男友出軌，我決定送26頂綠帽比佢: H for Holiday (8)

Holiday一臉恍惚，過咗幾秒鐘，先理解到我既說話。

「我有咩好，點解你會中意我。」佢問。

佢既語氣有啲期待，又有啲害怕。

我望住佢對眼，諗都唔使諗，將埋藏心底既說話，不加修飾、好真誠咁講出黎：

「我中意睇你打籃球，中意你會保護我，中意你笑得好好睇，中意跟住你周圍去，中意同你一齊既感覺。





總而言之，我中意你成個人。」

今次係我一次同人「告白」，連丁家岐都冇咁既待遇。

我以為佢聽到會欣喜若狂。

「你中意既係表面既我，扮出黎架。」Holiday搖一搖頭，迴避我既目光。

佢唔信我。





「咁點解唔做番真正既你？」

「我成日放負，又講埋啲喪氣說話。連我都唔中意自己，其他人又點會中意。」佢苦笑，攤係梳化，望住個天花板。

「我而家大個啦，你可以同我講，我唔會嫌你煩架。」

我眼睛眨下眨下咁望住佢。

Holiday刮一刮我臉頰：「咁我可唔可以好似以前咁抱住你？」





我企起身，坐上佢大髀，佢好用力咁攬住我，我好似樹熊仔咁，捉實佢唔放。

見佢唔講野，我追問落去：「呢幾年係咪發生咗好多事呀？」

佢沉思咗一陣，好似好多野想講，最後只講咗七隻字：「已經無得返轉頭。」

聽落好撚sad。

但我明白佢既心情。

因為我同丁家岐，都係已經無得返轉頭。

完咗就係完咗，斷得一乾二淨，就跟死了的一樣。無第二個結局。

「我初戀好靚女，大把人追。」





「我見過。」我妒忌果個女仔。如果有機會，我會想變成佢，得到Holiday所有既愛。

「幾時既事？」Holiday問。

「好耐以前啦，係條街撞到你地。」我答。

「你無同我講過既？」

「住同一條村，撞到有咩咁出奇。」

佢繼續講佢既初戀：

「我成日同佢講分手，理由係我唔相信有人係了解我之後，仲會中意我。」





每一次，佢都會喊住咁挽留我，話無論我係點樣既人，佢都會一直中意我。

咁我咪去試探佢。我同人亂搞男女關係，仲要特登畀佢知道，睇下佢會唔會離開我。」

原來佢真係有同人亂搞男女關係，枉我仲一直以為佢係受害者。

我感覺到內心有一角崩塌了。

「你初戀一定好傷心啦。」

Holiday點點頭：「但係每次我氹番佢，佢又會返黎我身邊，話畀多最後一次機會我。

我一次又一次咁試探佢，直到我確定佢真係會無條件中意我為止。

就係我決定要好好地對佢既時候，佢話走就走，無論我點樣求佢，跪埋係度都無用。





我先知道，我傷得佢太深，講得太多大話，佢已經死心，唔再信我。

連我都覺得自己好仆街。」

「瑤瑤。」

我呆咗一呆，然後反應過來，瑤瑤係佢初戀既名字。

「好對唔住。」

「我做錯咗。」

「我知無論做乜，都於事無補。」





呢啲說話，丁家岐都同我講過。

每個犯錯既男仔，講既說話都一樣。連語氣都係同樣地情深意切...其實佢地係咪有份稿照讀？

「如果我死咗，係咪可以彌補到對佢既傷害。」

「唔好再講啦。」我打斷佢，唔想再聽佢講落去。

傷害已經造成，無論佢死唔死，果個女仔都唔會因而好過一點。

而家係2022年，以死謝罪已經過時。

「我好記得，分手既時候，佢咒我，呢一世都沒人會中意我，要孤獨終老。」

Holiday臉上有兩行眼淚不停流落黎。

「你唔好喊啦...」我覺得佢好可憐，打從心底同情佢。

但係同情應該唔係中意。

夜深人靜，係人最脆弱既時候，太適合傷春悲秋。

情緒係會傳染，所以我同佢攬住一齊喊。

......

「我有啲攰，想瞓啦。多謝你今晚陪我。」

「你一個人ok?」

佢點點頭。

我執好野，著好外套，留低一排必理痛，清走兩袋垃圾：「咁我走先。」

「阿婷。」Holiday第一次咁叫我。

「做咩呀？」

「我係衰人，唔好中意我。」

之後佢無再講野。可能瞓咗，亦可能係扮瞓。

我坐係佢隔離，聽住佢呼吸變淺。

飲完酒，應該一夜無夢，好好瞓。

夜晚風涼，我驚佢凍親，搬咗張被出黎，冚係佢身上。

我靜靜地凝望佢。

褪去光環，落入凡間，佢都有七情六欲，會有情緒，會犯錯，會受傷。

佢唔再係高高在上既男神。

我地既關係終於平等。

我塢低身，係佢臉頰輕輕啄咗一下。呢個吻無關情慾，只為曾經既真心。

當年佢惜過我一啖，而家還畀佢。

吻過了，做番過客，彼此無拖無欠。