［愛情純愛］我地之間嘅友誼純度絕對等於零！！！: 36. 生氣

「咁約早少少啦～」李逸彤當然想同邱旻顥一齊行一陣先再去食嘢，畢竟約早啲嘅話，見面嘅時間先會長啲

邱旻顥：1500樓下，星期六

「好呀～」李逸彤回覆時，臉上都掛着甜甜嘅笑容，「到時見」

邱旻顥：你聽日唔番學咩？聽日都會見到呀

「小學雞⋯」李逸彤默默地反一下白眼講道





邱旻顥嘅手機放喺旁邊，此時嘅佢正不急不忙地做緊功課，同李逸彤見唔到嘅時間裏，兩人都係一直互相send message比對方，用呢種方法嚟解決相思之苦

邱旻顥中意番學，番學可以見到朋友，而且對佢嚟講可以見到李逸彤就係最好，雖然有時上堂好悶，有啲科佢一啲都唔中意上，但係李逸彤喺佢附近就好，可以見到李逸彤就好⋯

「明明自己都係小學雞⋯」邱旻顥望住李逸彤send過嚟嘅message，無奈地笑道

邱旻顥拎起筆，先寫下題目嘅答案，然後拎起手機回覆李逸彤

就算只係普通嘅對話，只係講下日常事無聊事，對邱旻題同李逸彤嚟講，都係培養感情嘅最佳方法





就算兩人之間，唔會將曖昧不明嘅說話掛喺嘴邊，彼此始終都會感覺到對方嘅一絲好感

「咁聽日見囉～」李逸彤回覆道，「聽日見呀！」

邱旻顥頓時比李逸彤可愛到，笑着回覆道：聽日見呀，要番學嘛，除非你唔番㗎啫

「我呢啲乖學生點會唔番學？」李逸彤回覆道，「我又唔係你（反白眼）」

邱旻顥：我有幾可會唔番學？最多都係遲少少啫





邱旻顥：你有邊日番學見唔到我？

「點知你？」李逸彤回覆道，諗一諗後笑了笑，又開始打字：「我又唔係為咗見你先番學⋯（反白眼）」

當然，番學嘅目的唔會係為咗見邱旻顥，但邱旻顥係李逸彤番學嘅動力⋯之一

⋯

李逸彤換上校服、繫好校呔、著上背心裙，然後再著上長袖冷衫、著上中長襪；李逸彤孭起書包行出睡房，行到屋企門前，企喺門前著上皮鞋後打開門同鐵閘，然後踏出家門番學

「呵～欠⋯」李逸彤邊行邊打咗個喊露，行到外面等電梯

本來停喺30樓嘅電梯上咗兩層，嚟到32樓後打開門，李逸彤行入電梯企喺門邊

電梯落到27樓嘅時候，李逸彤嘅心裏有啲緊張，佢期待緊當電梯到25樓嘅時候，電梯會停落嚟，喺門緩緩打開後會見到邱旻顥





但今日嘅電梯到咗25樓之後，並冇停落嚟⋯而係直接到咗17樓先停落嚟

李逸彤行出電梯、走出大堂，朝外面嘅大直路望去，卻冇見到邱旻顥嘅身影；李逸彤又回頭望向大堂一眼，冇人從大堂行出嚟

「唔通佢今日早咗出門口⋯？」李逸彤將手機翻過嚟螢幕向上，螢幕一亮，李逸彤望一望時間同時喺心裏講道

李逸彤行起嚟時嘅步速不自覺地加快，行到落地鐵站，到咗月台時，下意識望一望周圍

「唔通已經番咗學校⋯？」李逸彤喺心裏疑惑地道，「定未出門口⋯？」

李逸彤望一望手機，手機嘅螢幕亮起，但喺鎖屏上冇一個message係邱旻顥send過嚟

「唔通未起身⋯？」李逸彤心裏突然有啲擔心，平時佢同邱旻顥起身後，都會喺snapchat或者IG講早晨，今日卻冇收到邱旻顥send比佢嘅早晨，「病咗⋯？」





李逸彤打開IG，平時邱旻顥喺snapchat send完早晨後，會私下再同李逸彤喺IG講早晨

「未睇⋯」李逸彤見自己今朝早send比邱旻顥嘅早晨，邱旻顥仲未睇，「唔通真係未起身？佢起咗身嘅話，一定會睇㗎喎⋯」

李逸彤望住自己嘅message仲顯示住「Sent 25m ago」，佢心裏有啲擔心邱旻顥係唔係病咗之類

「定佢已經番咗學校？」李逸彤邊諗邊行入車廂，企喺車門邊嘅位置，「但佢冇同我講早晨⋯」

李逸彤番到學校，行到去課室嘅門前，轉動門柄推門行入課室，一踏入課室後，李逸彤嘅雙眼微微瞪大

「邱旻顥番咗嚟原來⋯」李逸彤回復平靜，但心裏有啲在意有啲嬲，「佢冇同我講早晨⋯」

李逸彤行到番埋位嘅時候，見到邱旻顥坐喺位做緊功課，李逸彤喺冇人留意到嘅情況下微微鼓起兩泡腮，帶着滿滿嘅不悅拉開自己位嘅櫈坐低

邱旻顥一直耷低頭趕功課，完全冇發現到李逸彤今日嘅唔一樣





上堂嘅時候⋯

「李逸彤，借你本書嚟望下，我抄唔切⋯」坐喺李逸彤後面嘅邱旻顥用筆輕戳咗李逸彤嘅膊頭兩下

「嗯。」李逸彤淡淡地嗯一聲後將自己本書傳到後面比邱旻顥

「唔該⋯」邱旻顥見到李逸彤將書傳比自己時怔了怔，心裏終於察覺到奇怪點，心裏有啲困惑地道：「佢係唔係唔開心，之類⋯？」




IG Link: https://www.instagram.com/nd_cotttoncandy/?hl=zh-tw