［愛情純愛］我地之間嘅友誼純度絕對等於零！！！: 70. 熟絡

喺落咗車之後，兩人都冇講啲咩，或者因為感覺仍然留喺啱啱嘅一刻未緩氣

「我想買早餐，你買唔買？」李逸彤先一步開口問邱旻顥

「哦好呀⋯」邱旻顥望咗李逸彤一眼，目光只有1秒落喺李逸彤身上

邱旻顥同李逸彤一齊去平時買開早餐嘅鋪頭，李逸彤企喺一件又一件嘅三文治前，苦惱地沉思着今日要食咩三文治

「要食餐蛋治定腿蛋治好⋯？」李逸彤沉思着





「你呆企喺度做咩？」邱旻顥拎起一份餐蛋治，卻見到李逸彤一動不動地企喺度，「唔係買早餐咩？」

「你覺得我今日食餐蛋治好定腿蛋治好⋯？」李逸彤拉一下邱旻顥嘅衫角，抬眼望住邱旻顥問道

「腿蛋囉～」邱旻顥講道，然後將自己份三文治嘅錢放喺枱上比老闆

「咁腿蛋啦⋯」李逸彤仍然有啲猶疑，但都係拎咗份裝住腿蛋治嘅三角形盒

離開咗買早餐嘅小店舖後，李逸彤若有所思地望住手中嘅三文治





「我好似想食餐蛋治多啲⋯」李逸彤微微扁着嘴，望住手上嘅三文治講道

「同你交換一件？我買咗餐蛋治。」邱旻顥拎住三文治盒嘅手提一提起，「同你換一件，咁就可以兩樣都食晒。」

「哦～」李逸彤望到邱旻顥手上嘅三文治，頓時意外地瞪大了眼，嘴角上揚起嚟，「好呀好呀！」

邱旻顥喺心裏暗自高興，啱啱買三文治嘅時候，邱旻顥察覺到李逸彤嘅猶疑不決、三心兩意，於是自己先揀餐蛋治，然後叫李逸彤買腿蛋治

「咁都比你諗到嘅～」李逸彤冇多諗，只係覺得邱旻顥諗到呢個方法好聰明，笑盈盈地望住邱旻顥講道





邱旻顥見到李逸彤笑盈盈的，佢都忍唔住跟住一齊開心

番到學校之後，兩人坐番埋自己位食早餐

「咁我食完先比你，連埋個盒。」李逸彤轉身對邱旻顥講道，一回頭就見到邱旻顥已經食緊三文治，「你食緊啦？」

「唔係等咩⋯」邱旻顥無奈地問道，「唔通拎嚟拎去咩⋯」

李逸彤面向住locker嘅方向坐，邱旻顥望住李逸彤嘅側面，兩人同步地將三文治放到嘴邊咬一啖

「嗱。」李逸彤食埋最後一啖後，剩下嘅一件腿蛋治連盒比邱旻顥，「你仲未食完呀⋯」

「食完啦⋯」邱旻顥無奈地講道，手拎起水樽擰開樽蓋，飲咗啖水之後將手上嘅餐蛋治遞比李逸彤

「嘻⋯」李逸彤嘻嘻一笑，接過餐蛋治咬一啖，望向邱旻顥笑了笑





李逸彤對邱旻顥一笑，邱旻顥嘅心頓時要溶化一樣，李逸彤嘅笑容可以令邱旻顥嘅嘴角自動上揚

「好彩啫⋯」邱旻顥喺心裏講道，佢都有啲佩服自己嘅細心

⋯

「叮噹叮噹⋯叮噹叮噹～」

喺落堂嘅鐘聲響起後，小息時間嚟到，大家都可以休息一陣

「嗱。」沈心怡將兩張寫滿重點嘅memo紙遞比潘景諭

「唔該你～」潘景諭接過memo，將memo貼到自己嘅書上





沈心怡起身行到潘景諭嘅枱邊，沈心怡見到潘景嘅書上都有抄重點

「你明明自己都有抄notes，咁做咩要我幫你抄多次⋯」沈心怡嘅心裏既疑惑亦無奈，明明潘景諭都有抄，做咩又要自己幫佢寫多次一樣嘅嘢

「你嘅notes易睇啲嘛～」潘景諭笑了笑講道，然後喺望一眼memo後將書合上，「你啲字又好睇好多呢～」

「一啲關係都冇囉⋯」沈心怡無奈地講道，「你自己抄嘅嘢自己睇唔明㗎咩⋯」

「咁你又真係幫我抄？」潘景諭笑問道

「熟嘛我地。」沈心怡無奈地講完後行番埋自己位坐低，「而且都係幫自己加強記憶嘅一種，所以又冇咩所謂。」

沈心怡又唔係話介意要幫潘景諭抄多份memo notes，有利於自己溫書嘅方法百利而無一害，所以佢都唔會拒絕幫潘景諭抄notes

潘景諭拎出手機放喺枱上，看似睇手機嘅佢實際上只係想用「睇手機」呢個姿勢嚟幫自己打掩護





「原來只係因為熟⋯」潘景諭嘅內心喺聽完沈心怡啱啱嘅回答後有啲在意同不快

潘景諭幾想自己喺沈心怡嘅心中有一絲嘅特別，佢希望自己對沈心怡嚟講係同其他人唔一樣，自己會比其他人特別⋯

「呀，比少咗張你⋯！」沈心怡忽然間講道，然後轉身從自己座位嘅櫃桶中拎番本書出嚟，拎番本來都係幫潘景諭抄嘅memo出嚟，「嗱，你㗎。」

「哦⋯嗯⋯」潘景諭喺櫃桶拎咗中文書出嚟放到枱上

「打開書啦⋯」沈心怡見潘景諭拎完書出嚟就繼續睇手機，便伸手拍咗潘景諭一下，「仲掛住睇手機。」

「你打我⋯！」潘景諭擺出委屈嘅模樣抬頭望住沈心怡，但手都係乖乖地掀開書，「唔send襪襪比你睇㗎！」

「你用襪子嚟威脅我！？」沈心怡頓時微微鼓起兩泡腮，「太過分啦！」





沈心怡將memo貼番喺潘景諭嘅書上，轉身蹲低喺打開書包拉鍊，唔知喺書包入面搵啲咩一樣

「講起襪子，我就記得啦⋯」沈心怡拎咗一包前日買嘅貓咪肉泥出嚟比潘景諭，「我買比襪子食㗎～」




IG Link: https://www.instagram.com/nd_cotttoncandy/?hl=zh-tw