男友出軌，我決定送26頂綠帽比佢: H for Holiday (5)

我地去咗朗豪坊既NeNe Chicken。

下午茶時間，難得冇咩人，唔使排隊。

「芝士蜜糖味雙拼炸雞。」

「影個相先。」我拎部手機出黎，一時覺得角度怪怪地，一時覺得個影遮住咗，點影都係冇feel。

Holiday無催我，望住我擺弄手機：「我幫你？」





「好啊。」

佢影食物，我影佢。

影埋佢件衫入相，較好濾鏡，發佈上IG。

「四年後又回復單身。自己一個也要過得好好的。」本來想打caption，諗諗下都係刪咗。

我仲未準備好同全世界宣布。





食咗幾啖，炸雞係好好味，不過我無咩胃口，無好肚餓既感覺。

「唔好勉強自己。」

「嗯。」

......

「帶你去見一個人。」Holiday拖住我。





「邊個啊？」呢個時候，唔係好想見人。

「等陣你咪知。」

簡陋既攤檔，枱上擺咗幾本天書，面前有幾張紅色膠凳。

係算命既。

Holiday拉住我坐低：「紅姨。」

算命師叫陳紅，大概六十幾歲，望落親切和藹。佢笑瞇瞇咁望住Holiday，眼睛笑成一條線：「又過黎探我啊？今次仲帶埋個妹妹仔黎。」

「係呀，順便請你飲野。」Holiday拎出一枝鐵觀音畀佢。

「我去接個電話，你地傾住先。」





「真係有我心。」紅姨目光溫柔咁停留係我身上：「妹妹仔，伸隻手畀我望望。」

「哦。」

佢握住我隻手，認真察看，好似係度解讀緊一道謎題。

紅姨娓娓道來，講以前發生過既事，講我性格乖巧溫柔，講啲我已經知道既野。

佢把聲無咩起伏，好似催眠咁，所以我無好專心聽，成個人係度遊緊魂。

直到佢話：「妹妹仔係有福分既人，而家應該過得好幸福，一生都有人惜有人愛。」

如果我真係咁有福分，就唔會俾丁家岐飛啦。





證明紅姨睇人唔準。

「我有一個等緊既人，佢會唔會...」

我都未問完，紅姨就好堅定咁話：「會啊，如果佢真係愛你，就一定會番黎你身邊。」

堅定到有一刻令我相信，丁家岐真係會回心轉意。兜兜轉轉，我地又會係番埋一齊。

「咁如果佢唔再愛我呢？」

「有福之女，不入無福之門 。」

我對佢展露一個真心既笑容。

「仲有無野要問？」





「無啦。」

佢遞咗個粉紅色利是封過黎，指住門口既木箱：「收費隨緣，入落果度就得架啦。」

我走埋一邊，放咗一百蚊落去。

「好滿意呀？」出到門口，Holiday問：「見你出手咁大方。」

「我幾中意紅姨。」

因為佢講咗啲我想聽既說話。

「紅姨逢人只講好話，所以我一唔開心就會黎搵佢。」Holiday同我解釋。





「你又知我唔開心。」我問。

「下，寫哂係你塊面喎。」

仲以為自己偽裝得好好。

我唔想多講。

「係呢，你成日唔開心架咩？」Holiday同紅姨咁熟，應該係常客。

「出到黎社會做野，好難有真正既快樂。」Holiday淡淡然咁話。

要戴住面具做人、要瘋狂加班無補水，
要畀老闆客人狂屌上天 ......

呢啲說話聽就聽得多，但仲未親身體會過。

「你會唔會掛住讀書既日子呀？」我問。

「讀書咪又係辛苦。」

「至少有朋友陪吖。」

「中學果時畀條女飛，散咗之後周圍唱衰我，搞到全級女仔都杯我，男仔又當我係狗公，無人肯同我做朋友。」

而家諗番起，難怪佢成日自己一個。

「你啲同學好衰啊...」我諗咗諗，又話：「不過我相信你唔係啲咁既人。」

「你同我好熟咩？咁肯定。」佢挑一挑眉。

「總之我信你。」

我地互望，佢笑下，我又笑下。跟住佢摸一摸我個頭。

好似我仲係小妹妹咁。

「頭先有個客打黎，話有份文件要我去拎。你仲有無地方想去？可以陪埋你去。」

「無啦，唔阻住你做野。」

「我遲啲去都無所謂。」佢一再堅持。

「咁你送我去搭車啦。」

「無問題。」

「你又話放假既？做咩突然要見客。」

「唔使番公司啫，客叫到都要隨傳隨到。」

「咁咪冇哂自己時間？」

「慣咗啦。」

「日日都係咁會唔會好悶啊？」

「悶架，所以咪拉你出黎陪我出街。」

我嘻嘻一笑，想問我們幾時會再見面，又驚佢嫌我煩。

怕咗啦，有心理陰影。

「你DSE要加油，唔好偷懶。」佢突然話。

「我數學有得拎2已經偷笑。」

「邊啲唔識呀？睇下我教唔教到你。」

「概率啊、函數啊、軌跡、圓方程......」數數下越講越多。

「咁聽日約出黎我教你啦。」

「不過我好蠢架，教極都唔識。」丁家岐已經教過我好多好多次：「你教還教，唔好鬧我。」

「我盡力啦。」

「盡力唔好鬧我？」

「係盡力教到你識為止。」