［愛情純愛］我地之間嘅友誼純度絕對等於零！！！: 46. 迴避

「要去買飛啦⋯！」邱旻顥回過神，伸手輕拍一下李逸彤嘅額頭

「呀⋯」李逸彤伸手輕輕地摸一下自己嘅額頭，「做咩打我呀⋯」

李逸彤小跑起嚟追上前，行喺邱旻顥嘅身旁，望咗邱旻顥一眼

喺搭地鐵嘅時候，邱旻顥企喺門邊貼住玻璃企，李逸彤企喺佢面前，一隻手捉住門邊嘅扶手

邱旻顥望一眼李逸彤，然後又默默地將視線移開；李逸彤留意到邱旻顥今日總係怪怪的，一臉疑惑咁望住邱旻顥





「今日佢做咩好似避開我視線咁⋯？」李逸彤喺心裏問道，「搞咩⋯」

列車駛入月台，喺剎車停落嚟嘅時候，整架列車晃咗一下

李逸彤因為沉思緊邱旻顥避開自己視線嘅原因而入神，搞到喺列車剎車嘅時候企唔穩，向邱旻顥嘅方向跌咗兩步，直接毫不留情地撞落邱旻顥身上

「呀嘶⋯」李逸彤不禁發出一聲，佢騰空嘅左手下意識地扶喺邱旻顥嘅腰上

邱旻顥嘅背後係玻璃，佢想避都冇得避，任由李逸彤撞入自己懷中一樣





因為怕李逸彤企唔穩，佢嘅手下意識地提起懸喺半空；李逸彤微微踮起腳尖，抬頭定睛地望住邱旻顥

邱旻顥同李逸彤嘅視線對上，腦海中浮現出琴晚發嘅夢嘅場景，佢不禁吞一啖口水

李逸彤嘅大腦一片空白，臉頰比佢嘅大腦更快作出反應，泛起淡淡嘅紅霞

「呃sorry⋯！」李逸彤回過神後嘅第一個反應，係向後退咗兩步

「唔緊要⋯」邱旻顥嘅耳根紅透了，佢撇開了臉想自己冷靜一下，同時喺心裏害羞地大喊：「最衰就係嗰個夢⋯！發埋啲咩夢啦！」





列車嘅車門打開，今日係星期六，上車嘅人都比平時多

「好多人⋯」李逸彤喺心裏道，然後默默地行前咗一步

李逸彤回頭望向車門，望住一直湧上車嘅人，邱旻顥望住李逸彤，望住佢嘅側面

「好多人。」李逸彤收回視線對邱旻顥細聲地講道，邱旻顥頓時將視線移開

腦海中又不禁諗起夢中李逸彤對佢講嘢嘅語氣，臉又開始熱起嚟

邱旻顥忍唔住偷瞄咗李逸彤一眼，佢默默地企好，背脊完全貼住身後嘅玻璃

「救命呀⋯點解咁多人㗎⋯」邱旻顥細細聲地抱怨一樣講道

「嗯？」李逸彤聽到邱旻顥講嘢但又聽唔清，便抬頭望向邱旻顥





「冇嘢⋯」邱旻顥微微搖頭講道

當列車駛進站時，邱旻顥抬頭望一眼站板，確認到站後側微微側身企準備落車

列車嘅門打開，邱旻顥先行一步行喺李逸彤嘅前方，因為門口塞門人，地鐵內好擠擁，邱旻顥行喺前面為李逸彤開路

李逸彤見邱旻顥行喺自己前面，便提手捉住邱旻顥嘅背囊

邱旻顥感覺到自己被扯咗一下，佢有啲怕李逸彤會比人逼到，亦怕自己個袋會爛，佢冇回頭，手朝住背囊嘅孭帶調節扣摸，掂到李逸彤隻手

邱旻顥一手捉住李逸彤嘅手腕，拉住李逸彤行出車廂行到月台上，直至行出咗人群，邱旻顥先將李逸彤嘅手鬆開

李逸彤見邱旻顥鬆咗手，心裏有啲失落，佢微微低頭望住自己嘅手腕，左手輕輕地捉住自己嘅右手手腕





感覺啱啱比邱旻顥捉住嘅位置好似識得發熱一樣滾燙⋯

李逸彤唔想咁快就鬆開邱旻顥嘅手，佢主動地行近邱旻顥，伸手拉住邱旻顥嘅手肘

「好多人。」李逸彤喺邱旻顥回頭望向佢時先開口講道，然後露出自然嘅笑容

邱旻顥由得李逸彤捉住自己，佢望住前方直行，偶爾回頭稍微望一下李逸彤，睇下佢有冇跟上自己嘅步伐

當走到冇咁多人嘅位置時，李逸彤喺心裏提自己要放手，然後佢將邱旻顥嘅手肘緩緩鬆開

「李逸彤，你跟住我，唔好走失。」邱旻顥回頭望向李逸彤，一臉認真地講道

「我又唔係三歲小朋友，點會走失！」李逸彤無奈地講道，目光落喺邱旻顥嘅手上，心裏有啲疑惑地道：「係因為佢想我繼續捉住佢⋯？」

「走失咗記得打比我。」邱旻顥自己都忍唔住笑起嚟講道，「企喺原地唔好行開。」





「當我小朋友呀？走失咗直接約喺出口等咪得囉！」李逸彤笑了笑，然後側側身避過身旁嘅人行到邱旻顥嘅旁邊，悄悄地伸手拉住邱旻顥嘅衫袖行

邱旻顥假裝自然地低頭，實際上佢只係想望一眼，確認李逸彤拉住自己，邱旻顥嘅嘴角微微上揚

因為假期嘅關係，人流都係比較多，行喺旁邊嘅人有啲同佢地行同一個方向，有啲卻係迎面而嚟，避到一個又避唔到第二個

「呀⋯sorry⋯」李逸彤喺閃避人群嘅時候唔小心踩到旁邊嘅男士一下，頓時細聲地講道

男士望一望李逸彤，然後抬一抬手示意唔緊要後，便快步向前行

怕撞到人嘅李逸彤，又朝邱旻顥嘅方向靠近咗一步，佢嘅手臂都已經貼住邱旻顥嘅手臂；李逸彤抬頭望向邱旻顥，邱旻顥若無其事地向前行








IG Link: https://www.instagram.com/nd_cotttoncandy/?hl=zh-tw