[校園][純愛]《身旁的那一個》: 第九十一章

我:「下做咩事呀

點解無啦啦咁嘅?

係咪我做錯啲咩呀」

愷晴:「其實我覺得你好稱職

你好體諒我，





對我好體貼

唔會逼我做一啲我唔想做嘅嘢

你雖然好忙好多嘢搞，

不過我知道你盡快做完跟住陪我講電話

其實咁樣我已經好開心





我講真㗎」

我:「唔好意思呀可能我有啲嘢做得唔好

不過真係冇彎轉」

愷晴:「你仲記唔記得有次我想kiss你

跟住你本能反應縮開咗」





我:「我記得

我唔係唔鍾意你呀，

我估下因為有個人突如其來衝埋嚟我先會咁

我講真㗎冇呃你」

愷晴:「我知道呀

但我都係一個女仔，

我想錫男朋友嗰陣，

男朋友即刻縮開呢個反應





我真係完全冇諗過係咁

嗰次我唔敢同你講我驚嚇親你，

其實返到屋企我好唔開心

忍唔住喊」

我:「唔係呀

真係唔好意思」

其實嗰陣我都唔知講啲乜





可能我真係仲係細個，

好多嘢唔識，

我完全冇諗過我呢個本能反應係會傷害到我女朋友

我係諗都冇諗過，

唔係佢講嘅話，

我係永遠都唔會知佢因為呢件事而喊

愷晴:「唔使唔好意思

其實冷靜過後諗返你都冇錯」





我:「咁點解你頭先話今日我哋呢個結果

係因為嵐嵐

我唔明點解」

愷晴:「我同你拍過半年拖，

半年呢個時間我覺得唔算短

喺呢段時間入面我唔止一次覺得，

我永遠永遠喺你心入面





都比唔上嵐嵐」

我:「下」

你哋冇睇錯，

我嗰陣嘅反應真係咁

因為成件事太突然喇

再加埋佢講完呢啲嘢，

我真係冇咁快消化到.愷晴:「我同你一齊出嚟嗰陣

不論係拍拖前定拍緊拖

基本上你每次都係講到佢」

我:「咁因為我哋三個都熟㗎嘛

正如我同海狗都發生好多嘢

不過我知你同佢唔熟，

咁我咪冇同你講

再者我同佢真係冇嘢

我可以好肯定同你講

真係冇嘢」

愷晴:「我相信你哋兩個都冇做啲對我唔住嘅嘢呀

呢個係真㗎」

我:「咁咪係囉咁點解要分手」

愷晴:「如果我同你講嵐嵐都鍾意你

你信唔信」

我:「點會呀，

我同佢真係要一齊就一齊咗

我承認我同佢可能真係好好朋友

無所不談，

不過對住佢真係冇非份之想

更加冇背叛你」

愷晴:「我冇你識佢咁耐

不過我都識咗佢一段日子仲係好好朋友

你講嘅嘢其實我都知，

我知道佢一路都好克制自己

所以頭先你話你兩個都冇背叛我，

我真係信你兩個㗎

但係我同你拍咗咁耐，

我覺得我唔係你心目中嘅首選呀」

我:「點會唔係呀

我女朋友就係得你一個啫」

愷晴:「但係有咩事上嚟

你最快諗到嘅嗰個都係嵐嵐，

而唔係我」

我:「嗰次係因為你唔熟路

所以先唔搵你啫」

愷晴:「其實唔止嗰次㗎，

有一次係未拍拖之前

既然未拍拖咁當然唔講啦」

我:「邊次呀」

愷晴:「你記唔記得我哋有一年去咗個晚會嘅

尖沙咀嗰次」

我:「我記得呀，

做咩」

愷晴:「嗰次我同你咪一組嘅

你記唔記得你為咗搵佢

成個人跑咗出去」

我:「咁我嗰陣唔知去咗邊

原來佢條友整到隻腳」

愷晴:「我知你出咗去搵佢呀

因為見到你兩個一齊返嚟，

我唔係嬲

因為嗰日我同你未拍拖

根本冇資格，

我想講嘅係，

其實可能連你自己都唔知

佢先係令你不顧一切衝出去嗰個

而唔係曾經作為你女朋友嘅我」

我嗰陣心諗，

原來女人真係好好記性

生我出嚟個老母係

相處得最耐嘅鍾曉嵐係，

就連依家企喺我對面嘅愷晴都係

差唔多兩年前嘅嘢都記住，

不過問心

如果當日嗰個係愷晴，

我嘅做法會唔會唔同

其實我真係答唔到

或者我有答案嘅，

只係我唔敢面對佢，

同埋自己

所以當我聽到佢咁講嘅時候，

我的而且確係無言以對

愷晴:「我都好多謝東仔你半年嚟嘅照顧

係真㗎呢半年好開心，

我哋嘅生活可能唔算多姿多彩

不過至少我係樂在其中，

係我接受唔到自己嘅男朋友心入面嘅第一位唔係我

我哋攬埋最後呢次啦，

好唔好」

我:「我都多謝你

唔好意思」

愷晴:「唔使唔好意思，

我哋三個都冇人做錯」

經歷人生第一次分手，

行緊返去嗰陣我係唔識反應

係咪好傷心，

其實唔係

我只係感覺到好愕然，

以後唔會再同佢報行蹤

唔會再有個人每日同我無間斷WhatsApp

嗰陣其實我自己個腦袋都唔算清晰

對呢件事冇乜深入嘅睇法，

我淨係知道我嗰晚冇一般人分手咁

喺度買醉痛哭徹夜難眠，

有嘅就只係內疚，

竟然會令到自己個女朋友

覺得自己唔係第一位.