［愛情純愛］我地之間嘅友誼純度絕對等於零！！！: 48. 借口

「痴咩線？」李逸彤紅着臉頰笑道，「拜拜。」

李逸彤同邱旻顥兩人離開戲院，李逸彤臉頰上嘅紅霞仍未褪去，心跳亦未能平伏落嚟

「好尷尬⋯」李逸彤自己笑了笑講道，然後望向邱旻顥，「去到星期一我地班嘅女仔應該都知道⋯」

「慣㗎啦⋯」邱旻顥無奈地反一下白眼講道，然後又望住李逸彤，「做咩呀，你驚呀？」

「嗯？驚呀！梗係驚啦！」李逸彤一臉認真地講道，然後腦袋一動，又想故意一下，睇下邱旻顥咩反應，又裝模作樣地道，「我地都冇嘢，怕人地誤會嘛～免得你冇人追啦～」





邱旻顥聽到李逸彤講嘅嘢，心裏有啲在意亦有啲不悅，然後輕輕地推咗李逸彤一下，將佢推離自己嘅身旁

「咁驚嘅話，下次唔好同我出街囉～」邱旻顥半認真半開玩笑地講道，「唔好同我睇戲囉～」

「嘻嘻～嬲啦嬲啦～」李逸彤滿意地偷樂着，然後一步行番去邱旻顥嘅身旁講道：「講笑咋講笑咋～我地仲要去食飯啦！」

邱旻顥嘅嘴角偷偷地上揚起嚟，本來聚緊起嚟嘅烏雲因為李逸彤嘅靠近同一句說話就散去

「淨係識食⋯！」邱旻顥無奈地講道，佢偷瞄李逸彤一眼，喺心裏道：「係唔介意人地誤會嘅意思⋯？冇估錯嘅話⋯」





「耶～食飯～」李逸彤高興地一蹦一跳的，「嗰間嘢我唔知喺邊，你帶路啦～」

「哦⋯」邱旻顥無奈地啲咗一聲

⋯

與此同時，潘景諭正坐喺書枱前做功課，白襪悠閑地行入潘景諭冇閂門嘅睡房

白襪行到潘景諭嘅櫈邊，抬起頭望住書枱，然後扭兩下屁股後一下子跳到枱上坐低





「白襪呀，你阻住我啦⋯」潘景諭無奈地放低筆，因為白襪坐正喺佢嘅功課上面

「喵～」白襪叫咗一聲，好似講緊「我冇阻住你」一樣

「唉⋯」潘景諭無奈地嘆一口氣，佢拎起手機望一望時間，自己都做咗功課成個半鐘有多

潘景諭望住白襪，無奈地提起左手摸一摸白襪，右手拎住手機；佢幫白襪影咗張相，然後send咗比沈 心怡，再加一個message：「佢唔比我做功課（反白眼）」

本來做緊功課嘅沈心怡見到潘景諭send咗嘢比佢，便停低手上嘅工作，拎起手機睇下潘景諭send咗啲咩比佢

「好可愛～」沈心怡對住潘景諭send過嚟嘅相，笑了笑講道，然後回覆道：「襪子好可愛（心心）」

潘景諭望住沈心怡send過嚟嘅message，伸手摸一摸舒服地瞓喺枱上嘅白襪

「心怡話你可愛呀⋯」潘景諭望住白襪講道，白襪合上眼打算小睡片刻，「大懶貓，淨係識瞓⋯」





沈心怡：比咗個理由你唔做功課

「佢只係單純地想霸咗我張枱瞓覺」潘景諭無奈地望咗白襪一眼後回覆道

沈心怡：休息一陣先再做功課囉～襪子都想你休息下

「咁既然白襪佢咁為我著想，我唯有休息一陣」

沈心怡：（笑喊）講到尾你自己都想休息

「你做緊功課？定溫緊書？」潘景諭望一望放喺枱上嘅電子鐘，估沈心怡呢個時間點上應該係做緊功課

沈心怡：做緊功課啦～差唔多做完，就差一題





沈心怡：寫到一半嘅時候，見到你send message比我（笑喊）

潘景諭見到沈心怡呢個回覆，笑意完全冇辦法忍住，直掛到臉上

「因為白襪跳咗上嚟，所以影比你睇，免得你掛住白襪」潘景諭回覆道

沈心怡：襪子超可愛～好乖

沈心怡：人地話物似主人形，佢唔似你，佢可愛太多

「物似主人形嘅話，你係唔係都要掛住我？」潘景諭心裏甜甜一笑

沈心怡：⋯（反白眼）

沈心怡：所以佢唔似你，我掛住襪子就好了





潘景諭笑了笑，佢都知道沈心怡唔受佢呢套；沈心怡望住潘景諭send過嚟嘅message，嘴角微微上揚

放喺枱上嘅電話忽然跳到去IG通話頁面，沈心怡拎起手機，見到係潘景諭打過嚟嘅電話，佢接咗電話

只見開咗Cam嘅潘景諭影住瞓喺枱上嘅白襪

「比你睇下白襪瞓覺嘅樣。」潘景諭將手機擺到去白襪嘅面前影住佢

「襪子最乖～」沈心怡笑了笑講道

此時白襪緩緩地睜開眼、打咗個喊露、起身、伸懶腰，然後跳到潘景諭嘅大腿上

「等陣⋯」潘景諭將手機轉用前置鏡頭，將手機放到手機架上，將手機架移到自己嘅正前方





潘景諭抱起白襪，好讓白襪面向住手機嘅方向，等沈心怡可以見到白襪




IG Link: https://www.instagram.com/nd_cotttoncandy/?hl=zh-tw