［愛情純愛］我地之間嘅友誼純度絕對等於零！！！: 21. 他的貓

邱旻顥買完嘢飲，自動地行到一旁等埋李逸彤，李逸彤手上拎住一支巨峰玉露嘅提子味飲品同一包炸雞柳

「食埋先番上去？」李逸彤行到一旁企着

「哦好呀。」邱旻顥微微點頭，企喺李逸彤嘅身旁，趁住小息嘅時間拎手機出嚟睇

李逸彤嘅雙手都拎住嘢，一時三刻有啲手足無措，一時左手拎嘢飲右手拎嘢食，一時又倒番轉，但卻搵唔到一個方法可以食到嘢

「邱旻顥，幫我拎一拎⋯」李逸彤將支嘢飲遞比邱旻顥，自己就可以騰出隻手嚟食嘢





「嗱。」邱旻顥收起手機接過嘢飲後，順手就將樽蓋打開，然後遞番比李逸彤

「遞番比我做咩⋯？」食緊嘢嘅李逸彤一臉疑惑

「你唔係叫我幫你開蓋咩？」邱旻顥輕輕挑眉

「我叫你幫我拎一拎⋯」李逸彤無奈地反一下白眼，「我拎埋嘢飲嘅話，我冇手食嘢⋯」

邱旻顥一手拎住李逸彤嘅飲品，一手拎住自己嘅嘢飲，與此同時，邱旻顥百無聊賴地望下周圍，因為宜家佢都冇手可以騰出嚟睇手機





邱旻顥嘅視線最終都係落番喺李逸彤身上，佢定睛望住李逸彤

「琴晚你瞓得好冧。」邱旻顥笑了笑，忽然提起琴晚嘅事

「吓⋯！？」李逸彤頓時因為唔好意思而紅了臉頰，「我唔小心咋嘛～你見我瞓咗之後幾耐先收線？又唔叫醒我⋯」

李逸彤帶着少許私心問邱旻顥，佢都想知道邱旻顥係唔係見佢瞓咗就即刻收線

「我有叫你呀，叫咗你成半個鐘呀⋯」邱旻顥無奈地講道，「見你真係冇醒先收線㗎。」





「原來都唔係即刻收線～」李逸彤喺心裏偷樂着，嘴角微微上揚着地咬咗一啖炸雞柳，「仲要呆等咗半個鐘～」

李逸彤將炸雞柳都食晒後，行到另一邊將膠袋掉入垃圾桶，回頭嘅時候見到邱旻顥企喺原地等佢，心裏頓時甜甜地笑起嚟

「行得啦～」李逸彤行到邱旻顥嘅面前，伸手接過自己嘅飲品，擰開樽蓋先呷一啖

兩人一齊番上課室，番到課室嘅時候，潘景諭同沈心怡已經喺課室

潘景諭坐喺位睇手機，沈心怡伏喺枱上小睡片刻；李逸彤一番到課室見到沈心怡，就先朝沈心怡嘅座位行去

「心怡唔舒服呀？」李逸彤細聲地問潘景諭

「唔係呀，佢話有啲攰想恰一恰。」潘景諭抬頭望咗李逸彤一眼講道，然後將視線轉向沈心怡，「陣間打鐘佢會起身。」

「仲諗住問下佢陣間想食咩添⋯」李逸彤望向沈心怡，「你有冇咩意見？」





「冇，我咩都食，都係睇佢同你㗎啫～」潘景諭笑了笑講道

潘景諭其實只係睇起嚟高冷，事實上佢同李逸彤佢地都多嘢講，對唔熟嘅人唔太講嘢，但都係對人nice嘅一種

「呀，差唔多夠鐘⋯」李逸彤回頭望一眼掛喺黑板旁嘅時鐘，「我去個廁所先⋯」

李逸彤講完便轉身行番位，放低嘢飲後直接行出課室去廁所

喺李逸彤行咗出課室後，沈心怡醒過來緩緩坐起身，潘景諭眼睛嘅餘光見到沈心怡坐起身後抬頭望向佢

「瞓醒啦？」潘景諭望向沈心怡問道，「李逸彤啱啱出咗去。」

「嗯⋯」沈心怡揉揉眼，手伸向放喺枱邊嘅膠水樽





潘景諭嘅目光停留喺沈心怡嘅身上，沈心怡好似冇察覺到一樣，擰開樽蓋飲啖水清醒下

「咳、咳、咳⋯！」沈心怡比水嗆到，頓時咳咗兩聲

「你點呀？」潘景諭輕皺起眉頭，然後從褲袋中拎咗包tissue比沈心怡

「咳⋯！冇、冇事⋯！咳、咳⋯！」沈心怡輕拍心口，將水放番低喺枱上，伸手接過潘景諭手上嘅紙巾，「唔該⋯咳咳！」

「沈心怡，過嚟。」潘景諭望住手機，然後對沈心怡招一招手，「比嘢你睇。」

「嗯⋯」沈心怡緩緩起身行到潘景諭嘅身旁，一望到潘景諭嘅手機內容，頓時就笑出嚟，「哈哈！好似襪子！」

「白襪都會咁。」潘景諭笑了笑講道

白襪，係潘景諭屋企養嘅貓，係一隻黑貓，四隻腳係白色；沈心怡中意叫白襪做「襪子」或者「襪襪」





「襪子真係好可愛，好耐都冇見過襪子～」沈心怡笑道，「你有冇影襪子嘅相呀？」

「有呀，琴晚佢瞓到反肚，但佢琴晚好曳，一腳踢落個水兜度⋯」潘景諭一邊開出手機嘅相簿一邊講道，「嗱。」

潘景諭將手機遞比沈心怡，沈心怡一直掃着螢幕睇相

「佢隻腳腳好可愛～」沈心怡嘅笑容甜甜的，佢本來都中意貓貓，所以潘景諭嘅貓，佢都中意

「跟我番去見佢囉～」潘景諭笑道，「白襪一到夜晚就發癲，琴晚我瞓到半夜，佢一下跳上嚟踩落我個肚度⋯」




IG Link: https://www.instagram.com/nd_cotttoncandy/?hl=zh-tw