［愛情純愛］我地之間嘅友誼純度絕對等於零！！！: 38. 第一反應

邱旻顥嘅心裏明明覺得李逸彤係在意所以先會嬲，但佢偏偏想問個清楚，當問題到嘴邊時，佢又冇辦法自然地當開玩笑一樣講出嚟

「哈啾⋯！」李逸彤忽然間打咗個噴嚏，「哈啾⋯！呀⋯凍死啦⋯！」

邱旻顥抬起頭望一望頭頂嘅吊扇，都唔知邊個將風扇較到最大，頭頂上嘅三葉風扇正快速地轉動着

「哈啾⋯！」李逸彤又打多咗個噴嚏，不禁雙手抱着臂想令自己溫暖啲

「紙巾。」邱旻顥從褲袋中拎咗包紙巾出嚟遞比李逸彤，然後起身行到去黑板旁邊，將風扇嘅風力較至中速





邱旻顥嘅手仍然放喺課室吊扇嘅開關上，頭微微抬起，視線落喺佢地座位上面嘅風扇上

李逸彤抬起頭望住吊扇嘅轉速緩緩地變慢起嚟，佢望向邱旻顥，只見邱旻顥仍然望住風扇

「咁樣應該Okay啦掛⋯」邱旻顥喺心裏講道，佢嘅雙眼仍然專注地望住風扇

邱旻顥見風扇嘅轉速慢咗，感覺冇咁大風時，佢嘅目光由轉動中嘅風扇移到李逸彤身上

李逸彤比咗個Okay手勢佢，邱旻顥嘅手便離開咗開關然後行番埋位





「仲凍唔凍？」邱旻顥行到番埋位後又抬頭望一望風扇，然後坐低，喺目光同李逸彤對上之際，佢自然地開口問道，「再凍就著校褸。」

「哦⋯」李逸彤乖乖地點頭，視線跟住邱旻顥移動，直至邱旻顥坐低喺位

喺啱啱邱旻顥番到位後問李逸彤仲凍唔凍嘅一刻，李逸彤嘅心一下子暖起嚟

女仔最容易喺微細嘅事上感動，或者聽起嚟冇咩所謂，但認真諗下，有幾多個人會真係喺聽到你話凍嘅時候，第一反應係起身幫你將風扇較細？

「乖。」邱旻顥見李逸彤乖乖地點頭，自然地伸手輕拍李逸彤嘅頭頂兩下





李逸彤微微耷低頭，臉頰泛起淡淡紅霞，耳根淡紅的

邱旻顥收回手，手下意識摸一摸後頸，微微耷低頭

「我今日冇帶紙巾原來⋯！」啱啱彎腰打開書包睇完嘅李逸彤坐好起嚟

「呢包比你。」邱旻顥微微聳肩，冇所謂地講道，「我仲有。」

「咁紙巾我就收咗佢啦～」李逸彤微微一笑，然後將放喺邱旻顥枱上嘅紙巾收入自己嘅裙袋中

李逸彤嘅手仍然放喺裙袋中，佢喺心裏甜甜一笑，其實都只係一包紙巾，與別不同嘅只係包紙巾係邱旻顥比佢

邱旻顥悄悄地留意住李逸彤嘅表情，一個微細嘅表情都好，邱旻顥都會睇喺眼內

「點解佢成日都咁可愛咁⋯？」邱旻顥見到李逸睇臉上掛着甜甜嘅笑容時，不禁紅了耳根同時忍唔住喺心裏講道，然後伏低喺枱上，「唔好再咁可愛拜托⋯！」





李逸彤安靜地望住邱旻顥，伸手摸一摸佢嘅頭頂；邱旻顥心裏一震，因為耷低頭，頭埋喺雙臂間，所以佢根本睇唔到李逸彤做咩

「佢又做咩⋯？」邱旻顥喺心裏道，伏喺枱上嘅佢，聽着自己心跳嘅聲音

或者，因為伏喺枱上，雙臂為自己劃咗一個空間，令心跳聲好似近在咫尺一樣，回音亦變得更強

李逸彤嘅手一直摸着邱旻顥嘅頭髮，邱旻顥亦冇反抗，一直伏着

「好香檸檬味⋯」李逸彤聞到淡淡嘅檸檬香味，直覺話佢知係邱旻顥嘅頭髮嘅香味，李逸彤緩緩開口：「你朝早番嚟前洗咗頭呀？」

「呀？係呀。」邱旻顥緩緩抬起頭，然後坐好起嚟，「每日都洗㗎啦⋯」

「檸檬味好清爽，好啱你。」李逸彤笑了笑，冇諗太多就直接講出心裏嘅想法





「係、係咩⋯」邱旻顥面對毫不掩飾嘅李逸彤，不禁紅了耳根，微微耷低頭同時伸手撥一撥頭髮

「嗯！」李逸彤笑着點一點頭，啱啱嘅嗰一陣清新檸檬味喺佢嘅腦海中飄過

李逸彤不禁一笑，睇嚟嗰股清新嘅香味，已經刻咗喺李逸彤嘅腦海中；邱旻顥悄然抬眼，見到李逸彤開朗嘅笑容時，佢嘅臉頰不禁發熱

「以後記得同我講早晨⋯」李逸彤微微耷低頭，假裝不經意地細聲講道，邱旻顥聽到佢講嘅嘢，有啲愕然地抬眼望佢，「如果唔係，下次真係要嬲啦⋯」

「知啦⋯！」邱旻顥回過神後，臉上掛上同平時一樣嘅陽光笑容，「你今次都嬲咗啦唔係咩？」

「我有咩？」李逸彤當咩都冇發生過，裝作唔明白邱旻顥講啲咩一樣微微側着頭

「冇咩？」邱旻顥笑了笑問道，佢總係輕易地比李逸彤嘅笑容感染着

「冇呀～」李逸彤笑着搖頭





⋯

Lunchtime

四個人去到餐廳坐低，點完餐等緊嘅時候，邱旻顥見到兩個女仔忽然間喺度對比緊自己嘅手同對方嘅手嘅大小

「心怡你隻手好細⋯！」李逸彤有啲驚訝地講道，「仲細過我隻手！」

「係喎～我都冇留意到呢～」沈心怡笑一笑，「但我地隻手都唔係差好遠嘛～」

「你隻手真係好靚啦～」李逸彤捉起沈心怡白皙嘅手，手指修長，指甲嘅長度亦剛好突出少許，關節位亦比較瘦削，「又白又滑～」








IG Link: https://www.instagram.com/nd_cotttoncandy/?hl=zh-tw