男友出軌，我決定送26頂綠帽比佢: D : 廁所裡的風花雪月（1）
【美女團傳來一則新訊息】
阿瑩：我地班無人出戰女子4X100 ：/
不如我地報名玩下？
其他活動又唔見佢咁落力。肯定係因為余Sir既緣故。
詩韻：下 跑到成身汗 妝都溶埋
魚蛋：娘娘可以順便派兵糧 走下光露下底
詩韻：頂你！！！
魚蛋：頂我無所謂，人齊就預埋我啦
詩韻：咁好啦 凱婷去我就去
又掟個波俾我。
佢地應該睇死我唔會應承吧。
我呢個弱質女流，瘦到風都吹得起，自然同陸運會無咩緣份。每年最大既樂趣，就係諗下lunch去邊食、周圍R水吹、仲有睇下丁家岐參加咩項目，拎定望遠鏡出黎做迷妹。
阿瑩：我研究過 今年對手都幾弱 應該至少可以拎番個銅牌
好少見佢咁堅持。
如果我地參賽，余Sir會黎睇我地比賽，呢個先係佢既最終目的吧。
身為佢既好姐妹，我決定拉哂所有人落水，成全佢既心願。
我：最後一年啦，再唔玩， 以後都無機會~
I'm in ! ! !
阿瑩：咁我幫你地報名架啦
阿瑩：魚蛋 你全名係咪李文靜
魚蛋：屌你 識咗六年啦 仲要問呢個問題
又唔怪得阿瑩，平時成日魚蛋魚蛋咁叫，連我都差啲唔記得佢姓甚名誰。
我：因為你同你個名真係好唔襯
至少我睇唔出佢邊忽文靜。
魚蛋：咩唔襯？係你文靜，又唔係我文靜
詩韻：不如考慮下改名做李魚蛋：）
......
「咁夜，你去邊呀？」啊媽問我。
「落街練跑步。」
「唔好咁夜番黎啊，一個女仔好危險架！」
呢頭偶爾有一兩宗罪案發生，不過治安都算唔錯，至少我未試過俾麻甩佬跟蹤，或者俾人打劫，所以我都唔係好擔心。
唔知點解，大人成日覺得，日頭比夜晚安全，黑夜總比白天危險。
唔通壞人同病毒一樣，一到入夜，就會準時六點打卡開工？
街外，一個唔算荒寂既深夜。
平時好少夜麻麻行落街，宜家先發現，原來都幾熱鬧下。
大排檔仲係夜夜笙歌，有好多老野係度喂喂喂。
「喂，聽講聽晚無得堂食啦！」
「多謝偉大既仆街政府！」
「飲啦柒頭，今晚一於不醉無歸！」
上一代既人，經歷過六七暴動，忍受過三年零八個月既抗日時期， 見證埋九七回歸，呢啲先係真正既大風大浪。而係呢個太平盛世，我最大既風浪，都係因為丁家岐。
跑跑下，腳步好浮，頭好暈。可能因為琴晚瞓得唔好。
我一向瞓得好沉，好似隻死豬咁，可以一覺瞓到大天光。呢兩日可能因為就黎M，成個人勁負面，個腦好多野諗。
再加上我琴晚發咗個好長好長既夢。
夢入面，我地玩緊捉迷藏。
我企係樓梯，居高臨下，定晴望住丁家岐。
「數十聲，你再過來追我。」
「我一定追到你。」丁家岐昂高頭望住我。
遊戲開始。
丁家岐始終跟係我身後，步伐不緊不慢，離我不太近也不太遠。
我輕敲欄杆，對佢勾勾手指：「我好難追架喎。」
「睇下點。」丁家岐嘴邊浮現一絲意義不明既笑容。
突然間，地面出現裂縫，成幢大廈劇烈晃動，樓梯由下至上，一層一層咁消失。
「丁家岐！」我驚叫出聲，想捉實佢隻手。
丁家岐既笑容依舊，伴隨住泥沙流石，一同墜落，化成一捧四散既沙。
夢裡面既惆悵，濃得化不開。醒咗之後，我腦一直回蕩King姐既說話。
「你地之間，極有可能出現第三者，可以係精神上，亦都可以係肉體上既。」
「呢個第三者，係好多方面都比你強，但亦都有地方不如你。」
都話夢係潛意識既反射。咁係咪姐係話，我其實好驚冇咗佢？
胸口有種窒息既感覺。
唔得啦，跑唔郁啦，已經過咗我既極限。
拎出手機睇時間，先跑咗廿幾分鐘。
不過呢個唔係重點。重點係，我個銀包呢？
我張身份證、學生證、銀行卡、同丁家岐既合照，通通係哂入面。
我急急腳沿路折返，行哂成條街，都係無。
就係我彷徨無助不知所措心亂如麻急得六神無主心瀕臨崩潰既時候，手機突然響起。
「喂？」
無人應，但係電話果頭有呼吸聲。
我又喂咗幾聲。
「我手上有你張身份證。」傳黎一把低沉而有點沙啞既男人聲。
「真架？你點知我電話架？」呢位聲音咁好聽既仁兄，簡直係我既大恩人。
「銀包裡面夾咗張字條。」
「你係邊呀？我過黎搵你。」
「我要問妳幾個問題先。你叫咩名？」
「我叫胡凱婷。」
「男定女？」
「女。」一聽就知道我係女仔啦。
「今年幾歲？」
「17歲。」
「身份證號碼係？」
我講咗一串號碼出黎。
「三圍呢？」
「關你屁事。」
「女仔人家，講野點可以咁粗鄙架。」佢笑咗一笑。
「你好俾番張身份證我啦，我無時間同你玩！」我耐性有限，開始發忟憎。
「點解我要俾番你？」佢好似覺得好好玩，漫不經心咁話。
佢問我點解，真係好好笑。拎咗唔屬於自己既野，還番俾人，唔係天經地義既事咩？
「因為做個良好市民，人人有責。」
「做良好市民？我無興趣喎。我對錢比較有興趣。」佢好無賴咁話。
「你要幾多？」
「一口價，五百蚊。」
「你唔好去搶。」
「我擺明就係搶緊你。」
「我無錢，最多等陣禁二百蚊俾你。」其實我大可以去警署報案，但係我嫌麻煩，唔想小事化大，所以私了算。
「見你係學生妹，殺你。」
「係邊等？」
「唔講聲多謝？」
「多你老母。」
佢完全唔嬲，當正我係扭計既細路：「ok，我係便利店門口等你。」