［愛情純愛］我地之間嘅友誼純度絕對等於零！！！: 126. 稱呼
雖然感覺上嚟講，佢地一齊係一個公開嘅秘密，但之前佢地冇確認呢段關係，咁宜家係唔係應該公開？定有人問先算？
「就算公開，都好似只係同大家確認我地係一齊咗⋯」邱旻顥心裏道，「大家都只會覺得係事實⋯」
「搞掂啦，行得！」李逸彤帶着小跳步行到邱旻顥嘅面前，「宜家去邊？我未係好餓其實⋯」
「行下先囉，陣間再去食嘢。」邱旻顥好快就伸手拖住李逸彤，好似拖緊一秒，李逸彤都會走咗去咁
「好呀～」李逸彤點點頭
「如果撞到熟人，可能係班上面嘅人，咁⋯點？」邱旻顥婉轉地問出自己想問嘅嘢
「冇點呀，可以點？」李逸彤一臉天真地回答，然後晃一晃兩人拖到實嘅手，「就係咁呀～」
「Okay～」邱旻顥笑着點頭，對李逸彤嘅答案特別滿意同時覺得自己嘅擔心有啲多餘
「做咩呀？你打算喺見到熟人嘅時候即刻推開我呀？」李逸彤反問邱旻顥
「點會呢～」邱旻顥拉咗李逸彤一下，李逸彤緊貼喺邱旻顥嘅身旁
搭扶手電梯時，李逸彤企喺高啲嘅一級，佢同邱旻顥嘅視平線終於一樣
「睇下～我宜家同你差唔多高啦～」李逸彤用手比畫着
李逸彤直勾勾地望住邱旻顥，感覺今日邱旻顥特別好睇，可能係因為今日嘅邱旻顥已經係佢男朋友
一諗到呢度，李逸彤又忍唔住笑意笑起嚟
「你又笑啲咩？」邱旻顥見李逸彤笑，佢又忍唔住笑了笑
「冇咩～」李逸彤伸手，手心朝上放喺邱旻顥嘅下巴，輕輕地掐住邱旻顥嘅臉頰，「笑下唔得咩？」
「得～你中意笑咩就笑咩。」邱旻顥講道，佢眼尾瞄到差唔多到平地，便伸手輕輕地捉住李逸彤嘅手腕
喺兩個人手拖手周圍閒逛嘅時候，兩人喺一面鏡前經過，李逸彤同平時一樣影張相po喺IG story
「打咩caption好？」李逸彤細聲地自言自語道，然後打咗兩個字又刪，打咗兩個字又刪
李逸彤心思思想公開，但又唔想咁高調，同時又諗唔到點樣低調啲咁公開
喺李逸彤苦惱緊嘅時候，邱旻顥企近李逸彤，手都已經貼住李逸彤嘅手，邱旻顥自然地拎出手機影咗張冇影到樣嘅相，tag咗李逸彤就po出去
過咗幾秒後，李逸彤就收到IG嘅通知提示
「睇下你po咗啲咩先！」李逸彤save咗張相，選擇先去睇邱旻顥嘅story，「你咩都冇打嘅～」
「呢啲叫明顯得嚟又唔太明顯，唔太明顯得嚟又有啲明顯。」邱旻顥講嘅嘢，聽起嚟就好似胡說八道一樣
李逸彤靈機一動，拎住手機用Boomerang影張相，喺㩒下白色嘅圓點時將手機左右晃咗兩下
「嘖嘖嘖⋯」李逸彤望住影出嚟嘅效果滿意地笑一笑，然後將手機遞比邱旻顥望一眼後先再po出去，「Okay～Let’s go～」
李逸彤拉住邱旻顥行，雖然好似同平時冇咩太大分別，可能因為一直都係咁樣嘅相處模式，但感覺同實際上嚟講就已經好唔一樣
「邱旻顥！」李逸彤用力地握邱旻顥嘅手一下 ，「你中意我點叫你？」
「點叫⋯？」邱旻顥有啲唔明李逸彤嘅意思，「咩點叫？」
「你想我叫你邱旻顥定旻⋯」「邱旻顥。」
李逸彤都未講完，邱旻顥已經急不及待做選擇，因為佢免得令自己毛管戙
「我都未講完⋯！」李逸彤見到邱旻顥嘅反應忍唔住笑起嚟，佢感覺到邱旻顥有一刻慌張咗，「你做咩咁緊張截住我？」
「我中意你叫我全名多啲⋯」邱旻顥望李逸彤一眼後講道，溫柔嘅聲線中夾雜着一絲羞澀，耳根微微泛紅
「真係？」李逸彤似乎唔太相信，半信半疑地側着頭望邱旻顥
「嗯，我冇講過比你聽咩？」邱旻顥認真地點頭，本來李逸彤仲懷疑緊係唔係真
「你幾時有講比我聽？」李逸彤扁起嘴，帶着少少不滿嘅語氣講道
「宜家講比你聽。」邱旻顥笑了笑，佢望向李逸彤嘅目光中，再容不下其他人
應該話，喺李逸彤出現之後，佢嘅眼裏再冇放過其他人⋯
⋯
食完晚飯之後，兩人行去搭車，啱啱到月台嘅時候，地鐵啱啱好駛到站
「有車！」李逸彤拉住邱旻顥跑起嚟
「佢啱啱先嚟到咋嘛～好趕咩？」邱旻顥跟喺李逸彤嘅身後上車
李逸彤自然地背靠着玻璃企，邱旻顥面向李逸彤企，兩人嘅手仍然拖住
喺列車開出嘅時候，邱旻顥自動地朝李逸彤走近一步，因為列車開出嘅時候會先微微向前傾，微微晃一下後先向前開
李逸彤嘅內心忽然有啲緊張，邱旻顥嘅目光喺上到車嘅下刻開始就一直停留喺李逸彤身上
「邱旻顥都企得太埋啦掛⋯！」李逸彤抬眼想偷偷地望邱旻顥一眼，但喺佢抬眼時卻已經邱旻顥對望，心裏有啲激動，佢同邱旻顥之間嘅距離，離得好近，「但呢個距離，係我一直想要嘅距離⋯」
邱旻顥嘅目光落喺微微垂着頭嘅李逸彤身上，佢騰空出嚟嘅右手一直有種蠢蠢欲動、想將李逸彤攬到懷中嘅感覺，但佢又唔敢真係伸手去攬
李逸彤望住兩人嘅鞋頭，企得埋係因為李逸彤雙腳間留咗一個鞋位比邱旻顥，令邱旻顥可以更靠近佢
邱旻顥嘅左手捉住扶手，手喺李逸彤嘅頭旁邊；邱旻顥嘅右手輕輕地握一下拳，佢果然，都係想攬李逸彤
IG Link: https://www.instagram.com/nd_cotttoncandy/?hl=zh-tw