男友出軌，我決定送26頂綠帽比佢: 學生會競選（上)
「大鵬一日乘風起，
直上雲霄九萬重。
我閣名為「雲霄」，意即大鵬展翅，憑借勁風，一飛沖天直上雲霄。
我閣懷著豪邁的志向，希望帶領各位走得更高更遠，欣賞最美麗的風景，留下最難忘的回憶。
不知不覺間，距離投票日只剩1日。還記得當初彼此都很陌生，走在一起，只是因為擁有相同的抱負：為同學服務。連日的朝夕相對，讓我們明白到，什麼叫作齊心協力，什麼叫作全程投入。
早上睁開眼，便要趕回學校宣傳，小息午飯時要洗樓、派發souvenirs，放學後還要繼續討論政綱的細節。週末休息？非也，開會已成指定動作。途中固然有波折困難，但是我們都能一一克服解決。
一星期chur足七日，若你問我們，創辦內閣辛苦嗎？辛苦。值得嗎？很值得，因為有意義。
一步步走到今天，萬事俱備，獨欠你們手上的一票。
明天，攜風而來；日後，雲上相見。 」
啱啱係IG like完雲霄個post，丁家岐既WhatsApp就即刻彈出黎：「留咗熱巧克力同曲奇餅俾你，黎booth搵我！」
未行到去學校，已經嘈到拆天。果然，門口人頭湧湧，擠都擠唔入。
「一！二！三！」
「雲霄，雲霄，響徹雲霄！」
「焰王一出，誰與爭鋒！」
兩大陣營係度鬥大聲，贏人先要贏陣，邊個大聲邊個贏。
叫到我耳膜都痛埋。
我奮力擠入人群。
「喂，你揀陳子俊定丁家岐？」兩個小妹妹掩住嘴，大聲講細聲笑。
「丁家岐好似靚仔啲。」
「但係陳子俊好有大佬feel喎。」
「可唔可以兩個都要？」
少女心，得啖笑。
其實丁家岐只係副會長。
佢上年先選完學生會，今年諗住退落黎，專心應付DSE，唔搞咁多野。不過，見班師弟妹好似咩都唔識，又無一個人擔到大旗，唔想佢地輸得太難睇，咪俾啲意見佢地，俾俾下又變埋做副會長。
幾經辛苦，終於見到丁家岐。
佢遞咗杯熱朱古力俾我，認認真真咁話：「請支持候選內閣雲霄。」
「做咩呀，驚我唔投你？」
「送野俾女朋友需要理由架咩？」佢反問。
今日幾凍下，我飲咗兩啖，捂住個紙杯，正好用黎暖手。
「同陳子俊玩完啦？」
「係呀。」
咁我們又真係玩完喎，以後都唔會再見面。
「玩咗咩？」
「冒險樂園。」
「忙完學生會，下次陪你去。」
閃光燈一亮，咔嚓一聲，有人影緊我地。
影相既女仔見我地望過去，即刻行埋黎，對丁家岐露出一個甜美既笑容，聲音嗲到不能再嗲：「你地好呀，我係校報記者，可唔可以請你地做個interview？」
「好呀，無問題。」丁家岐無問過我意見，就一口答應。
攝像機對準我地。
唔係好慣對鏡頭，成個人都好僵硬，隻手都唔知擺邊。
「側少少企，大概3/4臉對住鏡頭，可以突出面部線條，會上鏡啲架。」丁家岐拍拍我背脊。
我緊張到pk，邊得閒理咩上鏡唔上鏡。
呢個時候應該做咩好？
係啦，面帶微笑，講少啲野，反正丁家岐先係主角，我係配襯。
「3.2.1......」倒計時，開始！
「大家好，為你報道既係Nicole。學生會競選進行得如火如荼，企係我身邊既，係侯選內閣雲霄副會長，丁家岐。」
丁家岐對住鏡頭微微點頭，打咗個招呼。
「競選前夕，你有咩心情？」
「同上年一樣，忙到無時間去諗有咩心情。」丁家岐笑住咁話。
「咁唔知你空閒既時候，有無上Secret既習慣呢？」
佢個話題都轉得幾生硬。
「有呀，身為候選內閣，事無大小都要關心，連八卦都唔放過。」
「咁你應該留意到，最近Secret有好多關於你既流言，仲出現咗多張不雅照片。你有咩回應？」
「假既。」丁家岐毫不猶豫回答。
「可唔可以講得具體啲？」Nicole扮哂無知聽唔明。
「人有相似姐，我無去過蘭桂坊。」
「咁點解你唔作出澄清？」Nicole瞪大眼睛，故作吃驚咁問。
「就算我澄清，啲人都係會亂咁寫。我自問問心無愧，信我既人自然會信我。」
好一句問心無愧，語氣堅定到我都差啲信咗佢。
「但係佢地淨係造你，又唔造其他人，係咪你得罪咗咩人呀？」
「可能我成日出現，佢地咪拎我做話題。」
「呢件事有無影響到內閣既形象？」
「係呢個世代，標題要夠誇張，先可以吸引到眼球，先會有人去like同留言；而我地雲霄就靠實力，唔使做標題黨，都一樣有人留意同支持。」
丁家岐回答得滴水不漏。Nicole好似無哂招，唯有遞枝mic俾我：「你同丁家岐識咗幾耐？」
「我地今年F.6，姐係六年。」
「呢件事有無影響到你地既關係？」
「我企得係佢隔離，就代表會繼續支持佢。」唔知點解，講完呢句個胃突然好痛。
「十分滿分，你會俾雲霄幾多分？」
「大概八、九分咁啦。」
「仲有果一兩分失係邊？」
「無失到架，不過要有進步空間，先可以越做越好嘛。」
「好多謝你地接受訪問。」Nicole正面望番鏡頭：「接下落黎，我地會去訪問焰王既成員，片段將會係今晚九點正播出，敬請大家期待！」
我同丁家岐肩並肩，望住吵鬧既人群。
「講得幾好呀。」丁家岐伸出手。
我望咗佢一眼 ，唔係好想理佢：「你都係。」
「好多人望緊我地。」佢細細聲提醒我。
做戲做全套，所以我緊緊握住佢隻手。