［愛情純愛］我地之間嘅友誼純度絕對等於零！！！: 148. 約定〈完〉

「做咩突然咁問⋯？」邱旻顥輕皺起眉頭，佢好奇李逸彤忽然咁問嘅原因

「想知道下，我地會唔會一直一齊？」李逸彤嘅臉上掛上淡淡嘅笑容，大概係因為佢未瞓醒，「你會唔會唔要我？」

「唔⋯」邱旻顥認真地沉思，佢唔想隨便咁拋出一個答案比李逸彤，「我唔敢講會唔會一直一齊，但我覺得我地可以一直一齊。」

「咁你會唔會唔要我？」李逸彤又追問

「你個腦到底諗緊啲咩⋯」邱旻顥係言地笑，伸手喺李逸彤嘅額上不輕不重地拍咗一下，「成日諗埋啲咩⋯」





「我都係問下咋嘛⋯」李逸彤行咗兩步到平地，當邱旻顥從電梯嘅梯級踏上到平地嘅時候，李逸彤雙手拉住邱旻顥嘅手一臉委屈地道，「以防萬一。」

「唔會唔要嘅～」邱旻顥抽手，當手心掂到李逸彤嘅手時，邱旻顥便順手地拖住李逸彤，「追得咁辛苦，點可以咁輕易話唔要？」

「你有追咩？」李逸彤聽到後連忙認真地望住邱旻顥，質疑邱旻顥啱啱講嘅嘢

「咁⋯」邱旻顥冇諗到李逸彤會反問佢，不禁窒咗一窒，腦袋稍微運算，「連氹帶騙⋯？」

「渣男？」李逸彤頓時笑起嚟，「周圍溝女嗰種？」





「我都唔渣。」邱旻顥搖搖頭

「都係～」李逸彤望住邱旻顥笑一笑，邱旻顥當然唔係渣男

邱旻顥對李逸彤嘅唔一樣，李逸彤都可以感受到，女仔要嘅安全感就係咁簡單，就係「你可以對其他人好，但對我嘅好係無人能及嘅好」

李逸彤一個高興就挽住邱旻顥嘅手臂，佢好中意佢，發自內心嗰種

「算你啦～」李逸彤甜甜地道，「唔可以唔要我⋯」





「唔會。」邱旻顥一個肯定嘅回答，係比李逸彤最大嘅安全感，「你唔要我又另計。」

李逸彤沉默不語，定睛地望住邱旻顥，邱旻顥亦望向李逸彤回應佢嘅視線

李逸彤停低落嚟，喺行入屋企大堂前攬住邱旻顥，令人安心嘅人加上令人安心嘅氣味⋯李逸彤嘅心卻特別激動一樣，心跳加速

「邱旻顥⋯」李逸彤嘅聲線變得有啲嗲有啲軟綿綿，「雖然啱啱一齊，但我希望我地可以一齊好耐好耐⋯」

就算平靜，李逸彤都唔介意，本來佢就唔係中意大風大浪嘅人，只要邱旻顥喺佢身邊就足夠

「雖然我地仲係好細⋯」李逸彤講嘅時候，邱旻顥嘅雙手回擁李逸彤，「但希望我地可以一齊好耐⋯好唔好呀？」

「好。」邱旻顥比李逸彤嘅回答，永遠都係堅定不移

「咁就咁決定㗎啦⋯！」李逸彤喺聽到邱旻顥啲答案後頓時鬆開手，提起右手伸出尾指，「我地講過要算數㗎～」





「知道，就咁決定！」邱旻顥伸出尾指同李逸彤勾手指尾

喺最美好嘅年華，遇到令自己心動、願意一齊行落去嘅人，雖然聽起嚟似係未見識過世界之大嘅想法，但至少搵到一個願意同自己一齊邁步嘅人，有一個人永遠喺背後支持自己

「咁⋯你講過要算數㗎⋯！」李逸彤鬆開手，指腹輕戳邱旻顥嘅臉頰一下

「我不嬲都講過會算數。」邱旻顥露出笑容，李逸彤仲有好多可愛嘅嘢等佢地搵

邱旻顥捉住李逸彤嘅手垂低，自然地拖住李逸彤就行；邱旻顥回頭望李逸彤一眼，李逸彤嘅另一隻手整理緊校裙

「一直咁樣落去就好⋯」邱旻顥收回視線望向前方時喺心裏道

⋯





⋯

⋯

春季離去，夏季來臨，代表今年嘅學年都已經到尾聲

喺散學禮之後，班主任企喺老師枱前為今個學年做總結，再勉勵大家一齊努力讀書

「咁樣就到中五嘅尾聲⋯」李逸彤慨嘆一句，時間好似過得好快一樣，一眨眼就到咗中五完結嘅時候，「中六要嚟啦⋯」

