［愛情純愛］我地之間嘅友誼純度絕對等於零！！！: 80. 遠又近

「呃⋯好難解釋比你聽，你地女仔唔識㗎啦～」潘景諭心虛地笑道，畢竟呢個只係佢隨便講出口嘅理由

實際上佢就係想陪沈心怡番屋企，想借意同沈心怡獨處一陣，就算只係陪沈心怡行番屋企嗰一段短短嘅路程，潘景諭都覺得滿足

「嗨潘景諭～」「嗨～」

有兩個同級嘅女仔行過，見到潘景諭時打咗聲招呼，畢竟都同過班

「嗨⋯」潘景諭禮貌上點一點頭





沈心怡望一望嗰兩個女仔，又望一望潘景諭，見自己同潘景諭好似企得有啲開，下意識就朝潘景諭嘅方向行咗一小步

剛好望向沈心怡嘅邱旻顥見到沈心怡嘅呢個細微舉動

「唔簡單睇嚟⋯」邱旻顥默默喺心裏講嘅同時望咗潘景諭一眼

沈心怡嘅雙手放喺身前，兩隻食指嘅指尖嘅輕輕地扣着，佢冇留意到喺嗰兩個女仔行開咗之後，潘景諭默默地留意佢

當地鐵駛到站，車門打開後，沈心怡行入車廂企喺扶手前，伸手捉住扶手；潘景諭自然地企到沈心怡嘅身旁停低後，又默默地朝沈心怡嘅方向行咗一步，更接近沈心怡





沈心怡卻默默地，好似下意識一樣朝另一邊踏咗一小步

「點解佢今次行開⋯？」將一切睇喺眼裏嘅邱旻顥有啲疑惑

「你做咩行開？」潘景諭都留意到沈心怡嘅舉動便問道

「嗯？冇呀，好逼。」沈心怡抬頭望住潘景諭講道

「邊度逼呀？」潘景諭心裏有啲不滿，但佢冇將佢嘅不滿完全地表達出嚟，只係朝沈心怡嘅方向又行一步





「做咩逼過嚟啦？」沈心怡一臉無奈，又向旁邊行咗一步

「你做咩要行開？」潘景諭追問同時又朝沈心怡行近一步

「喂呀⋯！」沈心怡輕皺起眉頭望住自己同潘景諭之間嘅距離，聲線略帶點撒嬌嘅感覺，然後又往旁邊行一步

沈心怡都已經行咗一半個圈，企到去邱旻顥嘅旁邊，莫名其妙地企咗喺邱旻顥同潘景諭中間；邱旻顥完全唔理解眼前呢兩個人嘅一番操作

「到底做緊啲咩⋯」邱旻顥無奈地表示，「你兩個⋯」

沈心怡繞過邱旻顥，行到邱旻顥嘅右邊；潘景諭見狀，繞過邱旻顥，邱旻顥自動地行開，潘景諭企咗喺邱旻顥同沈心怡之間

「你做咩一定要企我隔離啫⋯？」沈心怡輕皺起眉頭，一臉莫名其妙嘅表情，「好逼啦⋯！」

「得我地三個圍住條柱企，有幾逼呀？」潘景諭無奈地追問道





潘景諭微微側身朝沈心怡嘅方向企，邱旻顥忽然間有個想法喺腦海中閃出

邱旻顥若無其事地伸手推咗潘景諭一下，潘景諭頓時向沈心怡嘅方向跌咗一大步

沈心怡比潘景諭嚇咗一跳，向後行咗一步；潘景諭下意識就提手，輕輕地扶住沈心怡嘅書包

喺潘景諭企穩之後，垂眼望住沈心怡；沈心怡顯然地比潘景諭嚇咗一跳，心跳快到心臟都要跳出嚟一樣

「搞咩呀⋯！」沈心怡一回神嘅第一件事，係將潘景諭輕輕地推開，「你喺平地都可以企唔穩⋯？」

潘景諭回頭望向邱旻顥，邱旻顥卻擺出一副事不關己嘅模樣

「邱旻顥推我。」潘景諭對沈心怡講道，沈心怡微微探頭望向邱旻顥





「你自己企唔穩仲賴我？」邱旻顥頓時否認，「關我咩事？」

潘景諭對邱旻顥反咗個白眼，不過邱旻顥好歹都算係一個助攻，潘景諭都冇嘢好講，只係佢嘅助攻嚟得有啲突然

潘景諭再一次望向沈心怡嘅時候，留意到沈心怡臉頰上淡淡嘅紅霞，潘景諭嘅心裏有啲意外，亦有啲愕然

喺潘景諭嘅印象中，幾乎都冇見過沈心怡會因為男仔嘅靠近而面紅，又或者可能有，只係佢唔知道

沈心怡一直都冇出聲，直到出咗閘，得番佢同潘景諭兩個人

「你到底要買啲咩？」沈心怡好奇地問道，「你已經過咗嚟呢邊好多日啦喎，仲未買到咩？」

「哦⋯係呀⋯」潘景諭因為心虛所以回答嘅時候降低咗聲量，然後將話題轉移，「有人陪你番屋企唔好咩？」

「有人陪我都唔係唔好嘅～」沈心怡微微一笑講道，佢偷瞄潘景諭一眼，但好快又收回視線，「原來呢度開咗間新餐廳。」





沈心怡指一指旁邊嘅一間新開張嘅餐廳，好奇地將上身微微前傾探頭望過去

「食咩㗎？」潘景諭問道

「唔知喎～好似係食日本嘢。」沈心怡微微聳肩，「好似好好食⋯」

「下次同你食囉～」潘景諭嘅一句，實際上除咗係一個邀請外，仲係一個試探

潘景諭只係想知道，自己主動邀約嘅話，沈心怡會答應定拒絕




IG Link: https://www.instagram.com/nd_cotttoncandy/?hl=zh-tw