出租女友: 《第一話 美麗的初遇》

我叫做木之下和也，二十歲仔，依家喺練馬大學讀經營系。

我自己一個人住喺練馬區嘅納米單位，暫時我無打算去做兼職揾下零用錢幫補下，因為我問我父母一次過攞咗一百萬生活費，前提係我洗哂之後，佢哋一個仙都唔會俾多我。

我講呢啲嘢做咩呢，都唔係重點，重點係我係有女朋友嘅，我重複一次，我有女朋友呀！我依家就出去拍拖啦。

「好對唔住呀，和也，我哋分手啦！我鍾意咗第二個呀。」女朋友講完頭也不回，轉身就走。

呢一刻我驚魂未定咁講咗句：「我…我…我俾人…俾人飛咗？」





明明喺我有生以來第一次識到嘅女朋友，但係只係短短嘅一個月，我就俾佢飛咗。佢叫做七海麻美，係同我讀同一間大學嘅。

「唉！佢連ig 都block埋我。」我黯然慨嘆咗一句。

「Part-time GF？ 」碌碌下ig 見到，當中仲有好多條款-「收費為一小時¥5000」、「GF係可以指名」、「與事務所嘅囡囡夢幻一刻」、「適合唔習慣女性嘅人」、「歡迎對戀愛感覺到壓力和不安嘅你」、「二人共處一室係禁止嘅」、「身體接觸原則上都係禁止嘅」。

「唔需要啦，我巳經咩都唔需要啦。」我語帶絕望咁抱怨一句。

「哈…我到底攪乜鬼呢！」寂寞難耐，一時衝動，我就喺嗰個ig入面隨便指名咗個幾靚嘅約出嚟，唔洗審都知十成九都係照騙啦，一陣出現嘅肯定係濃妝醜女，仲要係個八婆，一見唔對路我就調頭走人。





「橙色T，間條褲，你就係和也，係咪呢！」一個著白色藍玫瑰印花連身短裙，長直黑，五官標緻嘅靚女對住我講。

「啊…啊…嗯…」我有啲反應遲鈍嘅回應。

「太好啦，終於揾到你，你住係呢度附近？我第一次嚟呢個站，所以有啲唔係好識路。」佢心情好好咁同我講，介紹返先，眼前呢個咁可愛嘅女仔叫做水原千鶴。

「唔好企係度講啦，我哋揾間cafe坐下先。」水原主動提出。

「和也，我讀year 1㗎，你呢？」我哋隨意揾間cafe坐低咗之後水原就開口問我。





「我都係讀year 1，不過我之前repeat過一年。」我都係未係好回到神咁答佢，有啲語無倫次。

「咁我係咪應該叫你和也哥哥呢！」水原帶住個甜美笑容咁對我講。我心諗，真係好有拍拖嘅感覺，水原嘅樣貌、身材、衣着打扮都係完美無瑕，佢真係Part-time GF？我帶住超現實嘅感覺沉思中。

「呀！係啦，嗰¥20000…」水原有啲唔係幾好意思咁開口。

「呀…係嘅係嘅。」我一邊回答一邊喺銀包攞錢俾佢，突然有一下，七海麻美係我腦海中閃過，真係弊！真係好想起身走人，就咁返屋企大覺瞓，不過錢都俾咗，總之就跟住之前講好咗嘅拍拖行程繼續落去。

「其實我係第一次嚟水族館㗎炸。」水原興奮咁講。

「誒…真係難得。」我都唔係好識俾反應咁講。

「嘩！呢一條好可愛呀！」水原雙眼發光咁指住同我講。

「呢一條係紅帶半線脂鯉。」我隨口就話佢知。





「咦…你對魚都知得好清楚咁啵！」水原有少少驚訝咁講。

「唔係，我只是對水族館有少少興趣咁姐。」我一副正經咁答水原，然後水原竟然一臉仰慕咁回應我：「你真係好犀利呀！」

「咁…今日都差不多啦，我真係好開心呀，多謝你呀！」水原禮貌地握一握我隻手，稱心滿意咁同我道別，但我就呆滯咁望住水原嘅背影漸漸離去，同埋呢一刻我嘅心情係有啲複雜。