［愛情純愛］我地之間嘅友誼純度絕對等於零！！！: 78. 安於現狀⋯嗎？

兩人肩並肩咁落到教員室，一行到過去簿櫃就見到放咗兩疊簿喺度

「你真係散步散得啱時候。」李逸彤望住放喺簿櫃中嘅兩疊簿對邱旻顥講道，然後就自顧自地雙手拎咗其中一疊簿

「咁我可唔可以走先？」邱旻顥開玩笑地問道，但雙手都係拎起咗另一疊簿

「唔可以。」李逸彤講道

「你嗰疊放埋上嚟啦。」邱旻顥捧住疊簿面向李逸彤企





「唔洗，我拎到～」李逸彤笑了笑，「而且唔可以比你搶我嘅嘢做！」

「我好人打算幫你拎咋！」邱旻顥無奈地反咗個白眼

「你真係好好呀邱旻顥～」李逸彤裝模作樣地講道，「你咁好人點算呀？」

「係囉點算好呀？」邱旻顥反問道，「我有女朋友嘅話先唔會咁好人理你⋯」

「你宜家有女朋友咩？」李逸彤微微側着頭問道，「邊個呀？」





邱旻顥一聲不吭地定睛望住李逸彤，李逸彤嘅心跳都快到好似要跳出嚟一樣

「佢唔係想話我係佢女朋友呀嘛⋯？」李逸彤嘅內心掀起巨浪，大概係可以直接將佢淹沒嘅地步

心跳嘅聲音一直喺體內迴盪，回音傳到耳中，胸口起伏嘅同時帶着微微突突跳動嘅感覺，李逸彤眨一下眼、微微一笑，想令自己唔好咁唔自在

「雖然我又唔太介意嘅～不過咁樣講又會有啲尷尬⋯」李逸彤喺內心自言自語道，不過佢好快就將自己嘅呢個想法駁回，「不過⋯邱旻顥應該唔會講啲咁嘅嘢⋯」

「咁我遲早都會有女朋友嘅～」邱旻顥緩緩地開口講道，下意識望咗李逸彤一眼





李逸彤微微一怔，佢留意到邱旻顥忍唔住微微上揚起嚟嘅嘴角，李逸彤有啲緊張、有啲擔心，但同時亦有啲興奮、有啲心動

「你有中意嘅人咩？」李逸彤看似單純因為好奇而追問嘅外表下，藏着一顆緊張嘅心，「邊個呀？」

「做咩咁緊張？你中意我咩？」邱旻顥笑咗一笑，見到李逸彤嘅緊張，邱旻顥嘅內心似乎好高興

「吓？我先唔係中意你囉！」李逸彤連忙否認，然後加快步伐，帶着小跳步一樣嘅步伐踏上梯級，「唔好咁自戀啦！」

邱旻顥望住加快腳步行喺佢前面嘅李逸彤，心裏暗自高興同時，嘴角都忍唔住笑意上揚起嚟

「你行咁快做咩？」邱旻顥追上李逸彤嘅步伐

「疊簿重嘛，想快啲番到課室。」李逸彤企喺平台嘅位置回頭望向邱旻顥講道

「疊埋上嚟。」邱旻顥行到上去，企喺李逸彤旁邊時道





「唔要。」李逸彤撇開臉，唔洗邱旻顥幫佢拎

李逸彤悄悄地望向邱旻顥，直覺話佢知邱旻顥係中意佢，就算唔係中意都有一定嘅好感，但都係有啲擔心

「佢會唔會係中意我？如果唔係我，咁會係邊個⋯？」李逸彤喺心裏猜想，「唔係中意我但又成日同我出街，番學又會叫我等埋佢⋯如果佢有中意嘅人，咁成日同我一齊，唔怕佢中意嗰個女仔介意咩⋯？」

「做咩咁靜突然間⋯」邱旻顥望咗李逸彤一眼，喺心裏默默地道，望住李逸彤一副認真沉思嘅表情，邱旻顥嘅內心有啲疑惑

「邱旻顥會唔會係中意⋯我？但如果唔係，我自作多情咪好尷尬⋯」李逸彤輕皺起眉頭，喺心裏苦惱地講道

李逸彤行入課室，行到簿櫃前打算蹲低時，邱旻顥先一步蹲低，將手上嘅簿放到班嘅簿櫃中，然後伸手直接拎走李逸彤手上疊簿疊喺上面

「Okay。」邱旻顥企起身對李逸彤講道，「搞掂。」





「Wow～你兩個又一齊嘅？」喺旁邊經過嘅三個男同學忽然間起哄般講道，「拍拖又唔認～」

李逸彤心裏有啲無奈，但又忍唔住有啲開心，聽到人地話佢兩個成日一齊嘅時候，心入面都會偷偷開心起嚟

「真係冇拍拖點認？」邱旻顥無奈地笑道

李逸彤喺心裏一怔，本來掛喺臉上嘅笑容都僵咗一下

「即係點⋯」李逸彤喺心裏呆呆地問道，「講到好似我地會拍拖咁⋯」

「有拍拖就認呀？」男同學頓時問出李逸彤心裏想問嘅嘢，「哦～」

「係呀係呀⋯」邱旻顥微笑着敷衍地回答

李逸彤輕抿着唇，但從佢嘅眼神中都可以睇得出佢嘅小開心；待邱旻顥起身之後，李逸彤便轉身行番埋位坐低





「同佢拍拖都⋯應該都唔錯⋯」李逸彤悄悄地喺心裏講道，「拍拖呀⋯」

明明一直都冇要拍拖嘅想法⋯明明一直只係想同邱旻顥再親近多啲⋯明明一直都覺得宜家同邱旻顥呢種曖昧關係唔差⋯但宜家李逸彤嘅心，卻有同邱旻顥拍拖嘅想法

「算啦⋯可能邱旻顥都寧願安於現狀⋯」李逸彤有呢個想法嘅時候，心裏有少許失落

李逸彤喺心裏嘆一口氣，佢好似喺自己唔知情嘅情況下踏出咗一步⋯

「我唔想安於現狀⋯」李逸彤喺心裏慨嘆道，「我又唔係淨係想同你做朋友⋯」




IG Link: https://www.instagram.com/nd_cotttoncandy/?hl=zh-tw