［愛情純愛］我地之間嘅友誼純度絕對等於零！！！: 116. 憑什麼？

不過李逸彤都冇多問，雖然心入面覺得潘景諭今日嘅反常可能同琴日發生嘅事有啲關係，但李逸彤唔知琴日實際上發生咗咩事，呢個都只係佢嘅推測⋯

「呼⋯」沈心怡去完廁所，整番好校裙嘅裙擺，沖廁後行咗一少步到門前打算開門行出廁格

沈心怡聽到開門聲，然後聽到兩個女仔嘅談話

「講真呀，都唔知沈心怡點解可以同潘景諭咁熟，佢個人咁普通⋯！」喺外面洗緊手嘅一個女仔講道

沈心怡本來捉住門柄打算開門嘅手頓時停咗落嚟，佢不禁一怔，聽住外面嘅人講嘅嘢





「馨馨⋯？」沈心怡聽得出啱啱講嘢嘅係馨馨把聲

「佢同潘景諭唔係小學同學咩？」另一個女仔照着鏡梳頭髮，將頭髮札番好，「佢地好似係小學就識，仲係同一間小學升上嚟。」

「雖然佢唔似啲咁嘅人啦～不過有個靚仔嘅朋友，比我都會痴住喺佢身邊啦～」馨馨洗完手後，摸一摸自己嘅低馬尾，再整理一下瀏海

「哈哈！你唔好咁衰啦～」札好頭髮嘅女仔講道，「不過講真，我都覺得佢成日都喺潘景諭身邊，有時真係有啲睇佢唔順眼⋯雖然心怡係個大好人⋯」

「我都係咁覺得，但佢再好人又點？憑咩一直都喺潘景諭身邊？」馨馨一臉不屑地講道，聲線裏夾雜着濃濃嘅妒忌





「潘景諭唔係都幾受落咩？對佢。」女仔用髮圈將頭髮綁好成丸子頭，「佢又同李逸彤friend呢～」

沈心怡企喺廁格內，本來捉住門柄嘅手無力地垂下，佢明明想行出去要佢地收聲，但佢冇呢個勇氣行出去，只好一直留喺廁格內，聽住兩個女仔喺佢「面前」講佢嘅壞話

「明明我都冇做啲咩⋯」沈心怡默默地耷低頭，心底裏嘅自卑感緩緩地滲出嚟，

呢啲說話，全都係曾經聽過嘅說話，當初其他人講嘅呢啲煩似嘅說話⋯言猶在耳⋯

「喂喂，你話佢會唔會係借李逸彤過橋呀嗱？佢就好似電視劇入面嗰種⋯扮可愛扮清純嘅女仔一樣。」馨馨笑着好似開玩笑一樣講道，「李逸彤同邱旻顥有嘢個個都知，佢會唔會係會李逸彤同邱旻顥過橋⋯？」





聽到呢度沈心怡不禁紅了眼眶，佢心裏係滿滿嘅委屈，但又冇勇氣開門出去

沈心怡嘅心裏覺得委屈，佢提手再次捉住門柄想開門出去，但猶疑咗兩秒後，佢又默默地將手垂低，佢唔敢拉門行出去同兩個女仔當面對質

「都係嘅⋯嗰個係潘景諭，大家都中意佢係正常⋯」沈心怡喺心裏講道，「我只係個好普通嘅人⋯」

「吓？咁唔通人地又會覺得佢同潘景諭有嘢咩～」梳着丸子頭嘅女仔笑道，「佢就想呀～」

「佢好彩囉，一早識咗潘景諭～」馨馨擺出一到高傲嘅模樣聳聳肩講道，「如果唔係，佢連埋潘景諭身嘅機會都冇呀～」

已經喺女廁門口企咗一陣嘅李逸彤，終於聽唔落去，帶着怒氣一手推開女廁嘅門大步行入去

「講嘢真係難聽！中意潘景諭又唔敢追。」李逸彤瞪住佢地講道，然後望住兩個女仔冷笑一下，「不過又係嘅～追都冇咩用，潘景諭都唔會中意你地呢啲女仔。」

「你⋯！你講咩呀！」本來就係大小姐性格嘅馨馨頓時不忿地道，「關你咩事呀李逸彤？」





「話你地冇鬼用，自己接近唔到潘景諭就喺度講心怡壞話，明明連曲奇餅都唔敢自己送要心怡幫！」李逸彤望向馨馨不屑地笑了笑，仲要嘲諷佢一番，「好彩潘景諭冇收，食咗都唔知會唔會入醫院！」

