［愛情純愛］我地之間嘅友誼純度絕對等於零！！！: 88. 困難

「發現你嘅秘密啦潘景諭～」李逸彤伸一個懶腰，洋洋得意地道

「煩呀你⋯」潘景諭無奈地講道

「你做咗啲咩搞到心怡咁尷尬？」李逸彤問道，「你太主動嘅話，心怡會驚會避你。」

「佢係唔中意我嘅話，我做咩佢都避㗎啦⋯」潘景諭細聲地講道，聲線裏全都係無奈

李逸彤同邱旻顥愕一愕然，對於潘景諭講嘅嘢有啲⋯意外





「不過有啲難⋯」李逸彤回神後緩緩地開口講道

「咩有啲難？」潘景諭輕皺眉頭，佢不解李逸彤講嘅嘢

「心怡番嚟啦⋯」李逸彤見到沈心怡推開課室門行入課室，頓時完結呢個話題，起身行到沈心怡身邊同時，心裏講出答案：「當然係要心怡同佢一齊好難⋯」

⋯

「心怡去唔去買嘢食？」李逸彤行到沈心怡嘅座位旁邊問道





沈心怡合上筆記簿，拎埋銀包就起身

「佢地唔去呀？」沈心怡見邱旻顥同潘景諭仍然坐喺位便問道

「邱旻顥話唔去。」李逸彤回頭望向邱旻顥，邱旻顥頹廢地坐喺位

「阿諭你唔去呀？」沈心怡問潘景諭嘅同時，順手地拎起放喺枱上嘅筆記比潘景諭，「筆記借你用。」

「唔落去啦⋯好攰⋯」潘景諭講道，「幫我買嘢飲。」





「哦好呀，你飲咩？」沈心怡問道

「冇所謂，你揀啦⋯」潘景諭將沈心怡嘅筆記收到自己櫃桶中

李逸彤當自己咩都唔知，就好似平時一樣同沈心怡一齊；李逸彤先啱啱行出課室行到轉角位，就收到邱旻顥send比佢嘅message

「你兩個洗唔洗咁樣⋯」沈心怡瞄一眼李逸彤嘅手機螢幕，見到畫面停喺同邱旻顥嘅對話框中

「咁啱講兩句啫⋯」李逸彤無奈地道，但嘴角卻不禁微微上揚，完全冇辦法掩飾佢嘅想法

「你地日日都有嘢講咩真係⋯你地已經同班啦喎⋯」沈心怡疑惑又好奇，兩個同班嘅人真係會有咁多話題？

「中意佢自然會想同佢分享所有事，開心事同唔開心嘅都會想同佢講話㗎啦～」李逸彤甜甜地笑道，喺沈心怡面前毫無掩蓋佢對邱旻顥嘅感情，「有時講電話都係講自己嘅嘢～」

「彤彤真係好中意邱旻顥⋯」沈心怡喺心裏道，李逸彤口講話冇特別想一齊，但係望一個人嘅眼神同表現出嚟嘅事無法隱瞞心事，「真係每一次提起邱旻顥，佢眼裹面都有光閃出嚟一樣⋯」





「做咩呆咗？」李逸彤輕輕捉沈心怡嘅手一下

「嗯？冇呀⋯只係覺得你其實好中意佢～」沈心怡回神後微笑道，「你一講起佢嘅時候，笑容都特別甜～」

「或者啦～」李逸彤甜甜一笑

「咁宜家仲有冇話冇特別想同佢一齊？」沈心怡好奇地問道

「唔⋯宜家嘅話，偶爾都會期待有一日同佢一齊⋯」李逸彤自己講完都有啲唔好意思，輕輕地拍咗自己嘅臉頰兩下

兩個少女行到去飲品機前就分道揚鑣，李逸彤去買嘢食，沈心怡去買嘢飲

沈心怡㩒咗兩包嘢飲，拎起就去搵李逸彤





番到課室後，沈心怡先行番位，然後將兩包飲品遞到潘景諭面前

「你做咩買兩包⋯？」潘景諭一臉疑惑地抬頭望向沈心怡，「我要一包咋⋯」

「你揀。」沈心怡講道，「你揀一包。」

「你揀先啦，你想飲邊包？」潘景諭收起手機，「或者你中意邊隻多啲？」

「我兩隻都中意飲。」沈心怡微微一笑道，「你叫我揀嘛～」

「咁呢個啦。」潘景諭笑了笑，拎走放喺沈心怡左手嘅蘋果汁

沈心怡拎住嘢飲就行去李逸彤嘅座位，李逸彤鬼鬼祟祟地拎咗邱旻顥放喺枱面嘅手機

「你知邱旻顥手機密碼呀？」沈心怡見到後訝異地問道





「唔知喎～」李逸彤搖搖頭

李逸彤背住門口嘅方向坐，偷偷地拎住邱旻顥嘅手機自拍；沈心怡睇到都扮睇唔到，默默地耷低頭睇手機

「邱旻顥番嚟未？」李逸彤喺心裏問嘅同時回頭望向走廊，見到邱旻顥剛好行緊番嚟

李逸彤頓時鎖番邱旻顥嘅手機、放番低喺枱面，就好似冇事發生過一樣

「呼～」邱旻顥坐低同時輕呼一口氣，自然地拎起手機

李逸彤嘅心臟噗噗跳，佢想邱旻顥發現自己嘅好事，但又唔想邱旻顥咁快發現

「李逸彤，借你本地理書嚟望下。」邱旻顥掀開地理書





「哦⋯比你。」李逸彤拎咗自己嘅地理由出嚟遞比邱旻顥，「你要嚟做咩？」

「對答案。」邱旻顥打開李逸彤嘅書，對比一下自己寫嘅答案同李逸彤寫嘅答案，「你嗰啲答案應該啱啲。」

「多謝喎⋯」李逸彤敷衍地講道，然後悶悶地趴喺自己嘅枱上

沈心怡感覺自己又成為咗個電燈膽，飲完嘢之後就起身番埋位；邱旻顥合上書，拎起手機，百無聊賴地㩒開相簿，時間總係如此剛好，一打開相簿就見到滿滿嘅自拍照，什至唔係自己嘅自拍⋯

「呢張⋯」邱旻顥悄悄地㩒開第一張相，然後又睇下其他相，嘴角微微上揚後，指尖落喺下方中央嘅心心，「呢張都好睇。」




IG Link: https://www.instagram.com/nd_cotttoncandy/?hl=zh-tw