［愛情純愛］我地之間嘅友誼純度絕對等於零！！！: 12. 細心的他

兩人食完嘢，去咗戲院附近嘅一間7仔買嘢飲

「你飲咩？」邱旻顥打開雪櫃拎咗枝蘋果綠茶同時問李逸彤

「我飲⋯未諗到，比啲時間我⋯」李逸彤猶疑不決地望住雪櫃入面嘅嘢飲

「哦⋯」邱旻顥見李逸彤仲未揀好嘢飲，便打算行去隔離睇下小食先，等李逸彤揀好之後再行番嚟

「喂⋯」李逸彤伸手拉住邱旻顥，邱旻顥頓時停低喺原地



邱旻顥望一望自己比李逸彤拉住嘅手，默默地行到李逸彤嘅身旁站着

「飲柑桔檸檬好定飲蘋果綠茶好？」李逸彤嘅指一指兩款飲品，然後望向邱旻顥

「蘋果綠茶。」邱旻顥淡然地講道

「好啦～」李逸彤聽到邱旻顥幫佢決定好嘅時候，所有猶疑都消失了，直接打開雪櫃拎咗枝蘋果綠茶遞比邱旻顥

邱旻顥拎住兩枝蘋果綠茶去比錢，行喺佢身後嘅李逸彤望到邱旻顥都係揀蘋果綠茶，心裏不禁有啲開心



「佢特登幫我揀蘋果綠茶？」李逸彤喺心裏偷笑着道，雖然唔知道係自己諗多咗定點，但總之就係開心

或者暗戀一個人、中意一個人嘅時候就係咁樣，飲同一款飲品都覺得係緣份，會先自動假設對方係故意

喺入咗場等開場嘅時候，邱旻顥先將嘢飲從袋中拎出嚟

「嗱。」邱旻顥將嘢飲遞比李逸彤

李逸彤一接過嘢飲嘅第一件事係擰開樽蓋，但唔知係因為手凍定樽蓋太實，李逸彤點擰都擰唔開



邱旻顥眼見李逸彤開唔到樽蓋，二話不說即刻伸手過去將嘢飲從李逸彤手中拎走，幫佢擰開樽蓋

「Thank you⋯」李逸彤細聲地講道同時接過嘢飲，然後先飲咗一喺蘋果綠茶

李逸彤飲咗一啖後偷偷一笑，今日嘅蘋果綠茶甜咗好多

電影院嘅燈光慢慢地變暗，電影開始，邱旻顥嘅手放喺扶手上托住頭，佢本來就冇特別中意睇愛情電影，但因為李逸彤想睇佢先睇

「哈啾⋯！」電影睇到中途，李逸彤打咗個噴嚏，佢故意壓住聲線免得太大聲影響到人

邱旻顥打開放喺大腿上嘅袋，從袋中拎咗件外套出嚟放到李逸彤嘅大腿上，然後若無其事地繼續睇電影

李逸彤有啲意外地望住放到自己腿上嘅外套，望一望邱旻顥

「佢今日出嚟嗰陣都冇著外套⋯」李逸彤諗起今日佢地喺樓下見面嘅時候，邱旻顥身上冇著外套



李逸彤嘅嘴角微微上揚，然後將外套蓋喺大腿上；邱旻顥用眼睛嘅餘光望咗李逸彤一眼

外套係佢今日出門口嘅時候袋定喺袋入面，佢怕戲院會凍，但李逸彤冇帶外套，所以放定喺袋入面以備不時之需

李逸彤將外套稍微拉上，蓋到大腿亦可以蓋到前臂嘅一半

喺電影完結播放工作人員名單時，影院內嘅燈緩緩亮起，亮起柔和嘅燈，李逸彤將蓋喺腿上嘅外套拎起摺好遞比邱旻顥

邱旻顥接過接好嘅外套放番入袋入面，兩人起身行出電影院

「食唔食埋夜晚？」邱旻顥問道，「唔食嘅話就番去⋯」

「唔⋯我仲未餓⋯」李逸彤扁一扁嘴，手摸一摸肚子講道，「行一陣再去食飯啦～」



「好呀～」邱旻顥笑一笑，心裏都鬆一口氣，啱啱佢心入面幾擔心李逸彤話唔一齊食晚飯，真係要番屋企

雖然大家都係住同一幢樓，但感覺唔一樣，番去嘅話係代表約會結束，兩者有差別的

兩人行番去太古城中心嗰邊，朝住書店嘅方向行去

「你睇書㗎咩？」邱旻顥問李逸彤道

「冇咩特別⋯」李逸彤回頭望咗邱旻顥一眼講道，「隨便行下咋嘛～」

「你今晚想食咩？」邱旻顥行到李逸彤身旁

「冇所謂呀～你有咩提議？」李逸彤行到放着一疊一疊書嘅啡黑色大木枱前

「食唔食上面嗰間Spaghetti House？」邱旻顥隨手拎起一本打開掀咗兩下



「哦好呀～宜家仲好早啫，仲要5分鐘先到6點～」李逸彤邊講邊行遠

李逸彤行到邱旻顥對面，指尖輕輕掃過放喺木枱上嘅書，佢行到邱旻顥斜對面嘅時候停低落嚟，隨便地望一枱上都放咗咩書，沿住書海望去，目光漸漸地由眼前嘅書到旁邊嘅書，由旁邊嘅書到對面嘅書，由對面嘅書緩緩向上望，停喺邱旻顥嘅臉上

「佢安靜落嚟都幾唔錯嘅～」李逸彤偷偷地一笑同時喺心裏講道

雖然李逸彤喺心入面咁樣講，但其實就算邱旻顥安唔安靜落嚟都好，李逸彤嘅心入面，都係對佢有一定程度嘅好感

李逸彤悄悄地望邱旻顥一眼，又悄悄地將視線移開；喺李逸彤移開視線嘅同時，邱旻顥悄悄地抬眼望向李逸彤




IG Link: https://www.instagram.com/nd_cotttoncandy/?hl=zh-tw