［愛情純愛］我地之間嘅友誼純度絕對等於零！！！: 137. 醉了
「懷疑呢～」李逸彤瞇起眼望住邱旻顥，「你根本就係想讚自己⋯」
「你眼光唔好咩？」邱旻顥鬆開拖住李逸彤嘅手，溫柔地捏住李逸彤嘅臉頰，「我就覺得自己眼光好好啦～」
李逸彤笑而不語，定睛地望住邱旻顥，只要邱旻顥喺佢身邊，佢嘅雙眼中就只有邱旻顥一人⋯
「邱旻顥⋯」李逸彤柔聲地叫着邱旻顥嘅名字，邱旻顥嘅目光從貨架上嘅薯片移到去李逸彤嘅臉上，「識到你真係好⋯」
李逸彤真誠嘅笑容，只係六個字，足以表達佢對邱旻顥嘅心、識到邱旻顥嘅感恩
「我地本來就識，應該係⋯」邱旻顥垂眸望向自己拖住李逸彤嘅手，「可以了解你，真係好。」
兩人對望着，彼此都知道喺彼此心中只有對方；搵到一個滿心只有自己，只望住自己嘅人就會發現，幸福，總係生生不息
⋯
潘景諭同沈心怡經過戲院，沈心怡下意識望住喺戲院門口嘅海報
「想睇戲？」潘景諭留意到沈心怡嘅目光所在，心裏突然有啲緊張：「我冇帶外套⋯」
「唔⋯」沈心怡猶疑起嚟，佢望一望海報，其實最近冇一套戲係佢想睇，「一般⋯冇特別想睇嘅戲⋯」
「你有冇想去邊度？」潘景諭先問沈心怡嘅想法
「冇咩想法⋯」沈心怡輕輕抿唇，微微搖頭
其實今日答應同潘景諭出嚟，沈心怡都係想比個機會自己主動
「阿諭對我其實已經好主動⋯」沈心怡喺心中默默地道，「如果今日我咩都唔表現，咁好似好浪費今日⋯阿諭會唔會失望⋯？」
沈心怡悄悄地抬頭望向潘景諭，潘景諭嘅主動的確打動到佢⋯
「我應該⋯要主動少少先係⋯」沈心怡企喺原地望住電影嘅海報，然後又望向已經比邁步行咗兩步嘅潘景諭，「阿諭⋯！」
沈心怡伸手拉住潘景諭嘅手肘，潘景諭回頭望向沈心怡，然後行番去沈心怡嘅身旁
「我地，都係去睇場戲啦～」沈心怡對潘景諭微微一笑，「你有冇想睇嘅戲呀？」
「冇⋯但如果你有想睇嘅戲，我可以同你睇⋯」潘景諭面對沈心怡嘅微笑，心瞬間就淪陷，耳仔都紅咗一半，只好將視線稍微移開
「睇呢套好唔好呀？我有睇過佢嘅預告片⋯」沈心怡指住其中一張海報道
「好呀⋯」潘景諭嘅定睛望住沈心怡，佢嘅雙眼都要閃出光一樣，基本上沈心怡話咩就咩
「定係睇另外呢套好？」沈心怡又指住另一張海報
「好呀。」潘景諭望住一臉認真咁思考嘅沈心怡，不禁一笑
「定嗰套呀？」沈心怡又指向另一齣電影，心大心細
「都得。」潘景諭用輕鬆嘅語氣回答
「唔⋯」沈心怡察覺到潘景諭點都答Okay，沈心怡故意試探肯定自己嘅想法，「睇愛情片好唔好？定睇恐怖片？驚慄片？科幻片？睇咩好？」
「你想睇咩就睇咩。」潘景諭低頭一笑，順手地伸手摸一摸沈心怡嘅頭，「你唔係話冇想睇嘅戲咩？做咩突然又想睇戲啦？」
「因為⋯」本來同潘景諭對望着沈心怡，喺潘景諭問呢個問題時，沈心怡悄然垂眸，猶疑緊講唔講出口，「唔⋯」
「嗯？」潘景諭好奇地望住沈心怡，期待沈心怡嘅回答
「因為⋯想同你一齊睇場戲⋯」沈心怡嘅雙手放喺身前輕輕扣着食指，沈心怡帶着泛起淡淡紅霞嘅臉頰抬頭以柔和嘅目光望向潘景諭
潘景諭嘅心喺沈心怡呢句說話講出嚟嘅時候，即刻有一種心臟比人用力咁捏實一樣，什至不自覺地閉着氣
「哈⋯」潘景諭喺閉着氣三秒後，終於回過神一樣笑起嚟，然後用一個就嚟要心醉嘅語氣問：「真係？」
「嗯⋯」沈心怡同潘景諭對上視線嘅時候，羞澀嘅感覺忽然湧上心頭，沈心怡又將視線移開
「好呀～」潘景諭由心醉嘅笑容，一下子換成爽朗嘅笑容
「咁⋯我地睇呢套⋯？」沈心怡指住愛情片嘅海報講道
「我去買飛，你喺度等我。」潘景諭轉身就朝住售票處行去
沈心怡拎起手機，偷偷地將企喺售票處前嘅潘景諭嘅背影影低，將呢一刻令佢心動嘅事記錄喺相片中
⋯
李逸彤拖住邱旻顥嘅手，佢微微側着頭定睛望住邱旻顥，幸福嚟得好突然，突然到⋯佢都未準備好，幸福就已經到佢面前
今日嘅天空好清，黃昏時分嘅金光閃閃打喺城市嘅每一個角落
「同邱旻顥一齊真係好⋯」李逸彤望住地上兩個拉長嘅影子，喺心裏默默地訴說着佢嘅心聲，「好中意佢⋯好想，一直同佢一齊⋯」
企喺陽光正照着嘅位置，李逸彤朝太陽嘅方向望一眼後頓時瞇起雙眼耷低頭
邱旻顥嘅目光落喺李逸彤臉上，金黃色嘅陽光照喺李逸彤嘅臉上，有種李逸彤閃閃發光嘅感覺；邱旻顥好似下意識嘅舉動一樣提起手，將手放喺李逸彤眉上，為佢擋住陽光
「等一陣就唔曬啦⋯」邱旻顥對李逸彤講道
「嗯⋯」李逸彤望住邱旻顥嘅眼神裏放着滿滿嘅愛意
刻喺骨子裏嘅體貼，係最吸引李逸彤嘅原因⋯唔需要解釋、唔需要刻意，所有嘅體貼都係邱旻顥嘅習慣一樣
「你覺唔覺得曬？」李逸彤嘅臉頰靠喺邱旻顥嘅膊頭，邱旻顥嘅手隨住李逸彤嘅郁動而郁
「少少啦。」邱旻顥笑一笑，然後鬆開拖住李逸彤嘅手，左手繞過李逸彤嘅後背，手臂搭喺李逸彤嘅膊頭上，手又放番喺李逸彤嘅眉上，「曬唔曬到？」
IG Link: https://www.instagram.com/nd_cotttoncandy/?hl=zh-tw