出租女友: 《廿二話 真心的悸動》

(經過一晚嘅檢查，和也同水原都無咩大問題，只係擦損下咁，然後佢哋就各自出院）

（一太朝早，木部一大班人就接和也出院）

「咦，伊藤英明終於都出嚟啦！」木部一見到我就串我，說說伊藤英明係《海猿》嘅男主角。

「邊個係海猿呀！一啲都唔好笑囉。」我反串返木部。

「係喇，加藤愛呢？」究竟木部仲要講個gag講幾耐！加藤愛係《海猿》嘅女主角。





「水原？水原佢一早就返咗老家啦，我一早講過佢老家喺附近嘛，哈哈！」我真係天才，又過到骨。

「好多謝你哋嚟醫院接我呀！」我向各位朋友道謝。

(和也道謝之際發現坐喺另一架車後座嘅麻美啤住自己，和也立即上前想同麻美解釋）

「麻美關於尋日嘅事呢，我…」我都未講完，麻美就搖上車窗。

哎，我應該係被麻美討厭，咁都係好正常嘅，明明約咗係泳池不見不散，點知我就放咗麻美飛機，仲要隱瞞我同水原一齊嘅事實。





對唔住呀嫲嫲，對於帶真正嘅一半嚟見你嘅任務，我又倒退咗一步。

（話咁快，和也就被送返屋企樓下）

「再見啦和也，幫我問候水原同學啦，關於你哋想分手嘅話題我會向你嫲嫲保密，跟住你同水原同學要好好相處。」木部邊幫我拎行李邊講。

「分手嘅問題其實仲未解決到。」我直接了當咁向木部講。

「咩話，到呢個時候你仲堅持要分手？」木部覺得難以置信。





「呢個問題，俾你想像之中複雜得多呀。」我心虛得迴避木部嘅目光。

（木部一下拍咗落和也後尾枕度）

「做咩又打我呀？」我怪責木部。

「有幾複雜我唔會知，不過我知道一個人為對方連命都唔要的話，唔都唔算鍾意，咁點先算係鍾意。」木部又好認真咁講，同時我完全辯駁唔到。

「總之你就賭上一生嘅運氣去挽留你哋嘅關係啦。」木部講完就上車離開。

雖然木部可能講得無錯，不過根本就無可能，首先我同水原嘅關係係建基於金錢之上，其次係水原對我係唔會有呢份感情。

無錯，一定唔會有，諗返起一之瀨模式之下冷酷無情嘅眼神就可以好肯定。

（此時一之瀨模式水原都返到屋企）





「喂，你喺度做咩呀，唔該借借。」話口未完，無情眼神就出現，我即刻彈開讓路。

「係啦，下星期嘅假約會我預約好咗，到時我會將錢放入你郵箱度。」我趁水原未入屋就順便交代聲。

「哦，多謝晒。」水原望都無望我就入咗屋。

（拖住疲累身軀嘅和也，一入屋不理三七廿一就跳落床）

水原佢係一個超級靚女，著起泳衣簡直係殺死人，見到女友模式嘅水原話唔會鍾意嘅都一定係有問題。

但係如果水原自己都講清講楚話無可能的話，仲去鍾意水原嘅就一定係大蠢材。

（諗下諗下，和也就訓著咗，然後就夢見麻美）





（「和也，我哋一齊去落海玩呀！」係著比堅尼嘅麻美）

（「你就係和也，係咪呢！」和也突然夢見第一次見面嘅水原）

（「唔該你唔好再講我和也嘅壞話。」
「如果你唔介意，我可以陪你。」
「你多少都有啲男子氣概。」）

（水原一幕又一幕嘅畫面出現係和也嘅夢境中，和也突然驚醒）

由始至終，我都係嗰個（大蠢材）。