自從武肺之後，我喺英國做咗個成日都想沉船，但永遠都沉唔到嘅人⋯: 《序、2019年夏-離港》

我叫Bianca，今年25歲，而家係第三年喺英國，慢慢咁融入緊呢度嘅生活。

第一年，我以留學生嘅身分入嚟英國讀書，果陣諗住終於可以同當時嘅男朋友團圓，完結大家兩年以嚟Long-D嘅關係 (喺英國最好完整咁講Long-distance，因為Long-D有另一個意思 😏），
話晒呢兩年嚟，大家都經歷唔少嘢 ，我返工時，佢去讀MASTER；我嚟英國讀MASTER嘅時候，佢就出社會做嘢，大家都付出咗唔少心機，去配合大家嘅LIFE STAGE。
---------------------------------------------------------------------------------------------------------------------------------------------------------------
2019年夏天 @ 香港國際機場

「好嘢，我哋終於唔駛再晚晚計住時差咁FACETIME啦」我哋喺候機室坐低等上機嘅同時，我一路摸住佢手臂，個頭枕住佢心口，細細聲喺佢耳邊講。

佢用手抬一抬我個頭，好深情咁望住我，然後「嗯」，燦爛咁笑，再錫一錫我額頭，我哋咁啱就夠鐘上機啦。





- 23:40 HONG KONG TO LONDON: BOARDING SOON -

當時我真係以為，從此我嘅LOVE LIFE 會一路好似當刻咁甜蜜，而且去到英國仲會幸福落去。

上到機，平時唔鍾意坐窗口位嘅我，今次選擇咗坐窗口位，原因係我想望多次香港嘅夜景，呢一次離開香港，唔知幾時會再返去，一年後？兩年後？抑或係五年後？

機師廣播之後，飛機慢慢咁由跑道起飛。

「唉⋯香港真係好靚」我望住凌晨12點仲係燈火通明嘅赤鱲角機場跑道咁講。