［愛情純愛］我地之間嘅友誼純度絕對等於零！！！: 10. 兩人之間的秘密

李逸彤喺枱底輕踢咗邱旻顥一腳，邱旻顥抬眼望一眼李逸彤，然後輕踩佢一腳後又扮咩事都冇發生一樣耷低頭繼續食嘢

食完飯番到學校之後，李逸彤番埋位，稍微執一下自己嘅課本，陣間再去開locker

「喂。」邱旻顥細聲地叫咗李逸彤一聲，李逸彤回頭望向邱旻顥，「你同我睇套戲定同沈心怡睇？」

邱旻顥忍唔住先一步問李逸彤，喺啱啱番嚟嘅路上佢已經喺度諗緊呢個問題，諗緊李逸彤會唔會因為沈心怡講話同佢睇套戲而甩自己底

「噗⋯」李逸彤聽到邱旻顥嘅提問忍唔住笑咗出嚟，佢覺得邱旻顥好似好在意呢個問題，「同你睇呀～」





李逸彤笑着細聲地對邱旻顥講道

「上星期先同你約咗。」李逸彤從櫃桶抽出lunchtime前嘅堂嘅書，攬住書企起身，「我唔會甩你底嘅～」

邱旻顥望住李逸彤企起身行離座位，望到李逸彤嘅笑容嘅佢默默地耷低頭，喺無人知曉嘅情況下悄悄地紅了耳根

「我冇擔心你會甩我底⋯」邱旻顥口不對心地講道，「我都係問下你係打算同邊個睇啫～」

李逸彤嘅locker剛好喺佢嘅座位旁邊，跪喺locker前拎緊嘢跪李逸彤聽到邱旻顥講嘅嘢，嘴角微微上揚，然後回頭望向邱旻顥





「總之我地約咗先嘅，我就唔會甩你底啦～」李逸彤對邱旻顥微笑道

「哦⋯」邱旻顥抬眼望李逸彤一眼，剛好撞上佢嘅笑容，瞬間又將視線移開

李逸彤又擰轉身繼續從locker中拎嘢，邱旻顥用眼睛嘅餘光偷偷地留意着李逸彤

李逸彤渾身都散發着開朗活潑嘅氣息，連笑容都冇辦法掩蓋佢嘅開朗

或者，邱旻顥當初都係比佢呢一種開朗嘅個性吸引⋯不知不覺地就想了解佢更多，不知不覺地對佢產生好感





李逸彤閂上locker嘅門，起身轉身行兩步番自己位坐低

「好期待星期六～」李逸彤喺心裏高興地講道，「呀，陣間要同心怡講聲先⋯」

李逸彤坐低放好啲嘢之後，默默地轉身望咗邱旻顥一眼，邱旻顥托住頭睇手機

「咩？」邱旻顥察覺到李逸彤望住佢，抬頭望住李逸彤

「咩？你係羊？」李逸彤忍唔住笑道，「羊咩咩係你啦！」

「你真係⋯低能⋯」邱旻顥一臉無奈地講道，佢嘅左手插喺校褸嘅衫袋中，「今日已經凍，你唔洗講爛gag令溫度更凍。」

「咩啫～」李逸彤吐吐舌頭，「星期五係唔係去買飛呀？」

「係呀，做咩？」邱旻顥將手機收起放到褲袋中，「你唔洗旨意要我自己一個人去買飛呀⋯！你講咗一齊去㗎！」





「我知我知⋯我都係問下啫～」李逸彤無奈地講道，然後笑一笑又道：「你好想同我一齊去買飛咩？唔洗掛住我㗎喎～」

李逸彤故意咁樣開玩笑講道，實際上佢想睇下邱旻顥有冇啲咩破綻，佢只係想睇下邱旻顥對自己係唔係都有感覺，同時都想驗證一下自己嘅想法

「同係唔係掛住你一啲關係都冇⋯」邱旻顥反一下白眼，「你講咗一齊去買飛㗎嘛～」

「我知我知～」李逸彤微微點頭，「一齊去買飛咪一齊去囉～」

⋯

星期五放學

李逸彤同邱旻顥兩人搭車去戲院嘅途中，李逸彤睇緊套戲喺星期六嘅場次





「你想睇幾點呀？」邱旻顥望住李逸彤嘅手機螢幕問道，「1點？3點40？」

「3點40好唔好？」李逸彤問邱旻顥道，「睇3點場嘅話就可以食個lunch先再去睇戲⋯」

「唔⋯可以呀。」邱旻顥諗都冇諗就答應，對佢嚟講反正星期六都冇嘢做，套戲又係李逸睇想睇，當然就係李逸彤話事

兩人去戲院買完飛之後，兩張戲飛都比咗李逸彤keep住，兩人又搭番車番屋企

「聽日我地約2點？」邱旻顥問道，「2點樓下等？」

「Okay～」李逸彤比咗個Okay手勢，「好期待套戲～想睇好耐啦～」

「你講咗好多次啦⋯」邱旻顥無奈地講道，「聽到耳仔都攰⋯」

「我好期待套戲！想睇好耐啦～」李逸彤捉住邱旻顥嘅前臂，微微踮起腳尖湊近到邱旻顥嘅耳邊講道





「我知啦！」邱旻顥無奈地反一下白眼，喺李逸彤企番好之後，邱旻顥伸手扺住佢嘅下巴，掐住佢嘅兩邊臉頰，「聽日咪睇！」

李逸彤因為邱旻顥突如其來嘅舉動而不禁紅了臉頰，臉頰上泛起淡淡嘅紅霞，好似掃咗一層薄薄嘅胭脂喺臉上一樣




IG Link: https://www.instagram.com/nd_cotttoncandy/?hl=zh-tw