(輕鬆 | 校園) 只有一年回憶嘅高中生涯: 3章 - 終於到手嘅無盡假期
如果讀者喜歡此故事，希望你能正評+留言，或到penana點「喜歡」，謝謝你的支持！
https://www.penana.com/story/90093/輕鬆-校園-只有一年回憶嘅高中生涯
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
3章 - 終於到手嘅無盡假期
嚟到老同學──光秀屋企，主人家應門，佢一開門就潤人。睇住個男人名就以為係男人？鄭家純、李彩華呢啲名都好女人吖，你諗到邊個？
「平時呢個時間你起咗身未？」
「梗係未喇，我日不上三竿不起床呀，爽手開門啦！」
「係嘅！」光秀向我salute。「難得輝記早起身，我要快啲開門！」
咔啦啦啦啦啦───
「終於可以除口罩。」入咗門口，我即刻洗手除罩。「其實到今日都未慣。」
「成兩年喇，仲未慣。」另一個朋友，皮蛋講。
我︰「行多兩步路都覺得焗，勁辛苦。」
皮蛋︰「開頭真係唔慣嘅，成兩年，乜都慣喇。」
「其實我最唔慣係冇得番學。」今日最後一位書友，麗連食住百力滋講。「明明呢個時候最應該搵搣時阿sir教架嘛，而家又唔俾番學，乜都要自己諗，每日得下晝嗰兩個鐘有Google meet俾同學問嘢，夠鬼咩；對住部電腦問，邊有心機呀？Mewe，Facebook，IG一有嘢睇，個心唔知去咗邊。」
皮蛋︰「熄電腦咪有心機囉。」
「熄電腦點問呢？」
「…」皮蛋俾人收咗皮。
書鉻︰「阿皮蛋，你係咪食得多蛋膽固醇塞腦呢？不如食豬腦啦，以形補形。」
皮蛋俾人一句KO，又俾書鉻補多一腳，即刻面紅耳赤。
「同你哋班撚樣講︰我叫Peter，唔係咩皮蛋呀！」
聽完皮蛋條友九唔搭八，溫書枱傳嚟零聲笑聲。
咁先係中學架嘛，但係上一次咁樣有講有笑，竟然唔係琴日或者上星期五，而係好幾個星期前嘅溫書會。唉…我發現高中生涯，冇乜同同學Hea埋一齊嘅時間。如果唔係我哋五條友由中一就識，我諗都冇咩可能有知心朋友。有冇諗過︰插班，或者年年都調一次班嘅學生，今年畢業嘅時候有冇朋友寫紀念冊？
或者可以先問︰今年香港學生仲有冇機會寫紀念冊？
唉…點解中學生涯變成咁？
「屌你哋，趁啱啱瞓醒有精神，爽手做多幾題past paper啦！」
最正經嘅光秀一句喝令，我哋乖乖埋枱做嘢。
…
…
…
鈴鈴──
較好咗嘅做卷鬧鐘響起，五條友不斷發出疲倦嘅嘆息。
書鉻︰「正午時間，叫嘢食先。食乜撚嘢好？」
我︰「咪又係外賣，唔通而家有堂食咩？」
書鉻︰「有吖，落唔落去吖？」
我︰「肺炎咁勁，廢事，外賣算啦。」
而家出街食個飯都要左諗右諗，唔係諗食乜呀，係怕中病毒呀！萬一中咗，唔洗考試啦！
麗連︰「銘哥，靠你落柯打啦！」
「好嘅，我幫你叫雞子。」
麗連掘咗書鉻一眼，一男一女打情罵俏咁樣。
「大鑊喇，好多唔識呀…」皮蛋趴喺枱上面呻吟。
麗連︰「我都係呀，點考DSE呀？我唔想retake呀！」
「邊度吖？睇過？」成績最好嘅光秀自薦小老師，湊個頭埋去。
麗連︰「成頁唔知點填，搞唔掂呀！」
「我真係好想番學校，有個老師督促吓、鬧吓自己、我駁完嘴又教番我，你話幾好。」皮蛋望住半空，幻想緊有老師喺身邊係幾咁幸福嘅事。「而家每日做乜都係靠自己，都唔係考讀書能力嘅！」
「唔考讀書能力？你唔好讀吖！」我揭咗頁書講。
