男友出軌，我決定送26頂綠帽比佢: I for 校服的自述（4）

我：但係出軌既人 往往會隱瞞對方

G奶：呢個就係問題所在

我：之前聽過有種關係，叫開放式關係...如果我好愛一個人，我唔會忍受到佢出去亂搞或者有第二個。

G奶：咁又唔好太肯定，你之前都原諒過你條仔兩次

我：或者...係因為我太愛，愛到明知佢背叛我，我都唔捨得離開佢。





G奶：太愛唔係一件好事，好難長久。

我：你之前都有同我講過，果時我仲未明，而家明已經太遲。愛，可以燃燒，可以永恆，但不可兩者並存。

G奶：趁仲細個，何不去拍一場不談以後、沒有未來既拖，燃點一剎那火花，哪怕一兩個月後就分手。

我：但係咁樣既愛，有咩意思？

G奶：咁執著於一生一世 又有咩意思？





G奶：你要知道，人可以對好多人產生感情，而新鮮感係有時限。

我：愛過痛過，先叫無憾？

G奶：聰明 加一分俾你

我：一直以來，我都覺得好壓抑，但係你幾句說話，就幫我解開咗個心結

G奶：傻妹，有乜野都要同G奶講，我永遠都會係度。





我：係呢，我今日識咗個男仔

G奶：一見鍾情？

我：有少少好感

G奶：男仔個樣好似你ex？

我：你又知？

G奶：我G奶黎架嘛，除咗識窺視你換衫，仲識得窺視埋你既內心

我：你點睇啊？

G奶：佢同你表白啦咩？





我：咁又未...但我覺得有機會發展

G奶：一見鍾情多數係錯覺，唔係下下要拍拖既，咪當識多個朋友仔

我：如果我未真正放低，係咪唔應該開展另一段戀情？

G奶：佢一日未同你表白，你都唔使諗太多

G奶：去同佢玩下，唔使下下咁認真：）

......

Unknown : 食咗兩枝煙未？





我：未食，所以今日唔係壞女孩

我：你係上連登扮毒撚既偽毒？

Unknown：我係真·純情小毒毒

我：仲扮

Unknown ：唔扮啦；p 要相認嗎？

我：凱婷向小毒毒賜酒

Ian : 謝過凱婷娘娘

我：做咩叫我娘娘 唔通想做我隻兵^^





Ian : 係咪要去排隊領番個籌先

我：睇在你對本娘娘有救命之恩，俾你插隊排第一啦

Ian ：得此寵幸 小兵子受寵若驚

我：屌呀siu4

Ian :娘娘你做咩爆粗啫（一個哭笑不得的emoji)

我：我係假娘娘 從來都唔收兵

Ian : 多數講得呢句既先係娘娘





我：收兵好賤格喎 人心肉做既 明明唔愛 做咩要玩弄人感情

Ian : 如果真係中意 應該做唔出欲擒故縱

我：係呀 耍手段既唔係愛 只係操控

Ian : 好似你咁諗既好女仔 真係賣少見少

我：與其千軍萬馬 我只要一個大將軍

Ian : 咁你搵到你既大將軍未？

我：仲未 ...

其實我曾經有過。但佢變咗心，離我而去。

其實你有啲似佢。

當然，呢兩句我無打到出黎。應該冇乜邊個中意做人替身掛？！

Ian : 尋尋覓覓 可能就係你眼前呢

我：你講緊自己呀？（笑）

Ian : 唔介意幫你擋多幾件肥仔既

我：你咁講 女朋友會唔會呷醋架

汲取阿瑩故事既教訓，要先搞清楚佢有無女朋友。

Ian : 情人節後分咗手

單身！我即刻開心咗一秒。

我：初戀？

Ian : 係呀

我：咁啱既 我又係^^

Ian : （苦笑）呢啲係咪叫緣份

我：睇你信唔信啫

Ian : 我都幾信命中註定下

Ian : 應該遇上既都會遇上 就好似我遇上你咁

我：你會唔會掛住你個ex?

聽聞男仔會對初戀念念不忘，唔知丁家岐會唔會掛住我呢？

Ian：我信我下個女朋友一定會好過佢 ：）

前提係佢現任差過前任。

所以我希望丁家岐永遠不快樂，永遠想起我。

Ian : 你學校有無 last day?

Ian : Sry for 講野太跳

我：無啊

Ian : 我都無 sls

Ian : 係啦，我有frd搞咗個校服party，你黎唔黎？

我：party room ?

Ian : Nah...我地去天台BBQ 有得飲酒唱K打牌玩switch咁咯

我：但係我唔識你啲朋友 佢地會唔會唔中意

Ian : 傻啦 有女佢地多多都得

Ian : frd搭frd 我都唔係全部識得：p

Ian : 叫得你黎 我一定會陪住你喎 唔使驚

「去同佢玩下，唔使下下咁認真！」我又諗起G奶既說話。

辛辛苦苦考完DSE，都係時候出去玩下。

我：好啦 應承咗先^^