［愛情純愛］我地之間嘅友誼純度絕對等於零！！！: 114. 錯過
「你今日做咩咁奇怪？」邱旻顥以開玩笑般嘅語氣問李逸彤
「吓？我有咩？」李逸彤側着頭，拎起紙包飲品飲一啖
邱旻顥望住李逸彤，李逸彤望一眼邱旻顥後將視線移開，然後拎起三文治咬一啖
「可能琴晚胡思亂想太多啦～」李逸彤聳肩示意自己都唔清楚原因
「講嚟聽下，同你一齊解決下。」邱旻顥不自覺地柔聲道
「就係琴晚睇完嗰個po諗下咁囉～」李逸彤開口道，將琴晚自己嘅「心得」講出嚟，「諗諗下其實都幾有道理，但又覺得好可惜⋯你諗下呀～如果一齊咗先發現唔合適，咁咪好似浪費咗時間同青春咁？但如果合適但又冇一齊，咁咪錯過咗一個人？」
李逸彤一臉認真地講，但邱旻顥卻諗緊，到底李逸彤係唔想有另一層嘅意思想表達
「如果你中意嗰個人同你本來就唔係合適嘅，咁做咩要浪費時間中意佢？」李逸彤又認真地道，臉上掛上苦惱嘅表情，顯然佢都比自己嘅矛盾想法搞到唔知點一樣，「但如果唔去中意，你又點知係唔係真係唔啱？」
邱旻顥都有少少一頭霧水嘅感覺，但佢好留心咁聽李逸彤講；李逸彤邊講邊留意邱旻顥嘅表情，想從邱旻顥嘅表情知道佢嘅想法
「嗯⋯好複雜⋯」李逸彤見邱旻顥無咩表情變化，便微微點一點頭
「你就係諗呢個問題諗咗成晚？」邱旻顥不禁笑起嚟問道，好難想像李逸彤會因為呢個問題而苦惱到連機都唔覆，「自己苦惱成晚仲唔覆機？」
「真係好認真咁諗㗎！」李逸彤鼓起兩泡腮講道，耷低頭食一啖三文治後，又偷瞄邱旻顥一眼，「哼⋯你咪笑囉⋯！你成日都笑我㗎啦！」
「兩個人一齊本來就係要磨合，又冇人係天生合適；中意先會去了解，了解先知合唔合適。」邱旻顥臉上掛着淡淡嘅笑容，但佢嘅回答係認真嘅回答，「如果中意而且合適，但唔一齊，咁⋯某程度上都算係一種錯過。」
李逸彤輕輕抿唇，抬眼望邱旻顥，咬一喺三文治，飲一喺飲品
「點？我嘅解答你滿唔滿意？」邱旻顥托着下巴，直望住李逸彤問道
「唔⋯」李逸彤將口中嘅三文治吞咗之後緩緩地開口：「我唔知呀～我又冇中意人，邊有諗咁多⋯」
「你冇中意嘅人咩？」邱旻顥笑了笑又問李逸彤，佢聽得出李逸彤嘅刻意，但佢唔會即刻有啲咩舉動回答，「邊個自己諗咗成晚？」
「我沉思一下唔比咩？唔可以思考人生咩？」李逸彤覺得自己暗示得太明顯，即刻收回一樣解釋：「咁我宜家冇中意人，又唔代表以後冇⋯！」
「咁你有中意嘅人嘅時候，記得同我講喎！」邱旻顥半開玩笑地講道，「怕你錯過一個機會，幫你一把。」
「我又冇錯過啲咩⋯」李逸彤耷低頭食嘢，只係為咗掩蓋自己講呢句說話時所帶嚟嘅面紅
「咁暫時嚟講，都未嘅。」邱旻顥拎起紙包飲品，講完之後就托着腮望向操場嘅方向
一陣柔和嘅微風吹過，地上嘅葉片稍微翻滾兩圈落喺離原位不遠嘅地方，李逸彤嘅目光落喺葉上，邱旻顥啱啱嘅說話喺李逸彤嘅腦海中迴盪着
「成日都係講一半唔講一半⋯搞到我要估估下⋯」李逸彤喺心裹稍微抱怨一下，又忍唔住偷瞄邱旻顥一眼，「如果最後冇一齊，就真係算係錯過啦⋯」
邱旻題若無其事嘅外表下藏着一顆強烈跳動嘅心，如果李逸彤真係有中意嘅人，但嗰個人唔係自己嘅話，自己先唔會咁大方幫佢一把
「食完未？」邱旻顥問道
「食完，番上去啦～」李逸彤微微一笑，然後孭起書包、拎起枱上嘅垃圾
兩上踏上樓梯，旁邊一直有其他學生經過，李逸彤一步一步踏上梯級；每踏一步，兩人嘅膊頭會不經意地輕輕撞上，再踏一步，又會微微分開
「早晨～」一個同班嘅女同學從李逸彤嘅身旁經過時對李逸彤打招呼
「早晨！」李逸彤笑了笑回答
「哦～你兩個同平時一樣成日一齊呀～」女同學望到一齊番學嘅邱旻顥同李逸彤，便自然地攞佢地嚟開玩笑，「你地真係好感情啦～」
女同學對李逸彤笑着講完，便踏着輕快嘅步伐識趣地先行一步番課室，只要邊個企喺兩人隔離，都會自然而然地變成電燈膽一樣嘅存在
李逸彤望向邱旻顥，邱旻顥若無其事地繼續行，對於其他人嘅抽水都已經習以為常；李逸彤伸手輕輕地打咗邱旻顥嘅手臂一下
「呀⋯做咩打我呀？」邱旻顥頓時輕皺起眉頭，一臉疑惑地望住李逸彤
邱旻顥「還手」，細力咁喺李逸彤嘅手臂上捏咗一下
「呀⋯！」李逸彤即刻將手縮起兼向左邊行咗兩步，同邱旻顥拉開一少段距離，「痛呀⋯！」
「我好細力咋⋯」邱旻顥無奈地道
「痛⋯」李逸彤扁起嘴一臉委屈
邱旻顥手心向上將手伸出嚟，李逸彤眼睛餘光見到，低頭望邱旻顥嘅手一眼
「啪！」李逸彤順手就伸手拍邱旻顥嘅手，邱旻顥頓時覺得手心火辣辣
「我就真係痛⋯」邱旻顥講嘅同時望向自己可憐嘅手，手心都紅咗一片，「你係唔係應該補償下⋯」
「點呀？比你打番下呀？」李逸彤將手伸出嚟
「都好喎～」邱旻顥瞄一眼李逸彤嘅手，然後提手朝李逸彤嘅手心打算狠狠打一下一樣
「喂⋯！」李逸彤見邱旻顥嘅手降落嘅速度好快，頓時就有啲怯想叫住邱旻顥
「我點會咁衰？」邱旻顥輕輕地拍一下李逸彤嘅手心同時講道，佢握住李逸彤嘅手，將李逸彤嘅手往下拉
IG Link: https://www.instagram.com/nd_cotttoncandy/?hl=zh-tw