［愛情純愛］我地之間嘅友誼純度絕對等於零！！！: 16. 來打劫嗎？

「哦唔該。」邱旻顥伸手去拎銀包，但邱茗然卻默默地拎住銀包縮手，「銀包比我。」

「你比$100我，我比番銀包你。」邱茗然將銀包抱喺懷中

「你冇錢咩？」邱旻顥一臉無奈地問道，「你拎個銀包比我都要收$100？」

「我今日淨係帶咗$30，冇錢食lunch。」邱茗然打開邱旻顥嘅銀包，「哥哥你要比$100我食飯，拎番銀包，定唔比$100亦唔要銀包？」

「你條女呀邱旻顥？」一個路過嘅男同學見到邱茗然喺度便笑問道





「我個妹呀搞笑。」邱旻顥不禁反一下白眼，「嚟打劫我。」

「$100。」邱茗然又重複道，「定你想我今日痴住你食飯？」

「得啦得啦得啦，比你比你！」邱旻顥一聽到就怕咗邱茗然，即刻投降，「喺銀包拎啦！」

邱茗然毫不客氣地打開邱旻顥嘅銀包，喺入面拎咗$100， 然後將銀包比番邱旻顥後轉身就走

「都唔知佢係嚟打劫我定還銀包。」邱旻顥無奈地講道





「應該兩樣都係～」李逸彤望住邱旻顥個無奈樣不禁笑道

邱茗然行到去課室嘅門口，潘景諭剛好去完廁所番嚟課室

「你上咗嚟嘅？搵邱旻顥？」潘景諭見到邱茗然便問道

「嗯！哥哥今朝早漏咗銀包冇帶，我上嚟拎番銀包比佢～」邱茗然笑道，「我落番去先啦～拜拜諭哥哥！」

邱茗然講完就轉身小跑行去前梯，潘景諭行入課室，行到邱旻顥嘅座位





「啱啱喺門口見到茗然。」潘景諭講道，「佢話嚟拎番銀包比你。」

「係咩⋯佢似係借拎番銀包比我為名，想打劫我為實囉⋯」邱旻顥無奈地講道

潘景諭同李逸彤頓時無奈地笑，邱茗然都知道潘景諭、李逸彤同沈心怡，畢竟佢地成日都同自己哥哥一齊，特別係同邱旻顥由中一friend到宜家嘅潘景諭

「沈心怡呢？」潘景諭忽然間發現沈心怡唔喺度，「佢出咗去？」

「心怡？唔知喎⋯」李逸彤向沈心怡嘅座位，卻見唔到沈心怡個人

一講曹操，曹操就到，沈心怡就拎住嘢飲行入課室，直接行到李逸彤佢地嗰邊

「你去邊呀啱啱？」李逸彤頓時問道，下一秒見到沈心怡手上拎住四盒嘢飲，「你幫我地買埋呀？」

「係呀～啱啱落咗一樓交嘢嘛～順便落去一轉囉～」沈心怡微微一笑，將嘢飲放低喺枱上，自己先拎起買比自己嘅維他奶，「你地拎啦～」





「你真係好呀～」李逸彤攬住沈心怡，「第時識咗男朋友點算呀～邊個比你中意，簡直係三生有幸！」

「上世應該幫一萬個阿婆執咗橙。」邱旻顥笑道，佢都唔否認沈心怡係個好女仔，不過邱旻顥對沈心怡絕對冇朋友以上嘅感覺，因為佢淨係對李逸彤先有朋友以上嘅感覺

「都好難講嘅～」沈心怡臉上掛上了甜甜嘅笑容，佢嘅微笑中總有種自然嘅可愛同甜

「咦～聽你咁講，我嘅直覺話我知，你有古怪呀～」李逸彤望住沈心怡，瞇起雙眼、嘴角上揚問道，「我地嘅心怡，係咪有中意嘅人啦～」

「咩呀～」沈心怡笑得更開心，雙眼都瞇成一條線，「咁你地同我做朋友，你地都好有幸呀～」

邱旻顥同潘景諭默默地望住眼前兩個女仔，因為冇佢地插話嘅餘地，女仔嘅談話，就係冇男仔嘅份

「呀⋯阿諭，啱啱書柔搵你。」沈心怡平靜落嚟，抬頭望向企喺自己隔離嘅潘景諭，「佢問你交咗班會費未。」





「係喎⋯」潘景諭比沈心怡一提就記得，自己上星期仲未交班會費，「宜家交。」

沈心怡望住潘景諭行到許書柔嘅座位，潘景諭拎出銀包交班會費，沈心怡冇多理，收回視線同時伸手挽住李逸彤嘅手

⋯

「今日就唔等你地啦～我地走先啦～」李逸彤同沈心怡喺放學嘅時候對兩個男仔講道，「拜拜～」

「拜。」「拜拜。」

邱旻顥同潘景諭無奈地對佢地揮手講拜拜

兩個女仔喺lunchtime嘅時候講咗，放學嘅時候一齊去試一間新開嘅cafe，係，著住校服去，揀日不如撞日

兩人去到cafe坐低，各點咗一份甜品同一杯飲品





「你嗰日同邱旻顥出去點呀？」沈心怡一臉好奇地問道，果然女仔都係中意八卦啲戀愛事

「都係咁啦，睇咗場戲囉～」李逸彤托住腮講道，「冇咩特別。」

「就知你中意佢啦～」沈心怡嘅嘴角上揚，「我覺得，佢應該唔多唔少都對你有啲好感嘅～」

「係掛～宜家同佢好似有啲唔知點咁，真係朋友以上，我感覺到⋯」李逸彤輕嘆一口氣講道，「慢慢啦～再培養下感情先～」

李逸彤一講起邱旻顥，佢個心就「噗噗！噗噗！」咁跳，諗起今日邱旻顥主動問佢食唔食一啖麵包，又唔介意食佢口水尾，心入面都會忍唔住偷笑




IG Link: https://www.instagram.com/nd_cotttoncandy/?hl=zh-tw