［愛情純愛］我地之間嘅友誼純度絕對等於零！！！: 60. 關注

「放心啦，我地咁熟，我一定記得嘅～」沈心怡笑了笑講道

潘景諭微微一笑，但心入面卻笑唔出，因為佢冇辦法窺探到沈心怡嘅內心一樣，沈心怡毫無破綻嘅回答同笑容，令潘景諭有啲手足無措嘅感覺

喺食完飯番到學校，仲有啲時間先響上堂鐘

「好想去玩呀⋯」沈心怡托着腮耷低頭睇手機時講道，「彤彤幾時得閒同我出街？」

「隨時啦～」李逸彤回答道，「你想幾時就幾時。」





「你唔可以成日都咁偏心，淨係同佢出去又唔約我。」沈心怡嘅語氣略帶不滿，故意唔提起邱旻顥嘅名

「咩呀，邊有啫～」李逸彤頓時覺得有啲心虛，唔洗沈心怡講到出口佢都明，「宜家咪約你囉～」

「你就係偏心，有異性冇人性⋯」沈心怡輕哼一聲後撇開臉唔望李逸彤

「星期六同你出去囉～」李逸彤連忙講道，「我先冇偏心～」

「你拍咗拖嘅話仲得了？連我係邊個都唔記得啦⋯！」沈心怡不滿地講道





「邊個拍拖呀？」潘景諭問道，「你呀李逸彤？」

啱啱去完廁所番嚟嘅潘景諭同邱旻顥番到嚟，就聽到呢個對話，幸好前面嘅佢地冇聽到

邱旻顥嘅視線隨即落喺李逸彤身上，雖然佢知道李逸彤冇拍拖，但聽到之後心入面難免會在意

「左手同右手呀。」李逸彤露出一個皮笑肉不笑嘅表情

李逸彤嘅話剛說出口，下意識抬頭望咗邱旻顥一眼，兩人對望咗一眼，邱旻顥臉上掛上淡淡嘅笑容





「叮噹叮噹⋯叮噹叮噹～」上堂嘅鐘聲響起，坐喺李逸彤嘅座位嘅沈心怡起身番自己位

「咩堂？」行喺沈心怡旁邊同佢一齊番埋位嘅潘景諭問道

「班主任堂～」沈心怡嘅語氣輕快，帶着小跳步行咗兩步，「不過最後係PE堂⋯」

⋯

今堂PE堂，女仔嗰邊係打排球，幾個女同學掛起球網、分成兩隊

今日嘅陽光好好，一群梳着馬尾嘅少女揮灑着青春嘅汗水，隨住跑動而搖擺嘅馬尾，配上運動服，青春又活潑

喺對面嘅女同學將排球打過網，企前面嘅沈心怡下意識就打算接球，但排球從沈心怡嘅頭頂往後飛，企喺沈心怡身後嘅昕婷望住朝自己飛嚟嘅排球就向前行

昕婷直撞上沈心怡嘅背，仲踩到沈心怡嘅鞋踭





沈心怡撞到昕婷後便下意識地向前行一步，但冇諗到昕婷踩到佢，沈心怡向前跪低喺地上，雙手撐着地，昕婷反應唔切，於是絆咗一下往旁邊跌

「呀！」兩個女仔同時叫咗一聲

「Sorry呀心怡⋯！你有冇事呀？」昕婷企起身拍乾淨雙手，然後蹲低問沈心怡

沈心怡一個負荊請罪嘅模式跪喺地上，李逸彤行到沈心怡嘅身旁將佢扶起，沈心怡起身後望一望自己嘅雙手同雙膝，雙手紅紅的，仲有啲刺痛，但冇明顯嘅擦傷痕跡；雖然左邊膝頭只係紅咗，但右膝卻有明顯嘅擦痕，仲有少少血滲緊出嚟

「昕婷你有冇事呀？」沈心怡回過神後第一時間望向昕婷嘅雙手，一臉擔心地關心道

「我冇呀⋯但你個膝頭都擦損咗啦⋯」昕婷一臉抱歉地望住沈心怡嘅膝頭

有女同學將啱啱嘅事話咗比老師聽，Miss聽到之後就行過嚟望一望兩個女仔嘅傷





「你地兩個都去一去醫療室啦，陣間有咩事就唔好啦。」Miss講道，然後喺佢地兩人嘅背上各拍咗一下，示意佢地宜家去醫療室

沈心怡同昕婷兩人便去咗醫療室一趟，當沈心怡同昕婷番嚟嘅時候，李逸彤第一時間跑到去沈心怡嘅面前將沈心怡打量一番

「點呀？你有冇事⋯？」李逸彤擔心地問道

「冇呀～」沈心怡搖搖頭，笑一笑，然後耷低頭望一望自己嘅膝頭，「只係有少少痛～」

當PE堂完咗之後就直接到放學時間，李逸彤同沈心怡孭住書包喺小食部等埋邱旻顯同潘景顥先走

「手仲係好紅⋯」李逸彤望住沈心怡嘅手心講道，「番去再洗下傷口呀⋯」

「知啦知啦～」沈心怡微笑着講道，「喺醫療室洗傷口嘅時候，真係痛。」

「你洗唔洗買紗布貼？」李逸彤指一指沈心怡嘅膝頭





「屋企好似有紗布⋯」沈心怡諗咗一諗後講道

潘景諭同邱旻顥孭住書包行到嚟小食部，兩個女仔就喺離小食部門口唔遠嘅位置，潘景諭一行到小食部，目光自然而然地落喺沈心怡嘅身上，然後就望到沈心怡嘅膝頭上貼住紗布

「你隻腳做咩貼咗紗布？今朝都冇㗎。」潘景諭自然地開口關心道

「啱啱上堂嗰陣整到⋯」沈心怡望一望自己嘅雙手手心，手心仍然係紅紅的，「擦到。」

「你會唔會番唔到屋企？」潘景諭望住沈心怡攤開嘅手心道

「我又唔係斷咗腳，點解會番唔到屋企？」沈心怡無奈地反一下白眼

「你叫潘景諭陪你番去囉～潘景諭你唔係要買嘢咩？」邱旻顥望一望沈心怡嘅膝頭後抬頭講道








IG Link: https://www.instagram.com/nd_cotttoncandy/?hl=zh-tw