［愛情純愛］我地之間嘅友誼純度絕對等於零！！！: 123. 不想分開
「做咩咁突然？我都比你嚇死⋯！」李逸彤將距離稍微拉開望住邱旻顥，但雙手仍然搭喺邱旻顥嘅膊頭上
「我好似⋯咩都未講喎～」邱旻顥笑道，「你會唔會有少少快？你連我要講咩都未知。」
「都係⋯！咳咳！」李逸彤覺得邱旻顥都講得啱，即刻就鬆咗手，一臉嚴肅地望住邱旻顥，「咁，你想講咩？」
「你⋯要唔要同我一齊？」邱旻顥不禁一窒，喺真係要認真開口問嘅時候，嗰種緊張係難以忽視
「唔要！」李逸彤一下子就將臉撇開，收起本來甜絲絲嘅笑容
「你食咗我粒糖仲想拒絕我？」邱旻顥伸手掐住李逸彤嘅兩邊臉頰，「你諗下好啦李逸彤！」
「邱旻顥！你睇你咁樣恰我！」李逸彤雙手捉住邱旻顥嘅手腕
邱旻顥鬆開托喺李逸彤下巴嘅手，順勢拖住李逸彤後再將手垂低
「邱旻顥，你要對我好㗎～」李逸彤內心激動，縱使好想將呢種感覺盡量地唔表現出嚟，但嘴角卻無法塌下，「對我唔好你就知！」
「呢個唔係必須㗎咩？」邱旻顥提起左手，只豎起尾指
「咁⋯好啦～」李逸彤笑起嚟時雙眼彎起嚟，甜到心深處嘅感覺毫無保留地展示出嚟
李逸彤伸出右手同邱旻顥勾手指尾，一種好似只係小朋友先會用嘅承諾方式，但卻係最真實嘅感受同行為
「咁聽日⋯算唔算係第一次真正嘅約會？」邱旻顥都有啲難以壓抑心中嘅激動，佢嘅手緊緊地拖住李逸彤嘅手
「算呀！」李逸彤笑道，手心傳嚟嘅溫度喺呢一刻開始變得好真實
李逸彤微微耷低頭望向自己同邱旻顥緊緊地拖住嘅手，感覺幸福嚟得好突然，佢冇諗過邱旻顥會揀呢一日同佢表白
「好想聽日快啲到。」邱旻顥先開口直白地講道
「我都好想！」李逸彤點點頭，心裏比起表面嘅激動更激動，大概已經諗緊聽日著咩衫好
邱旻顥陪李逸彤上到去32樓，當電梯門打開嘅時候，李逸彤唔太想鬆手，於是拉埋邱旻顥行出電梯
「我仲未想分開⋯」李逸彤喺心裏悶悶不樂地講道，悄悄地扁地嘴
邱旻顥對李逸彤嘅了解，大概係可以睇得明李逸彤嘅微表情；邱旻顥冇猶疑就將自己嘅左手向後同時將李逸彤朝自己拉，將李逸彤抱喺懷中
「我地聽日見啦～」邱旻顥柔聲地講道
李逸彤覺得耳仔嘅附近有啲麻嘅感覺，感覺⋯邱旻顥嘅聲線沉得恰到好處，李逸彤心中本來平靜嘅湖面泛起陣陣漣漪
「嗯⋯」雖然心有不捨，但李逸彤冇表露太多嘅依賴，只係點點頭
喺李逸彤番去之後，邱旻顥就番落去自己住嘅樓層，今日起佢就真係有女朋友啦！同李逸彤嘅關係亦唔再只係一個緋聞
「呼～」邱旻顥自己都鬆一口氣，雖然一開始就知道李逸彤唔會拒絕，但始終都會緊張
李逸彤將筒糖放到枱上，諗起自己宜家唔係單身，感覺同平時好唔一樣，好難形容宜家呢種開心，一切都好似有啲唔真實，但又的確係確實地發生了
「諗下聽日著咩衫先～」李逸彤打開衣櫃，望住一櫃嘅衫
⋯
李逸彤拎起放喺枱上透明收納盒中嘅香水，喺自己嘅手腕上噴一下，雙手嘅手腕輕輕地碰了碰，然後手腕又放到頸近下巴嘅兩側輕抹，最後再喺頭髮嘅髮尾離遠噴兩下
「搞掂～」李逸彤將香水嘅蓋蓋好，然後拎起掛喺門後嘅袋孭到膊頭上
今日係星期六，係同邱旻顥約好一齊出去嘅日子
每次見邱旻顥，李逸彤都會好好打扮一下，就算唔化妝，前一晚都會敷定面膜襯定衫，確保自己可以將最好嘅一面展示比邱旻顥睇
而今次，當然，亦唔例外，更加唔可以例外，因為今日係正式上第一次約會
當李逸彤推開大堂嘅大門行出去時，邱旻顥已經喺度等緊佢
「你咁快到咗嘅？」李逸彤小跑到邱旻顥嘅面前，當李逸彤跑起嚟、頭髮隨風飄逸時，香水嘅味道自然地散發着
「都唔係早你好多。」邱旻顥嘅臉上掛上柔和嘅笑容，「去食嘢先？」
「唔買戲飛先呀？」李逸彤疑惑地問道，平時兩人出去，通常都係先買戲飛然後再去食嘢
「買咗啦～」邱旻顥拎出銀包，從銀包中拎出兩張戲飛，「所以我地可以去咗食嘢先～」
「哦～你幾時去買㗎？琴日？」李逸彤笑問道，「你唔等埋我一齊去買嘅？」
「唔啱你心意？」邱旻顥將戲飛放番喺銀包中同時問李逸彤，其實佢都只係隨口講，佢知李逸彤大概中意睇咩類型嘅電影，「你唔想睇呢套？恐怖片。」
「我想睇！就係想睇呢套！」李逸彤莞爾，連忙搶答般講道，「你最醒啦～」
「又唔係第一次同你睇戲，唔多唔少都知嘅～」邱旻顥講道，然後由上而下將李逸彤打量一番後轉移話題，「今日睇戲你唔怕凍？著裙。」
「你冇帶外套？」李逸彤嘅第一個反應就透露佢依賴邱旻顥帶外套比佢，亦相信邱旻顥會帶外套
「有呀。」邱旻顥點一點頭，伸手到背後拍一下背囊
「咁咪得～」李逸彤對邱旻顥100%信任，佢嘅笑容令邱旻顥都自動地跟佢一齊笑起嚟
李逸彤輕輕拉住邱旻顥嘅手肘，邱旻顥默默地望李逸彤一眼，李逸彤只係笑而不語；邱旻顥鬆開手，主動地伸手拖李逸彤
「行啦～」邱旻顥拉住李逸彤就行，果然都係有啲緊張，心跳完全冇辦法平伏
李逸彤喺邱旻顥嘅身旁行過，香水嘅味道頓時飄過
「好啱你，呢隻香水。」邱旻顥突然直接地對李逸彤講道
IG Link: https://www.instagram.com/nd_cotttoncandy/?hl=zh-tw