［愛情純愛］我地之間嘅友誼純度絕對等於零！！！: 75. 等我一下

邱旻顥匆匆忙忙地跑出大堂，一踏出大堂，拎喺手中跑手機嘅螢幕就亮起

李逸彤：你今日咁遲嘅？

李逸彤：我都行到地鐵站啦⋯

「等埋Okay？」邱旻顥喺百忙之中將步速稍微減慢，騰出手回覆李逸彤後又跑起嚟

已經行到地鐵站入口嘅李逸彤見到邱旻顥嘅message，默默地將腳步放慢，企喺入口嘅一旁等邱旻顥





邱旻顥小跑過斑馬線，放慢腳步緩一緩氣，但多行兩步就見到李逸彤喺地鐵站入口等緊佢，佢又連忙跑起嚟

「哈⋯哈⋯早晨⋯」邱旻顥喘着氣跑到李逸彤面前停低

「早晨喎⋯」李逸彤嘅目光從手機螢幕上移開，無奈地抬眼望向邱旻顥，「好地地又要人等埋你⋯陣間搞到我遲到點算⋯」

「宜家都冇遲到，都係遲少少番到去啫，都唔係遲到⋯」邱旻顥緩氣嘅同時將手機收番入褲袋，「Okay啦～」

「我下次唔會等你㗎啦⋯」李逸彤微微鼓起兩泡腮講道





「你上個月都係咁講。」邱旻顥對李逸彤笑道，「你今日咪都係等埋我～」

「咁我下次唔等你啦～」李逸彤輕哼一聲，撇開臉

李逸彤一定會等埋佢呢點，邱旻顥其實都幾肯定，其實叫佢等埋自己冇咩特別嘅理由，只係單純地想同李逸彤一齊番學，將兩人嘅距離維持喺一個水平上

「唔好咁衰啦，等埋我啦下次都～」邱旻顥伸手摸一摸李逸彤嘅頭柔聲道

李逸彤悄然地望邱旻顥一眼，佢總係會輕易被邱旻顥嘅溫柔打動，心臟又會「咚咚、咚咚！」地強烈跳動着





「考慮下啦⋯」李逸彤輕抿一下唇，「所以⋯你叫我等埋你係有咩重要事⋯？」

「嗯？重要事？」邱旻顥露出不解嘅表情，「冇咩重要事呀。」

李逸彤聽完邱旻顥嘅回答後有啲摸不著頭腦嘅感覺，冇咩特別事嘅話，叫佢等埋自己嘅意義係咩？

「咁平時日日朝早番學都會見到你嘛～」邱旻顥自己講完之後都覺得有啲難為情，但又唔想比太明顯嘅反應，「今朝遲咗出門口，咪順便問下你到邊囉～」

「哦～」李逸彤嘅笑意完全忍唔住，甜甜嘅感覺都要從笑容溢出嚟，用開玩笑嘅語氣又道：「你想見我咪直接講囉～我又唔會笑你嘅～」

當呢句說話講出口時，李逸彤嘅心根本就冇辦法平靜落嚟，對自己中意嘅人用着開玩笑嘅語氣講出自己心入面嘅說話

心臟嘅強力跳動牽動着每一條神經線，臉頰泛起淡淡嘅紅霞，雙眼都會頓時一亮，心情同心跳都會因為邱旻顥嘅一句說話而改變

「咁你肯等埋我，即係你都想見我啦？」邱旻顥笑着反問，佢冇認李逸彤嘅講法，但亦冇直接承認





「你唔好咁厚面皮得唔得？」李逸彤反一下白眼，假裝嫌棄地講道

「好似係你講先。」邱旻顥行到月台嘅幕門前，「又唔見你話自己厚面皮？」

「我有講咩？冇呀～」李逸彤搖搖頭，「一定係你聽錯。」

李逸彤偶爾回頭，見到沈心怡喺電梯緩緩行落嚟，李逸彤整個人轉身面向沈心怡

「嗨～」李逸彤喺沈心怡差唔多行到佢面前時一下子拉住佢

「早、早晨⋯！」沈心怡比李逸彤嚇到，成個人微微震咗一下

「做咩想扮睇我唔到呀？」李逸彤從旁邊攬住沈心怡





「冇呀，我邊有啫？」沈心怡連忙否認，但下一秒又細聲地道：「我只係唔想做電燈膽咋嘛～」

「做邊個嘅電燈膽呀？」李逸彤明知故問，仲要特登扮唔明沈心怡講咩

沈心怡笑而不語，只係帶着意味深長嘅笑容微微側着頭望一望邱旻顥，然後又望一望李逸彤，完全係用目光嚟講嘢

「你兩個又真係日日都一齊番學㗎喎～」沈心怡打量着兩人

「今日本來唔係嘅，但有啲人要我等埋佢囉～」李逸彤鬆開沈心怡，然後伸手挽住沈心怡嘅手臂

邱旻顥同李逸彤對望着，邱旻顥微微聳肩，李逸彤反咗個白眼，而喺一旁嘅沈心怡只覺得自己根本就係電燈膽

「呢一刻嘅我真係太似電燈膽⋯」沈心怡無奈地講道，微微扁一扁嘴，「阿諭喺度就好啦⋯」

「哦～掛住潘景諭啦？」李逸彤笑了笑，帶着開玩笑嘅語氣講道





地鐵駛進月台，車門喺月台嘅兩聲提示聲後打開

「都唔係掛住佢嘅⋯只係佢喺度比較好囉⋯」沈心怡行入車廂，行到中間嘅扶手位置，手捉住扶手，「至少，我唔係唯一一個電燈膽⋯」

邱旻顥冇加入話題，企喺一旁嘅佢拎出手機，send咗個message比潘景諭：「啱啱沈心怡話佢掛住你」

啱啱踏出屋企門口嘅潘景諭，一閂上鐵閘就感覺手機震咗一下；潘景諭邊慢慢行邊拎出手機，螢幕一亮一解鎖就彈咗邱旻顥send嘅message出嚟

潘景諭嘅嘴角頓時上揚，心裏都覺得甜絲絲的，耳根瞬間紅透了，連心臟都加快咗跳動嘅速度

「佢先唔會咁講⋯」潘景諭輕輕一笑後細聲地喃喃自語道，明知道沈心怡根本唔可能咁講，但心裏都係覺得甜絲絲的








IG Link: https://www.instagram.com/nd_cotttoncandy/?hl=zh-tw