［愛情純愛］我地之間嘅友誼純度絕對等於零！！！: 139. 訂金
「嗯？」沈心怡眨一眨眼，輕輕抿唇，心跳有啲快，佢默默期待嘅事，都係發生了，「做咩⋯？」
「冇⋯」潘景諭卻冇辦法將佢嘅心聲講出口
「唔⋯真係冇？」沈心怡下意識追問潘景諭
潘景諭有啲愕然，佢以為沈心怡會同佢講拜拜，然後就直接轉身走，冇諗到沈心怡會追問佢
「唔⋯」潘景諭有啲猶疑，始終覺得問咗出口之後，會令沈心怡覺得自己逼佢比一個回答，「冇⋯」
「如果冇嘅話⋯」沈心怡以小跳步行到潘景諭嘅面前，上身微微前傾，「咁我真係番去⋯？」
潘景諭嘅心跳速度直線上升，佢察覺到沈心怡似乎係故意；潘景諭同沈心怡對上視線，因為背後嘅街燈，令沈心怡嘅雙眼裏有一點亮光
「你係唔係特登⋯」潘景諭無奈一笑
「咩特登？」沈心怡不解地側一側頭，然後又自己回答：「冇特登⋯」
「真係冇？」潘景諭提手輕輕地抬起沈心怡嘅下巴，微微低頭柔聲問道
潘景諭下意識嘅湊近，沈心怡冇躲避，佢唔介意潘景諭呢種主動⋯沈心怡嘅心跳喺潘景諭低頭湊近嘅時候，瞬間漏一拍⋯
沈心怡忽然帶着微微嘅躍動踮起腳尖，兩個人之間嘅距離即刻拉近；潘景諭嘅雙眼稍微瞪大，心臟用力一縮，但雙腳插喺原地一樣，一步都冇後退
「都太⋯主動啦⋯！」潘景諭喺心入面嗌救命
同沈心怡對視嘅時候，潘景諭默默地吞一啖口水，呼吸喺佢唔察覺嘅時候變得淺促
「你想點⋯」潘景諭壓抑着心入面嘅衝動，保持理性在線，「你係真係特登⋯」
「我冇呀，真係冇特登⋯」沈心怡柔和嘅聲線卻特別可以觸動心弦
「你⋯係唔係中意我⋯？」潘景諭到最後，都係壓抑唔住對呢個問題嘅好奇，始終都係問咗出口
沈心怡欲言又止，佢猶疑係唔係應該講比潘景諭知佢真正嘅想法；但佢知道，總有一日，佢都係要比一個答案潘景諭，佢唔可以一直好似吊住潘景諭一樣
「我⋯」沈心怡諗緊要點回答先係最好，佢心入面想迴避呢個問題，但佢唔想見到潘景諭失望嘅表情
「你唔想答我都唔緊要。」潘糟諭見沈心怡欲言又止嘅時候，連忙解釋，「我好過分係唔係⋯又話唔逼你，但成日都問住咁⋯」
沈心怡見潘景諭有啲自責，佢嘅心入面都有種難以言喻嘅感覺
「唔係，阿諭你冇好過分。」沈心怡認真地對潘景諭講道，「我冇咁諗。」
本來沈心怡一直都唔敢肯定潘景諭對佢嘅中意係一時衝動定係真心實意，但潘景諭最近嘅表現都話佢知，潘景諭對佢嘅中意係認真且強烈
「回覆我一定會比你⋯」沈心怡輕抿一下唇後講道，聲線裏係羞澀嘅感覺，「只係仲要多少少時間⋯」
「有冇得落咗訂金先？」潘景諭忽然輕輕一笑，彷彿開玩笑一樣對沈心怡講道，「免得你走數唔比一個回答我⋯」
沈心怡稍微思考咗一下，又一次輕輕抿一下唇，抬眼望一望潘景諭，雙手搭喺潘景諭嘅膊頭上，然後踮起腳尖將兩人間嘅距離拉近後，喺潘景諭嘅臉頰上落下一個蜻蜓點水般嘅溫柔嘅吻
潘景諭有啲搞唔清狀況，啱啱沈心怡⋯係錫咗自己⋯？
「訂金比你啦⋯」沈心怡臉頰泛起紅霞，以羞澀嘅聲線講道
潘景諭愣住了，心跳好似停頓咗一下，然後用力收縮一下後先再繼續跳動
「我番去啦，星期一見⋯」沈心怡連忙向後行咗兩步，朝潘景諭揮揮手
「星期一見⋯」潘景諭仍然有啲未回神，但都係點一點頭
喺沈心怡行入大堂，見唔到潘景諭嘅身影後，潘景諭提手，指尖輕輕地碰啱啱沈心怡嘅吻嘅位置
「完全唔係心怡平時會做嘅嘢⋯」潘景諭耷低頭掩飾自己紅透嘅臉頰，感覺頭頂都已經害羞到出緊煙，「比佢⋯剎咗一個措手不及⋯！」
⋯
「你都錫咗佢啦⋯！點解仲唔比答覆佢呀⋯！？」李逸彤除咗不解，更多嘅係震驚，隨即又細聲地道：「心怡你仲勇敢過我⋯！我都係一齊咗先敢真係錫邱旻顥⋯」
「只係衝動啦⋯！」沈心怡伏喺枱上，聽佢把聲都知佢一定係面都紅晒
「完全唔似係你會做得出嘅嘢⋯」李逸彤對沈心怡講道，畢竟佢認識嘅沈心怡唔似啲咁主動嘅人，更加唔好講佢嗰日做嘅嘢
「我都覺得係⋯」沈心怡無奈地點頭
「你打算幾時比答覆佢？」李逸彤好奇地問，佢嘅好奇心真係一發不可收拾，「你連錫都錫咗佢啦⋯其實同答咗佢都差唔多⋯」
「其實本來⋯我仲有啲猶疑阿諭佢到底有幾中意我⋯」沈心怡微微抬頭，只係露出雙眼，「但嗰日同佢出完去之後⋯」
沈心怡嘅腦海中，全都係嗰日同潘景諭一齊時潘景諭嘅表情同反應，每一個表情，沈心怡都記得好清楚
「我只係想確定咗阿諭有幾中意我之後先答佢⋯」沈心怡又將頭埋喺雙臂中
「確定咗啦宜家～」李逸彤笑道，「你都將你感覺到嘅嘢化為行動啦～」
潘景諭呢個時候孭住書包行入課室，今朝頭兩堂都缺席，面向前面坐嘅沈心怡一眼就望到潘景諭，下意識立即低頭
「佢番嚟啦～」李逸彤回頭望向課室門口，細聲地沈心怡講道
「早晨。」潘景諭同平時一樣打招呼
「早晨～」「早晨⋯」
沈心怡望潘景諭一眼後又即刻將視線移開，潘景諭同沈心怡之間又默默地散發着尷尬嘅氣氛
IG Link: https://www.instagram.com/nd_cotttoncandy/?hl=zh-tw