麗連︰「係考自學能力呀！而家度度都閂尻晒，搵邊個教呀？」
我︰「食自己囉，咪又係咁讀。」
「個個都係光秀嗰啲人咩？自學一啲都唔易囉唔該。」皮蛋塊面黑咗一下。「輝記你識咩？求先份卷你識做吖？」
皮蛋一手搶咗我份卷，揭咗兩頁，笑淫淫咁嘅嘴望住我。
「你個死基佬，對住我笑做乜撚！」
「你咪又係唔識，收皮啦！求先叫我『食自己』仲以為你好掂。屌，嘴炮。」皮蛋將份卷打落枱面講。
我︰「唔識就唔識架啦。」
「咁又係，輝記一直都係咁嘅成績，佢嚟讀書會已經好難得。」光秀同佢哋一齊笑我。
我︰「喺屋企溫唔入腦呀，喺學校仲好啲啲。」
「咪就係咁囉。永遠留喺屋企，圖書館、自修室、學校，乜春都閂晒，對住部電腦同四面牆，要溫書又冇得落街，鬼有心機溫咩？」麗連四圍望光秀屋企。「咁舒服，又有床，又有電視電腦，電話一響，個心唔知去咗邊；仲要得自己一個喺屋企，做乜都得啦。」
「你諗咩吖？」聽到麗連有弦外之音，光秀好似想澄清。
「你話呢？一個女仔，日日喺屋企，叫邊───個男仔上嚟都冇人知啦，你哋話係咪？」
皮蛋同我都點頭。
有位做你，你仲唔死？呢啲位真係女人問女人先有戲睇！
麗連︰「咁有冇啫？」
光秀︰「咩有冇呀？唔明喎。」
麗連︰「仲扮，有冇男仔上過嚟吖？」
「你仲問！」光秀作勢想打人。
「即係有啦！估唔到光秀都係咁嘅人。」麗連揞住半邊嘴大聲講，成條死八婆咁。「我成日聽︰網課啲學生有時間就一男一女入房，原來身邊已經有一個咁嘅人。」
呵呵…光秀表面斯文，內裡open，原來係「Semen人」！
「鬼有咩！你個『麗Lin』收爹！」
呢個稱呼麗連最憎，佢都唔明父母點解幫佢改個咁嘅名。
「屌你，又咁叫我！」麗連行埋去揞住光秀把口。
「麗Lin麗Lin！」光秀死命咁擰頭避開麗連隻手。
「講！個男仔邊個嚟！」麗連拎起支筆威嚇光秀。
呢個我都想知喎。
我︰「我哋識架？」
光秀︰「男人收爹！女人講嘢，男人聽嘢！」
嘩，惡撚到呢。
光秀︰「我邊有呀，你個麗Lin唔好亂講好唔好？陣間傳咗出去我點算？」
你咪跳落黃河囉，網課時期玩孤男寡女共處一室，一早出晒名啦。
「我今日要搵到入光秀房嘅男人嘅線索！」麗連跑咗入去光秀間房。
「喂！」
光秀追咗入去，兩個女仔喺間房入面，真係有啲唔恰當嘅幻想。
「喂吖！你上我張床做乜呀！」隔住面牆，光秀好唔滿意咁大叫。
「怕咩啫，我都成日上架啦！你咪又係成日上我屋企張床！」
兩個女仔，成日上對方張床…
「喂！唔好摷呀！裡面…」
裡面…？裡面有咩？
我慢慢行埋去房門嘅時候，打咗好耐電話嘅書銘終於番嚟。
書銘︰「光秀呢？」
「同麗連喺床上面玩。」我指住房門講。
書銘︰「玩？玩咩玩到上床吖？」
我都想知吖，正想去睇。
「喂，光秀，你呢度早幾日強制檢測過咩？」書銘敲門問。
「咩呀？」只係打開一條小門罅，光秀衣衫不整，個頭又亂晒咁探頭。
「啲外賣佬話呢度強制檢測過，唔送呢度喎。」
嘩屌，呢度封過樓？！
「晨早解咗封叫佢收皮啦！叫佢送落樓下！」
呯！
閂埋門，光秀又同麗連喺床上面「玩」，玩到兩個人喘晒氣。
原來網課期間係玩呢啲，第一次見。
我望住皮蛋，兩個不知所措嘅臉孔終於搵到知音。
「點睇？」好似惺惺相惜，我主動問。
「我…」皮蛋抖咗一大啖氣。「好想入去join！」
「皮蛋…」我都抖咗一大啖氣。「不如你照吓鏡先啦。」