「哼！我地先唔同你嘈呀！」馨馨帶頭行，梳着丸子頭嘅女仔連忙跟喺後面行出女廁

「冇膽鬼⋯！」李逸彤輕皺起眉頭，行到洗手盆前洗手

聽到女廁門閂上嘅聲音後，沈心怡緩緩地打開廁格嘅門行出嚟；李逸彤從鏡中望到眼眶紅紅嘅沈心怡從廁格裏行出嚟

「心怡⋯！」李逸彤一臉愕然，仲有少許嘅慌張，「你一直都喺度⋯？」

「嗯⋯」沈心怡緩緩地點頭，「一直都喺度聽住⋯」

「唔洗理佢地！佢地妒忌咋嘛！」李逸彤連忙安慰道，「我知道你唔係佢地講嘅咁樣！我又好、潘景諭又好、邱旻顥都好⋯！我地都知你唔係佢地講嘅咁樣！」





「嗯⋯我知道⋯」沈心怡微微一笑講道，看似咩事都冇一樣，但只有佢自己知道，佢正在苦笑着

李逸彤望住沈心怡嘅笑容，心入面就更擔心，就算一般人聽到是非都會唔開心，更何況係沈心怡親耳聽到？

「心怡⋯」「我冇事呀⋯」

喺李逸彤想開口講啲咩安慰時，沈心怡微笑起嚟搖搖頭，佢唔想表現到自己好似好脆弱一樣，只好努力地忍住眼淚

「唔好同佢地講⋯」沈心怡拉一拉李逸彤嘅手，「唔想佢地知⋯」

沈心怡其實只係唔想潘景諭知，但如果邱旻顥知道嘅話，邱旻顥可能會同潘景諭講，所以唯有連邱旻顥都唔知先係最好

「佢地知都唔會點㗎⋯」李逸彤縱使擔心，但都係有啲不解，「不過你唔想佢地知嘅話，我都唔會提嘅⋯」

馨馨啱啱講嘅嘢，就好似一條刺一樣卡喺沈心怡嘅心裏，馨馨明明之前就要自己幫佢，但係轉個頭又喺佢背後講佢





「唉⋯」沈心怡不禁嘆一口氣，內心係無盡嘅委屈感，「馨馨太過份⋯」

「你都知呀！咁啱啱就出嚟反擊佢嘛！」李逸彤替沈心怡覺得唔值，明明馨馨自己都冇膽搵潘景諭，但又要妒忌沈心怡

「算啦⋯唔想同佢嘈⋯」沈心怡苦笑道，又默默地輕嘆一口氣

「我地心怡靚過嗰個馨馨好多⋯！唔洗理佢講啲咩！」李逸彤攬住沈心怡，比一個鼓勵佢，「唔洗理佢講啲咩！潘景諭同邊個frd又唔關佢事⋯」

「嗯⋯」沈心怡微微點頭，儘管都係有啲在意同唔開心，「知啦⋯」

「洗個面番去啦～」李逸彤雙手搭住沈心怡嘅膊頭

李逸彤拉住沈心怡番課室，潘景諭抬頭望一眼課室門口後又默默地將視線移開，撥一撥頭髮做掩飾





沈心怡望一望李逸彤，李逸彤輕輕地拍一拍沈心怡嘅背，然後瞪咗馨馨一眼，沈心怡行番埋位，目光不自覺地朝潘景諭瞄一眼，但當潘景諭亦有同一舉動望向佢時，沈心怡以如雷不及貫耳嘅速度將視線移開、將頭微微耷低

潘景諭不禁眉頭一皺，佢討厭呢種感覺，呢種被沈心怡拒諸千里嘅感覺⋯




IG Link: https://www.instagram.com/nd_cotttoncandy/?hl=zh-tw