［愛情純愛］我地之間嘅友誼純度絕對等於零！！！: 65. 緣於巧合

李逸彤遲疑地接過邱旻顥嘅外套，望住手上嘅外套，感覺同邱旻顥之間嘅距離好似行近咗一大步，心臟跳動嘅力度令佢知道一切都係真，唔係發緊夢

邱旻顥嘅腦海中有一刻想直接幫李逸彤披上自己嘅外套，佢嘅手微微抬起，但下一個瞬間佢輕輕地握拳，手又再垂下，或者係佢喺自己同李逸彤之間仍然劃有一條界線，一條虛線⋯

「佢要我自己著呀⋯咁好尷尬啫⋯」李逸彤望住拎喺手上嘅外套喺心裏講道，「搞到好似我自作多情咁⋯」

「唔著？」邱旻顥見李逸彤都就嚟要變石像一樣，便側側頭望李逸彤

「唔係⋯」李逸彤搖搖頭，佢心入面就係想邱旻顥為佢披上外套，或者咁樣先足以證明自己比其他人特別





「快啲著。」邱旻顥沉思咗一陣之後，拎走李逸彤手上嘅外套，佢將外套揚兩下然後披喺李逸彤嘅膊頭上，「陣間感冒⋯」

李逸彤直盯着邱旻顥，邱旻顥將外套披上去後不忘整理一下；李逸彤盯着邱旻顥嘅雙眼裏，好似有星星一樣閃咗一下

邱旻顥嘅耳根淡紅，佢瞄一眼李逸彤，只見李逸彤嘅嘴角滲出一絲柔和嘅笑意

「行啦⋯」邱旻顥整理好後連忙將手收回，轉身就行

「邱旻顥嘅外套好大件⋯」李逸彤拉一下外套，雙手穿進衫袖中，衫袖將李逸彤成個手掌都遮到實一實，「好香⋯外套⋯」





李逸彤嘅臉頰泛起淡淡嘅紅霞，佢追上邱旻顥嘅腳步，行喺邱旻顥嘅身邊偷瞄佢

「我又唔係唔著⋯你當我係你個妹呀？」李逸彤笑一笑後講道

「佢先唔洗我擔心佢咁多。」邱旻顥講道，佢都冇諗呢句說話嘅意思，只係好順口咁就講咗出嚟

「我⋯我有令你好擔心咩⋯？」李逸彤怔了一怔，然後臉上掛上淡淡嘅笑容，上身傾前、微微側頭望住邱旻顥

「幾啦。」邱旻顥望向李逸彤，一臉淡然地講道





「有咩？」李逸彤頓時甜甜地笑起嚟，「我咁大個人，邊度令你擔心啦～」

「今日咁涼，你仲著咁單薄，仲唔係令我擔心？」邱旻顥回答道，「出一出嚟就感冒，唔係幾好囉～」

「哦！」李逸彤笑了笑，雙手蓋着口鼻，當雙手一湊近到鼻前，無色無味嘅空氣頓時都變成邱旻顥身上嘅味道

邱旻顥留意到李逸彤嘅舉動，有啲唔好意思咁將視線移開，但又忍唔住偷瞄李逸彤一眼

「你唔凍呀？」李逸彤垂低雙手望住邱旻顥

李逸彤宜家覺得好暖，但望住身上冇著外套嘅邱旻顥，佢心裏又有啲抱歉

「唔凍。」邱旻顥搖搖頭，提手摸一摸自己嘅頸，溫度都差唔多

「你唔著外套都咁暖嘅？」李逸彤捉一下邱旻顥嘅手，邱旻顥嘅手暖洋洋的





「我係男仔嘛。」邱旻顥笑了笑，隨口就講出一個理由

「關事㗎咩？」李逸彤擺出一副疑惑嘅表情，佢真係諗緊邱旻顥講嘅嘢係唔係真

「噗⋯！」邱旻顥比李逸彤認真嘅疑惑樣逗笑，「我隨口講㗎咋！你咁易信人嘅？」

「你講我咪信。」李逸彤理直氣壯地講道

「多謝你嘅信任喎～」邱旻顥笑了笑道，伸手摸一摸李逸彤嘅頭

「快啲行啦我地！」李逸彤帶着小跳步行前兩步，回頭望向邱旻顥嘅同時伸手拉住邱旻顥嘅手腕，「想快啲食到糖水！」

邱旻顥比李逸彤拉住跑起嚟，李逸彤偶爾回頭望一望邱旻顥，每一次李逸彤對佢笑時，怦然心動嘅感覺便會隨之而來





⋯

「邱旻顥你食咩？」李逸彤上身微微前傾，望住坐喺佢對面嘅邱旻顥細聲地問道

「你想食咩？紅豆沙？」邱旻顥問道

「你又知嘅？」李逸彤有啲意外，連聲線都表達着佢嘅開心，「你識讀心術？」

「可能係啦～」邱旻顥有意隱瞞真相，其實佢啱啱瞄到李逸彤睇餐牌時，指尖指住紅豆沙，邱旻顥眼利留意到嗰一個瞬間，「我都食紅豆沙啦！」

「哦好呀！」李逸彤笑了一笑，開朗又可愛嘅笑容直打進邱旻顥嘅心

李逸彤嘅身上仍然著住邱旻顥嘅外套，邱旻顥偷望一眼自己嘅外套，感覺番到屋企之後，外套又會沾滿李逸彤嘅味道

邱旻顥望住坐喺自己對面嘅李逸彤，當初連佢自己都冇諗過，自己有一日會同李逸彤咁熟，什至會中意佢





有時會諗，到底佢兩個嘅遇見同關係，係巧合定係緣份？

可能只係一個巧合，咁啱邱旻顥見到一個婆婆、咁啱舉手之勞幫咗一個忙、咁啱嗰個婆婆係李逸彤嘅嫲嫲⋯一切都只係「咁啱」、一個巧合

但又或者，一切都係因為佢地本來就係緣份，係注定好嘅事嚟：注定邱旻顥會幫一個婆婆、注定嗰個婆婆就係李逸彤嘅嫲嫲、注定李逸彤同佢之間會因為一句「多謝你幫忙」而拉近關係




IG Link: https://www.instagram.com/nd_cotttoncandy/?hl=zh-tw