李逸彤朝住沈心怡嘅方向望，兩個少女默契地對上視線，沈心怡溫柔一笑，李逸彤偷偷提手比個Yeah

「笑咩呀？」潘景諭眼尾瞄到沈心怡望向佢呢邊笑，望過去就發現沈心怡唔係望緊佢

「冇呀～」沈心怡細聲地講道





「叮噹叮噹⋯叮噹叮噹～」

落堂嘅鐘聲響起，中五嘅生涯完滿地結束，隨住暑假嘅來臨，最後一年嘅中學生活亦隨之而來

「心怡！」李逸彤連忙行到去沈心怡嘅身旁，「我地嘅傳統照舊～」

「好呀～」沈心怡同李逸彤孭起書包

「咩傳統？」聽到佢地對話嘅潘景諭好奇地問

「每年嘅散學禮，我地都會一齊影張相，每年都影。」沈心怡對潘景諭解釋道

「我又影！」潘景諭自告奮勇地提出





「等我地影完先啦～」李逸彤講道，「比你地跟埋一齊嚟天台啦～」

李逸彤同沈心怡孭住書包就朝天台出發，潘景諭同邱旻顥喺位對望一眼後，默默地孭起書包跟上去

「呢度呢度⋯！」沈心怡將李逸彤嘅手機橫放喺扶手上

「埋啲埋啲！」李逸彤將沈心怡朝自己嘅方向拉咗兩下

兩個男仔推開天台門嘅時候，兩個女仔已經喺度睇緊相

「影完啦你兩個？」邱旻顥難以置信地望向兩人，「咁仲叫我地上嚟做咩⋯」

「叫你地上嚟梗係有好嘢啦～」李逸彤一蹦一跳行到邱旻顥面前，「今年開始，點可以得我同心怡影呢？要加人啦～」

李逸彤將手機放番喺扶手欄杆上靠着牆，set咗計時影相

「阿諭！」沈心怡對潘景諭招手叫佢過嚟，潘景諭即刻行動走向沈心怡

「你set咗10秒呀？」沈心怡一臉愕然地望住由10開始倒數嘅計時器，「要計10秒咁耐！？」

「差唔多啦差唔多啦！」李逸彤朝沈心怡同邱旻顥中間嘅位置小跑過去，「準備啦～」

邱旻顥嘅右手放鬆地搭喺李逸彤嘅膊頭上，伸出食指戳住李逸彤嘅臉頰；李逸彤嘅右手抵喺下巴比Yeah，左手悄然地扣住邱旻顥嘅手

「邱旻顥⋯！」李逸彤輕聲地叫邱旻顥一聲，邱旻顥微微側一側頭同李逸彤對望，「希望同你友誼永固！」

「太遲啦李逸彤⋯」邱旻顥沒好氣地望住李逸彤呢個「調皮鬼」，「宜家冇友誼永固啦⋯！」

潘景諭一手攬過沈心怡嘅膊頭，同沈心怡對望一眼後相視而笑；沈心怡幾乎成個人都貼住潘景諭企，佢嘅雙手溫柔地搭喺潘景諭喺佢鎖骨前攬住佢膊頭嘅手上

「笑咩？」潘景諭見沈心怡忽然偷笑便刻不容緩地問，「望完我偷笑啲咩？」

「冇咩呀～望你唔好咩？」沈心怡溫柔嘅笑容再配上柔和嘅聲線，潘景諭心都要融化

「好，望住我最好⋯」潘景諭頓時點頭，然後低頭喺沈心怡嘅耳邊細聲道：「一世都望住我會更好。」

「唔⋯」沈心怡有啲遲疑，冇即刻回答，喺思考咗一秒後，望住鏡頭嘅沈心怡微笑着回答道：「好呀～你都要。」

手機嘅螢幕喺倒數到最後三秒嘅時候慢慢變暗，螢幕閃一下後李逸彤小跑到扶手前將手機拎起，同沈心怡一齊睇相

李逸彤同沈心怡睇完張相後抬頭對望，不約而同地笑起嚟，然後望向企喺原位等緊佢地嘅邱旻顥同潘景諭

「希望以後嘅每一年，都可以係咁樣一齊影張相～」

喺青蔥歲月裏做盡青春嘅事，喺17歲嘅四季裏搵到未來想一齊過四季嘅人⋯



<全文完>


///
兩種愛情，兩種感覺
兩對小情侶嘅故事就到呢度啦～
多謝您一直以嚟嘅努力追故同支持！
歡迎IG DM comment比我/下方留言

希望中意我嘅小說嘅您會繼續支持我！
想知道幾時出新故？
記得Follow我嘅IG喔～（Link在下方）


IG Link: https://www.instagram.com/nd_cotttoncandy/?hl=zh-tw