［愛情純愛］我地之間嘅友誼純度絕對等於零！！！: 97. 看不透
「嗯⋯」潘景諭嘅心裏有啲失落，但佢努力地抑壓住呢份感覺，若無其事地點一點頭
潘景諭耷低頭打開要補做嘅功課、拎起筆打算先做少少，失落嘅感覺填滿整個心房；沈心怡感覺潘景諭唔對路，聽出潘景諭啱啱回答嘅語氣同平日唔一樣，今日嘅潘景諭好似同佢特別疏離一樣
「係唔係我令佢唔開心啦⋯？」沈心怡悄然抬頭望向潘景諭時喺心裏道，「我好似又下意識將佢推開⋯」
沈心怡自己都知道呢個問題，佢總會下意識地將本來拉近咗嘅距離推開，彷彿要同潘景諭保持一段距離一樣
「阿諭⋯」沈心怡抬頭望向潘景諭，潘景諭亦同時望向沈心怡，「要唔要一齊食飯⋯？過兩日⋯」
「哦⋯」潘景諭對沈心怡嘅邀約有啲意外，雖然啱啱有啲失落，但沈心怡咁樣一問，潘景諭嘅心情頓時好番，「好呀。」
「你想食咩？」潘景諭問道，對佢嚟講沈心怡主動約佢食飯係一件好罕有嘅事嚟
「未諗到⋯」沈心怡笑了笑講道，「再諗下先。」
此時邱旻顥推開課室門，一如既往地同李逸彤一齊番嚟，邱旻顥行番埋位，放低書包後行去潘景諭嘅座位
「病好啦？」邱旻顥問道
「咁梗係病好先番嚟啦⋯」潘景諭無奈地講道，「唔通病住番嚟傳染你咩？」
「呀彤彤你番嚟啦？我想問地理嗰張WS最後嗰題⋯」 沈心怡見李逸彤番到嚟，拎埋自己份地理WS就行去搵李逸彤
「都唔知係你啲退燒藥勁定你隻心靈藥勁⋯」邱旻顥坐低喺潘景諭前面嘅座位，背住李逸彤嗰邊坐
「講咩呀？」潘景諭無奈地講道，下意識朝沈心怡嘅方向望咗一眼
「你真係好差囉⋯利用人地嘅同理心⋯」邱旻顥講道，佢都大概知道潘景諭嘅事，潘景諭都有同佢提起過，「溝開女真係唔同啲。」
「我冇溝開女囉⋯」潘景諭反一下白眼講道，「而且我又冇逼佢留低陪我⋯」
「哦～睇嚟有後續喎～」邱旻顥笑道，潘景諭一句就勾起咗佢嘅好奇心，「你冇做啲咩奇怪嘢呀嘛～唔好嚇親人。」
「我可以做啲咩奇怪嘢⋯你係唔係諗太多？」潘景諭更無言
「其實佢會唔會對你都有啲⋯」邱旻顥冇講晒，潘景諭知道邱旻顥嘅意思
「唔知，唔敢諗⋯」潘景諭托着腮輕嘆一口氣，「睇唔透佢諗緊啲咩⋯」
「世上都冇你睇唔透嘅女人㗎咩？」邱旻顥笑了笑，都唔知係唔係暗串緊潘景諭
「有呀⋯我媽同沈心怡囉⋯」潘景諭更無奈，「講到好似我好了解女人咁⋯」
「你唔了解沈心怡咩？」邱旻顥反問道，「可能只係因為你中意佢，所以先睇唔透佢啫。」
「唔係，我一直都睇唔透佢。」潘景諭望向沈心怡嘅方向，沈心怡就坐喺邱旻顥嘅座位問緊李逸彤功課，「呀⋯佢坐咗你個位⋯」
「你咁都妒忌？」邱旻顥輕皺一下眉頭
「冇妒忌，唔洗妒忌你。」潘景諭緩緩地開口道，「冇妒忌你嘅必要。」
「我只係問一句啫⋯你唔洗三連答嘅⋯」邱旻顥講道，「可能係天注定你要中意佢，嗯。」
「咁浪漫呀⋯」潘景諭坐好起嚟，將放喺櫃桶嘅功課拎出嚟疊好放入書包，「唉～如果我中意嘅係李逸彤，咁我都可能睇得透佢⋯」
邱旻顥瞬間靜咗落嚟，潘景諭見邱旻顥靜咗落嚟望住佢，便伸手用拳頭用唔重嘅力度打邱旻顥嘅膊頭一下
「講笑啫～Just kidding～」潘景諭笑道，「一早就話佢唔係我中意嘅類型。」
「我知，你中意嗰啲你睇唔透又追唔到㗎嘛～」邱旻顥回頭望，見到沈心怡從自己嘅座位起身行緊過嚟，「你嘅靈藥番嚟啦～」
「講到你追到李逸彤咁⋯」潘景諭細聲地無奈道，明明邱旻顥都未追到李逸彤，仲好意思話自己
「我同你個case都唔同，點可以擺埋一齊嚟講？」邱旻顥搖搖頭，「我係可以追到但唔表白啫，你係未追到。」
「好想打你。」潘景諭默默地盯着邱旻顥講道
「喺你打我之前，我番埋位先～」邱旻顥笑了笑，起身就行番埋位
「心怡，啲功課你幫我keep齊晒啦係咪呀？」潘景諭對行到番埋位準備坐低嘅沈心怡問道
「係呀～」沈心怡微微點頭，「就係你櫃桶嗰疊呀～齊晒啦㗎啦。」
「唔該。」潘景諭禮貌地道
「唔洗～」沈心怡對潘景諭微微一笑道
潘景諭同沈心怡對望着，兩人望住對方時微笑着；坐喺不遠處嘅李逸彤望到對視嘅兩人，感覺兩人之間都要有粉紅色泡泡冒出
「氣氛好似好好喔⋯！」李逸彤嘅內心有啲激動地講道，「點解我都會緊張⋯？」
李逸彤托着下巴悄悄地留意住兩人，潘景諭同沈心怡行埋一齊時係合襯，但李逸彤對沈心怡嘅了解都有一定程度，佢知道潘景諭要沈心怡接受佢有一定難度
如果邱旻顥同李逸彤之間係互相靠近嘅話，咁沈心怡同潘景諭之間，一定係亦進亦退
「按心怡嘅性格嚟講，心怡應該會行一步退兩步⋯潘景諭唔可以原地踏步，但亦唔可以主動踏前太多⋯」李逸彤喺心裏道
李逸彤喺心裏輕嘆一口氣，佢都唔知佢地兩個點，但佢連自己都未搞掂，就唔好講其他人⋯
李逸彤轉身默默地望住邱旻顥，邱旻顥本來一直耷低頭睇手機，但忽然間感覺到有來自前方嘅視線一直盯着自己望
「你咁望住我，我好大壓力⋯」邱旻顥抬頭望李逸彤，無奈地笑了笑
「唔可以望咩？」李逸彤直接反問邱旻顥，佢好似都冇諗過咁問會唔會令邱旻顥唔好意思一樣就問出口
「可以～」邱旻顥將手機塞入褲袋，整個人稍微坐好，望住李逸彤笑了笑，「你中意望幾耐就望幾耐啦～我又唔介意嘅～」
IG Link: https://www.instagram.com/nd_cotttoncandy/?hl=zh-tw