐…」

「或者以前係鍾意，我而家先知係愛佢。」





蒂蒂又沉默一會，她提出一個奇怪的協議…

「我可以幫你搵家姐，但係你要同我拍一日拖。」

蒂蒂提出的條件，我心裡抗拒，但為了淇淇，我只好勉強答應。

就這樣，我與蒂蒂約定好要約會一天。她說行程要由我定…起初我想帶她到主題樂園，但又怕了無新意，於是我決定帶她到赤柱…