［愛情純愛］我地之間嘅友誼純度絕對等於零！！！: 41. 暖心

「嗱，見你咁凍，比你。」潘景諭將一直放喺衫袋嘅暖包拎出嚟

「暖包？」沈心怡伸手接過暖包，暖洋洋嘅感覺隨即由手心傳遍全身，因為暖包一直比潘景諭放喺衫袋中，所以拎出嚟嘅時候，暖包早就變得暖烘烘的，「你用暖包㗎咩⋯？」

「呃⋯今朝早出門口嘅時候，我媽話今日凍塞比我⋯」潘景諭講咗個小小嘅大話，「不過你知，我都唔用暖包嘅～」

潘景諭先唔想比沈心怡知道，呢個暖包係自己特登買嚟比佢，所以先要特登講一個大話隱瞞呢個暖包嘅來源

「哦⋯」沈心怡嘅雙手捉住暖包，暖包輕輕貼喺鼻尖上





潘景諭默默地望住沈心怡，望住沈心怡拎住暖包時，因為感覺到溫暖而露出嘅微笑令潘景諭嘅心裏好滿足，佢達到佢嘅目的

「你拎去用啦，我唔用暖包。」潘景諭對沈心怡講道，「而且，我仲要靠你幫我抄筆記。」

「知啦⋯！你就緊張我幫唔幫你抄嗰啲筆記啦⋯」沈心怡無奈地講道，下一秒抬起頭望住潘景諭自然地露出甜美嘅微笑，「不過，都多謝你個暖包啦～」

「嗯⋯」潘景諭比沈心怡甜美嘅笑容搞到個人都亂咗一下，心臟因為沈心怡嘅一個微笑，而加快咗跳動嘅速度，心裏細聲地反駁道：「先唔係緊張啲筆記⋯」

望住沈心怡嘅笑容，潘景諭覺得自己嘅心裏都暖暖的，或者因為突如其來嘅心跳加速，令佢渾身都有少許發熱一樣嘅感覺





兩個人一齊番到學校，喺佢地番到課室嘅時候，李逸彤同邱旻顥都已經番到學校喺課室

李逸彤啱啱開完locker拎嘢，正捧住一疊書行番埋位坐低

沈心怡同潘景諭行到埋位，潘景諭將書包除落嚟，拉開校褸嘅拉鏈將校褸除落嚟掛喺櫈背上；沈心怡同佢做著一樣嘅動作，只係沈心怡嘅頸上仍然繫着頸巾，將暖包從校褸嘅衫袋中攞出嚟放到裙袋中

「暖包都係跟身好啲⋯」留意到沈心怡一個舉動嘅潘景諭，喺微微耷低頭嘅時候，嘴角微微上揚

沈心怡將書包勾番好喺枱邊後，便行去開locker





「頭兩堂係視藝⋯小息後係LS同英文⋯」沈心怡蹲喺打開咗locker門嘅locker前，望住貼喺locker門上嘅時間表，然後拎咗LS書同一疊厚筆記同數學書出嚟

潘景諭望住沈心怡行番埋位，沈心怡將書疊好然後打橫放到櫃桶中，井然有條的；沈心怡放好晒啲嘢之後，就行去搵李逸彤

沈心怡將暖包從裙袋裏拎出嚟，雙手握住暖包，頓時心裏覺得暖暖的；潘景諭緩緩起身，然後行到去邱旻顥嘅座位旁邊

⋯

「比10分鐘大家做a part。」LS阿sir望一望時鐘講道

沈心怡嘅左手拎住暖包，右手拎住原子筆，埋頭苦幹地做題；潘景諭嘅右手拎住筆，諗緊要寫咩論點嘅時候，不自覺地朝沈心怡嘅方向望咗一眼

「太明顯⋯」潘景諭回神時發覺自己望住沈心怡，於是緩緩地將視線移開，就好似啱啱嘅事係好自然嘅事一樣

喺落堂之後，沈心怡將數學書同堂課簿從櫃桶中拎出嚟放到枱上





「沈心怡。」潘景諭叫咗沈心怡一聲，沈心怡隨即望向佢，「琴日佢叫我地數學堂課番去做邊？」

「Ex.7 part B 25-30呀⋯」沈心怡回答道，然後輕皺起眉頭，「你又冇做呀？」

「我做咗啦，confirm一下有冇做錯咋嘛～」潘景諭微微一笑講道

「哦⋯」沈心怡微微點頭，「仲以為你又冇做添⋯」

「又？講到好似我次次都唔做堂課咁⋯」潘景諭無奈地托着下巴道

「呀？你係真係幾乎次次都唔做⋯」沈心怡無奈地笑了笑道

沈心怡將放喺裙袋嘅暖包拎出嚟握喺手中，暖包因為放咗喺袋中一段時間，都已經變得熱熱的





「暖粒粒⋯」沈心怡喺心裏柔聲道，然後雙手握住暖包，「好想瞓覺⋯」

潘景諭手拎住筆，目光偶爾落喺沈心怡身上，見到沈心怡握住佢比嘅暖包，佢嘅嘴角不禁微微上揚

「好彩買咗暖包⋯」潘景諭喺心裏暗自歡喜道

佢知道沈心怡雙手總係凍冰冰的，感覺佢好似永遠都唔夠暖一樣，但沈心怡卻好少拎暖包，或者佢自己都慣咗自己雙手嘅冷⋯

⋯

喺上完數學堂之後就係lunchtime，但今日偏偏遲咗落堂⋯

「邱旻顥你執嘢快手啲啦⋯！我都要餓死啦⋯！」李逸彤企喺自己嘅座位，一隻腳跪喺櫈上，面向住邱旻顥催促佢道

「你點解次次都執得咁快㗎⋯」邱旻顥邊整理着枱面邊無奈地講道，「等我一陣啦，執緊啦⋯！」





「你執幾樣嘢都咁慢㗎⋯」李逸彤拎起邱旻顥枱上放着嘅原子筆把玩着，「肚餓⋯」

「執緊啦執緊啦⋯！」邱旻顥疊好枱上嘅嘢，然後將佢地一次過收入櫃桶入面




IG Link: https://www.instagram.com/nd_cotttoncandy/?hl=zh-tw