［愛情純愛］我地之間嘅友誼純度絕對等於零！！！: 58. 莫名其妙

「我地之間獨有嘅距離感⋯」李逸彤托着額，喺心裏自言自語起嚟，「呀～真係想再拉近距離一啲⋯」

雖然心裏講着想拉近距離，但係「表白」呢一個想法仲未喺李逸彤嘅腦海中出現，畢竟，佢唔想自己同邱旻顥嘅關係退回原點

「順其自然⋯啦⋯？」李逸彤喺心裏輕嘆一口氣講道

到咗小息嘅時候，佢地四個人一齊落去小食部買嘢食，佢地企喺旁邊拎住手上嘅食物，好好享受一下休息嘅時候

「唔該借借⋯」一個初中生一臉唔好意思地對李逸彤講道





「哦唔好意思⋯！」李逸彤頓時向左邊行咗一步

初中生將垃圾掉入垃圾桶後便默默地行開，邱旻顥望一望喺李逸彤右邊嘅垃圾，一臉無言

「其實我地點解要企喺垃圾桶隔離⋯？」邱旻顥開口問道，「李小姐，點解你要企呢度？」

「咁我地行過啲囉⋯！啱啱多人嘛！」李逸彤推着邱旻顥往左邊嘅柱行去

潘景諭同沈心怡默默地跟住兩人行到另一邊嘅柱旁





「仲以為你係想同垃圾桶一齊食嘢。」邱旻顥淡然地笑一笑講道

「都話啱啱多人⋯！」李逸彤握拳，輕輕地喺邱旻顥嘅胸口上打咗一下，「邱旻顥你嘅耳仔係唔係有問題？」

「咩話？你講咩話？」邱旻顥嘅手貼住耳仔，開始裝模作樣起嚟，扮自己聽唔到李逸彤講嘢，「你講咩話？」

「我話啱啱多人呀！」李逸彤喺邱旻顥嘅耳邊提高聲量講道，然後微微側頭望住邱旻顥，「聽到未？」

「聽到聽到，差啲就聾咗。」邱旻顥比一個okay手勢，摸一摸自己嘅耳仔





「我怕你聽唔到嘛～」李逸彤笑着聳聳肩講道，「為你好咋～測試下你嘅聽覺嘛～」

「你真係對我好好，多謝晒⋯！」邱旻顥一臉無奈地敷衍道

「我對你不嬲都好㗎啦～」李逸彤望住邱旻顥微笑道

「哦哦，係囉～」邱旻顥望住李逸彤，臉上掛着淡淡嘅笑容

都唔知佢地係因為相視而笑，定因為見到對方嘅笑容而笑⋯

面對住兩人企嘅沈心怡同潘景諭望住兩人，然後默默地對望咗一眼

「點呀⋯我地可以食嘢未⋯？」沈心怡先開口問道

「嗯？」李逸彤回過神，然後露出不解嘅表情





「你兩個想點呀，比唔比我地好好食嘢啫？」潘景諭緩緩地開口講道

「你食嘢咪食嘢囉～邊個阻止你啫？」邱旻顥反一下白眼講道，佢知道潘景諭又想抽佢水，「係食就快啲食啦！餵埋你好唔好？」

邱旻顥一隻手繞過潘景諭嘅背搭住佢另一邊膊頭，另一隻手捉住潘景諭手上嘅嘢食

「唔洗啦多謝。」潘景諭推開邱旻顥嘅手，然後自己嘅手搭到邱旻顥嘅膊頭上靠着

李逸彤安靜地企喺一旁，沈心怡靠着李逸彤企，面向住小食部嘅入口

馨馨同佢兩個女仔朋友一齊落嚟小食部，離遠就已經留意到潘景諭喺度，當然佢都見到沈心怡⋯

兩個女仔對上視線，馨馨頓時將視線移開，然後稍微湊近旁邊嘅女仔低聲地講咗兩句





沈心怡目睹馨馨嘅舉動，心裏又冤枉又無奈，然後朝李逸彤行近咗一步

「做咩？」李逸彤望一望沈心怡問道

「馨馨好似嬲咗我⋯」沈心怡輕嘆一口氣後，無奈地細聲對李逸彤講道

「點解？因為個曲奇餅？」李逸彤輕皺起眉頭，「好小事咋喎⋯佢上星期都已經嬲緊⋯」

「嗯⋯！我又唔係冇幫佢⋯」沈心怡迴避馨馨嘅目光，細聲地對李逸彤講道

「不過算啦，馨馨本來都係小氣⋯」李逸彤望一眼喺離佢地不遠嘅位置行過嘅馨馨，細細聲地講道，「佢過幾日就冇事㗎啦～」

「最好真係啦⋯」沈心怡本來就係屬於善良嘅女仔，唔想同人地起爭執，所以總會遷就人

再加上沈心怡唔擅長拒絕人，怕令人地唔開心⋯久而久之，沈心怡比人嘅感覺就好似好好恰一樣，畢竟人善被人欺





沈心怡回頭望向馨馨嘅背影，心裏覺得馨馨好似講緊自己壞話一樣，明明最後自己有幫佢將曲奇比潘景諭，但宜家馨馨就因為潘景諭拒絕佢而發自己脾氣

「做咩？望緊咩？」潘景諭見沈心怡回頭一望後一臉沮喪，「做咩咁嘅樣？」

「望緊邊個男仔？」邱旻顥突然間加把口問道

潘景諭嘅神經頓時繃緊起嚟，瞬間望向邱旻顥，然後朝沈心怡背後嘅方向望咗兩眼

「一日最衰都係你呀⋯」沈心怡扁起嘴抬眼望住潘景諭

「呀？我？」潘景諭一頭霧水地收回視線，同沈心怡對望着，「點解係我？」

「你唔收馨馨嘅曲奇，搞到佢嬲咗我啦⋯」沈心怡一臉委屈地講道，唔知仲以為係啲咩天大嘅事，原來就只係收曲奇嘅問題，「馨馨份人又要面又小氣⋯你明知佢中意你，你仲當住我面拒收佢份曲奇⋯！」








IG Link: https://www.instagram.com/nd_cotttoncandy/?hl=zh-tw